ཆག༌ལས༌གུན༌ 23 - New Testament in Ladakhi Langageیہُودی پے ژوکسپے نانّگا حضرت پولُسی گواہ۔ 1 حضرت پولُسی یہُودی پے ژوکسپے تھوسمیگونلا زیگستے مولس، ”یہُودی پے فونو گون، دیرینگ تشوگپا نگے خُدے سکوندونلا سیمس لاگمو نیامپو میتشے پھودپین۔“ 2 تیبو تشورّاچیگ، اِمامِ اعظم حننیاہ سی حضرت پولُسی لدُونلا لانگستے یودکھانّی میگونلا کھونّگا ڈاملچاگس تونگ زیرس۔ 3 تینے حضرت پولُسی کھوا مولس، ”ریاکاری، کارتسی سکوسکھانّی سیگپا، یبوے لان کھیورانّگا خُدے سالین۔ شریعت نانگجین نگا ٹھیمسچادّالا کھیرانگ تیکا دُوگستے مانّا، کھیرانگی نگا ردونگچیسلا حُکم تانگستے شریعت پو چاگدوگ۔“ 4 حضرت پولُسی لدُونلا یودکھانگونّی کھونّگا زیرس، ” کھیرانگی خُدے اِمامِ اعظما نگانپا زیرچیسّی ہامپا چوادا۔“ 5 حضرت پولُسی لانسالس، ”یہُودی پا فونو گون نگا کھونگ اِمامِ اعظم اینکھانبو گیُوس میدپین۔ شوقبُو بوے نانّگا ’کھیوجے کھیوجارانگی وانگثولپا نگانپا زیر ماگوس‘ ڈِیازادتے دوگ۔“ 6 حضرت پولُس لا ژوکسپے نانّگا کھاچیگ صدُوقی پا یانگ کھاچیگ فریسی پا اینکھانبو گیوسیودپین۔ کھونگی کُوچو سالتے مولس، ”یہُودی پے فونو گون، نگا فریسی پا این، یانگ نگے ابانگ۔ نگے شیکھانگون سونتیا لانگسچیسّی نانّگا ریوا بورچیسپوے نگا ایکا ٹھیمسچادّالا کھیونگستے اینوگ۔“ 7 تیگون مولّاچیگ، فریسی پا تانگ صدُوقی پا میمانگسّی نانّگا زیرزیر ثانٹے سونگ، یانگ ژوکسپے نانّگا کھاگنییس بُود 8 (صدُوقی پاگونّی شیکھانگون سونتیا لانگچیس، فرشتا تانگ سیمسنید گُون میدکیاگ زیرّانوگ، اِین نانگ فریسی پاگونّی تیگونّیکا ایمان چوانوگ) 9 ژوکسپے نانّگا ہیلینگس ثانٹے ژوگس، یانگ فریسی پے شریعتی عالِم می کھاچیگ لانگستے صدُوقی پاگونّی گیابگال ثانٹے چوستے زیرس، ”نگاجا ای می بوے نانّگا چانگ سکیون ماتھوب، کالتیس فرشتاجیگ یا سیمسنید چیگی کھونّگا سپیرا تانگستے یودنا چی سونگ۔“ 10 دزینگمو ما سوگپو سونگپا، ماگستونگی سپونبوے تیگونّی حضرت پولُس تشیدتشید چوس میتانّگا سامستے جیگس۔ کھوے ماگمیگونلا یوگا سونگتے وانگ نیامپو ژوکسپے ٹونے حضرت پولُس کھیونگستے کیلے نانّگا کھیر زیرتے کا تانگس۔ 11 تینّا ژانلا مسیح حضرت پولُسی لدُونلا جالتے مولس، ”ہامپا چوس، یروشالیمّی نانّگا نگے پھیا گواہ تانگکھان تسوگسلا کھیرانگی رومی گیالسے نانّگانگ نگے پھیا گواہ تانگوس۔“ حضرت پولُس سادچیسّی جوسنگان لدینگس۔ 12 ستینگماجاگپو نگاتوگنے یہُودی پاگون جوسنگان لدینگچیسلا دزومس یانگنا کھورتے نامتشوگپا حضرت پولُس میساد تےتےتشوگپا کھونگونی میزا یا میتُھونگ زیرس۔ 13 تے جوسنگانبوے نانّگا ہالام می ژیبچو سانگ مانّگا تھوس۔ 14 کھونگون اِمام کُنی چھونمو تانگ یہُودی پے اُسکیونگ گُون یودسا سونگتے زیرس، ”نامتشوگپا حضرت پولُس ساد میساد تےتےتشوگپا نگاجے چانگ میزا زیرتے خُدے سکوندونلا نا ثانٹے کھورتے این۔ 15 تا نیرانگ تانگ یہُودی پے ژوکسپے ، ماگستونگی سپونبوا حضرت پولُسی شاگسپوا یانگسکیار سنگونّی سانگ گیالّا چوستے سارچود تانگچیسلا کھو نییژا یودسا کھیونگ مول۔ نگاجے کھو لامّا ساداین۔“ 16 اِین نانگ تے جوسنگانبو حضرت پولُسی سترِنگمو ی بُوژا تشورپا کھو گیُوگستے کیلے نانّگا سونگتے حضرت پولُس لا شادس۔ 17 تینے حضرت پولُسی تیکا یودکھانّی ماگیے سپونبوجیگّا بودتے، ”ای کھیوگتونگ بُو ماگستونگی سپونبویکا کھیر، کھوا سپیرا کھاگچانجیگ شادگوشیس دوگ“ مولس۔ 18 کھوے تے کھیوگتونگبو ماگستونگی سپونبویکا کھیرتے جوس، ”حضرت پولُس تسونپے نگا بودتے ای کھیوگتونگبو نیرانگیکا کھیر، زیرّاراگ، چیازیرنا کھوا نیرانّگا سپیراجیگ شادچیس دوگ۔“ 19 تینے ماگستونگی سپونبوے، کھیوگتونگبو لاگپا تھامستے ازامشیگّا کھیرتے ٹیس، ” کھیرانگی نگا چی شادچیسیود؟“ 20 کھوے زیرس، ”یہُودی پاگونّی سکیون کولتے حضرت پولُسی شاگسپوا سنگونّی سانگ گیالّا چوستے سارچود تانگچیسلا تھورے کھونگ ژوکسپے لدُونلا کھیونگ زیرتے نیرانّگا جُووا پھولچیسلا کھاچھامس۔ 21 کھونگی جووابو نیانّا مازاد چیازیرنا یہُودی پا جیبچوی سانگ مانّگاجیگ حضرت پولُس لا حملہ چوچیسلا ثونگستے، نامتشوگپا کھونگ میساد تےتےتشوگپا میزا یا میتُھونگ زیرتے کھونگونی نا کھورتے دوگ۔ کھونگون ٹالڈیگ چوستے نیرانگی کھونگی جُووا لاگلینلا کھیونگچیسلا ثونگستے دوگ۔“ 22 ماگستونگی سپونبوے کھیوگتونگ لوگستے کالین کا تانگس، ” کھیرانگی نگا ای لونبو کھیونگسپین زیرتے سوانگ ماشاد۔“ حضرت پولُس قَیصرؔیہ کالس۔ 23 تینے کھوے ماگیے سپونبو نیسلا بودتے زیرس، ”رایَ کھورکھان نیبگیا، ستا زونکھان ردُونچو تانگ دونگ کھورکھان نیبگیا ماگمیگون دیرینگ مِنتخسی چھوتشود گوپیکا قَیصرؔیہ چھاچیسلا ٹالڈیگ چوس۔ 24 حضرت پولُس سانگ زونچیسلا ستاجیگ تونگ یانگ کھو کالون فیلِکسیکا کھامزانگ لیبچوگ۔“ 25 کھوے ای ایگیبوانگ کالس، 26 ”نگا کلودیوس لُوسیاسی، سیواچان کالون فیلِکس لا سلام جُواد۔ 27 ای میبو یہُودی پاگونّی زومستے سادچیس دوگپین، اِین نانگ کھو رومپا اینکھانبو گیوس چھاچیگ، نگا ماگمیگون نیامپو سونگتے کھو سکیوبس پین۔ 28 کھویکا چی نیادگال کالدوگ ستاچیسلا نگے کھو یہُودی پے ژوکسپے لدُونلا کھیرپین۔ 29 حضرت پولُسی کا نیادگالبو کھورانگونّی شریعتی سکورلا اینکھانبو نگا ہاگو، اِین نانگ نیادگالبو، کھو تسونکھانّگا کاگچیس یا سادچیسّی اوسپا میدوگ۔ 30 نگا ای می بوے گیابگالّا چوسنگان لدینگدوگ زیرتے گیوسچھاچیگ، نگے تینّامالّا کھو نیرانگیکا کالپین، یانگ کھوا نیادگال کالکھانگونلانگ کھوے گیابگالّا زیرکھانگون نیرانگیکا سونگتے شود زیرتے کا تانگسپین۔“ 31 تینے کا تانگکھان نانگجین ماگمیگونّی حضرت پولُس ژانلا انتیپاٹیس گیالسا تشوگپا کھیرس۔ 32 ستینگماجاگپو حضرت پولُس ستا جونکھان ماگمیگونلا ستادتے جان ماگمیگون لوگستے کیلا سونگ۔ 33 ستاپا ماگمیگون قَیصرؔیہ لیبّاچیگ، کھونگونی ایگیپو کالونلا تانگستے حضرت پولُس کھوا ستادس۔ 34 کالونّی ایگیپو سیلتے حضرت پولُس لا کایولنے این زیرتے ٹیس۔ کھوا کھونگ کِلِکیہ نے اینکھانبو گیوسچھاچیگ، 35 کھوے زیرس، ”کھیورانّگا نیادگال کالکھانگون لیبّاچیگ، نگے کھیرانگی شاگسپو نیانین۔“ یانگ کھوے حضرت پولُس ہیرودِیس کھارّی نانّگا بورتے ماگمی ثونگکھانگون تانگچیسلا کا تانگس۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation