ཆག༌ལས༌གུན༌ 21 - New Testament in Ladakhi Langage

حضرت پولُس یروشالیمّا سکیودس۔

¹ اِفسُس پے اُسکیونگونلا ستینگجوگی سلام زیرتے نگاجا ٹُھوزینگی نانّگا کوس (زیربی جزیرہ) لا سونگپین۔ ستینگماجاگپو رُدس (زیربی جزیرہ) لا لیب، یانگ تے ستینگنے پترؔہ ڈونگکھیرلا۔

² تیرو نگاجا گُونلا پھونیشیا یولجونگسلا چھاکھانّی ٹُھوزینگ جیگ تھوبپا نگاجا تینّگا جونتے سونگپین۔

³ ٹُھوزینگی کانے نگاجے کُپُرؔس تھونگ یانگ نگاجا تے تشولینگ یوما چھوگسلا بورتے سیرییا چھوگسلا سونگپین۔ صُور گیالسا چالاگ پھابگوشیس یودپا ٹُھوزینگبو تیرو بورس۔

⁴ نگاجانگ ٹُھوزینگنے بابستے ایمان چانگون تسالپا تھوبتے لوبٹوگون نیامپو جاگپو ردون دوگسپین۔ ہلژخمہ رُوح گیُودتے کھونگونی حضرت پولُس لا یروشالیمّا میسکیودچیسلا جُووا پھولس۔

⁵ جاگما ردونّی ستینگنے نگاجا ٹُھوزینگا جونا چھاچیگ، ناما تانگ ٹھوگو تھیستے عبادت خانہ گانگپو گیالسانے بینگتے نگاجا لامچوگالا گیاتشوے تھاما تشوگپا یونگس۔ تیکا نگاجا تشانگمے پِیکدونگ ژُوگستے دُعا چوسپین۔

⁶ کھونگونلا ستینگجوگی سلام جوستے نگاجا گُون ٹُھوزینگا جونس، یانگ کھونگون رانگرانگی کھانگپا لوگستے سونگ۔

⁷ صُور نے نگاجا پَتُلمِیس گیالسا لیب، تیرو مسیحے فونو گونلا تُھوگا سونگتے کھونگون نیامپو جاگچیگ دُوگسپین۔

⁸ ستینگماجاگپو تیکانے بینگتے نگاجا گُون قَیصرؔیہ گیالسا لیب، تیرو فِلپُس، گاموےناتسُول شادکھانّی کھانگپا نگاجا دُوگس، کھو یروشالیمّی نانّگا عبادت خانہ لا جابستوگ جُوالا لدامسکھان ردونّی ٹونے چیگ اینپین۔

⁹ کھوا ناما ماچوکھانّی بومو جی یودپین، کاگونلا لونگستان شادچیسّی کھیود تھوبتے یودپین۔

¹⁰ نگاجا تیرو دُوگستے جاگ کھاچیگ چھاچیگ، یہُودیہ نے اگبُس زیرکھانّی پیغمبر جیک سکیودس۔

¹¹ نگاجے لدُونلا سکیودتے حضرت پولُسی سکیراگسپو نیامپو کھورانگی کونگلاگون لدامستے لونگستان سالس، ”ہلژخمہ رُوح بوے مولدوگ، یروشالیمّی نانّگا یہُودی پے اُسکیونگونی ای سکیراگسی داگپوبو اِیتسوگسلا لدامستے یہُودی مانکھان گُونی لاگا ستادین۔“

¹² تیبو تشورّاچیگ، نگاجا تانگ تیرو یودکھانّی میگونّی حضرت پولُس لا جُوجُو یروشالیمّا ماسکیود جُوستے جُووا پھولپین۔

¹³ اِین نانگ حضرت پولُسی مولس، ”کھیوجا چیا نُگوین، نگے سیمس چھاگچوگاد؟ نگا یروشالیمّی نانّگا حضرت عیسیٰ مسیح مِنتخسی پھیا لچاگتھاگا لدامچیس ماتشاد شیچیسلانگ ڈالڈیگ این۔“

¹⁴ نگاجے جُوواگون کھونگی مینیانچیس ہاگواچیگ، نگاجے جُووا پھولچیس پھانگستے زیرس، ”مسیح تھوگ گونگس ڈُوبشیگ۔“

¹⁵ تے ستینگنے نگاجے بیسّی پھیا ڈالڈیگ چوستے یروشالیم چھوگسلا چھاچیس گوزوگ۔

¹⁶ قَیصرؔیہ یودکھانّی لوبٹوگس کھاچیگّانگ نگاجا نیامپو یونگس۔ کھونگونی نگاجا کُپُرؔس پا مَنَاسوؔن نی کھانگپا دوگالا کھیرس، کھو توس مانگپوے سنگونلا حضرت عیسیٰ سی لوبٹوگس گیورتے اینپین۔

حضرت پولُس یروشالیمّا سکیودس۔

¹⁷ نگاجا گُون یروشالیمّا لیبّاچیگ، مسیحاپے فونو گونّی ما تھادپو نیامپو گاسُوس جُوس۔

¹⁸ تھورے زوگپو حضرت پولُس تانگ نگاجا گُون یعقُوبؔ ا تُھوگا سونگپین، تیرو شریعتی اُسکیونگ تشانگما دزومستے دوگپین۔

¹⁹ حضرت پولُسی کھونگ تشانگمالا سلام جُوستے خُدے کھونگ گیُودتے یہُودی مانکھان گُونی ٹوا چھاگلاس زادکھانگونّی سکور کھونگونلا جیبسال شادّا زادس۔

²⁰ تیگون تشورّاچیگ کھونگونی خُدا ستودپا پھولس، تینے حضرت پولُس لا مولس، ”چیسپے فونو ستوسّانگ، یہُودی پا ستونگ مانگپوجیگی ایمان کھیونگس، یانگ کھونگ تشانگمے حضرت مُوسیٰؔ سی شریعت گونلا سنینگی تھیلنے چیسپا چوروگ۔

²¹ کھونگونی، نیرانگی یہُودی مانکھان گُونی ٹوا دوگکھانّی یہُودی پا تشانگمالا حضرت مُوسیٰؔ سی شریعت گون میثونگچیس یانگ بُوژا گُونلا لقپہ ہلژخمہ میچوچیس یا یہُودی پے لوگثولگون کھا مینیانچیس گُون لابدوگ زیرتے تشورتوگ۔

²² تا نگاتانگونّی چی چوین؟ نیرانگ یرو سکیودکھانبو کھونگونی تشورچیس تانتان اینوگ۔

²³ نگاجے سامّاراگ نیرانگی اِیبو چوگوس۔ ایکا نگاجا نیامپو خُدے لدُونلا دامچھا چوکھانّی می جی یود۔

²⁴ نیرانگ کھونگون نیامپو بیت المقدِس لا سکیودتے ژانگما چوچیسّی لوگثولّی نانّگا تھوس، یانگ گوریل چوستے ثا ڈاگسچیسّی رین رانگ ماتشاد کھونگونی پھیانگ شول۔ تینے نیرانگی ر گیابگالّا زیرکھانگون لدینبا مانکھان یانگ نیرانگی یہُودی پے شریعت گُون ثونگدوگ زیرتے تشانگمالا گیوسچھین۔

²⁵ ایمان چانّی یہُودی مانکھان گُونلا نگاجے تھاگچادّی سکورلا ایگے ڈِیستے کالپین۔ تے ایگیبوے نانّگا سکونڈاگونلا چھودپا پھولکھانگون، ٹھاق یودکھان یا سکے کِیگستے سادکھانّی شا زا ماگوس، یانگ لوسڈیل نگانپاگونّے تھاگرینگ دُوگوس زیرتے ڈِیستے یود۔“

²⁶ ستینگماجاگا حضرت پولُس تانگ تے میگونّی لوگثول نانگجینلا ژانگما چوستے ستینگنے حضرت پولُس کھونگون نیامپو بیت المقدِس سی نانّگا سکیودتے ژانگما چوچیس تشارتے کھونگونی رانگرانگی پھیا چھودپا پھول نیانچیسّی جاگپو اِمام گُونلا شادّا زادس۔

حضرت پولُس زومس۔

²⁷ جاگ ردون تشانگکیس یود زانے حضرت پولُس بیت المقدِس لا تھونگکھانّی آسیہ پے یہُودی پا کھاچیگی میمانگسّی نانّگا ہیلینگس پھینگستے کھونگ زومس۔

²⁸ تے اسیاپاگونّی کُوچو تانگستے زیرس، ”بنی اِسرائیل پاگون نگاجا روگس چوس۔ اینّا موبوے کارونگسا تشانگمالا نگاتانگون، نگاتانگی شریعت تانگ ای بیت المقدِس سی گیابگالّا لابجا تانگچیس، ماتشاد یہُودی مانکھان گُون نگاتانگی بیت المقدِس لا کھیونگستے ای ہلژخمہ ناسّابو تشیتو چوس۔“

²⁹ (کھونگونی سنگونلا گیالسے نانّگا حضرت پولُس اِفسُس پا ترُفِمُس یہُودی مانکھان بُو نیامپو تھونگتے، کھوے تانتان ای میبو بیت المقدِس لا کھیرتے یودڈو سام پاسانگ تیزوگ زیرس)۔

³⁰ تینے گیالسا گانگپوے نانّگا ہیلینگس جوگس، یانگ میتشانگما گیُوگستے یونگستے دزومس۔ کھونگونی حضرت پولُس زومستے بیت المقدِس سی نانگنے ٹُودین پھیلوگا کھیرتے، تینّامالّا بیت المقدِس سی گھوگون چوگس۔

³¹ کھونگونی حضرت پولُس سادچیس چوین یود زانے، رومی ماگستونگی سپونبوا یروشالیم گانگپوے نانّگا ہیلینگس بینگتوگ زیرتے تشور۔

³² کھو تینّامالّا ماگمی تانگ گیاسپون گُون ٹھیدتے میتشوگس یودسا گیُوگستے سونگ۔ تے ماگستونگی سپونبو تانگ ماگمیگون یونّگا تھونگتے، میتشوگسّی حضرت پولُس لا ردونگچیس بان چوس۔

³³ ماگستونگی سپونبو حضرت پولُسی لدُونلا یونگس، یانگ کھونگ زومستے لچاگتھاگ نیس نیامپو لدامچیسلا کا تانگس۔ یانگ کھوے ای میبو سو اینوگ چی سکیون چوستوگ؟ زیرتے ٹیس۔

³⁴ میتشوگسّی نانگنے کھاچیگی سپیرا چیگ یانگ کھاچیگی یانگسپیرا چیگ زیرس۔ ہیلینگسّی جاستے ماگستونگی سپونبوا لدینبا گانگپو ہاگو ماتھوبپا، حضرت پولُس ماگمی کیلے نانّگا کھیر زیرتے کا تانگس۔

³⁵ حضرت پولُس ثاسکیکا لیبّاچیگ، میتشوگسلا رثو ثانٹے یونّگا تھونگتے ماگمیگونّی کھونگ کھُورتے کھیرس۔

³⁶ حضرت پولُسی گیابنے یونگسکھانّی میمانگسّی کُوچو تانگین، ”کھو سود، کھو سود“ زیرس۔

حضرت پولُسی میتشوگسلا سپیرا سالس۔

³⁷ حضرت پولُس کیلے نانگکوگا کھیرین یود زانے کھونگی ماگستونگی سپونبوا مولس، ”نگے نیرانّگا سپیراجیگ زیرنا ڈیگّا؟“ ماگستونگی سپونبوے حضرت پولُس لا ٹیس، ”کھیورانّگا یُونانی سکاد شیسّادّا؟

³⁸ توسبانشیگی سنگونلا رومی گیالپوا نگولوگ چوستے ستانشیگ ستونگ جی ریستونّگا ٹھیدتے کھیرکھانّی مصر پابو کھورانگ مانّا؟“

³⁹ حضرت پولُسی مولس، ”مان، نگا یہُودی پا کِلِکیہ پے یولجونگسّی ما کھاگچان گیالسا تَرسُس سی یولمی جیگ این۔ جوجو نگا ای میگونلا سپیرا زیرچیسّی گونگسپا سال۔“

⁴⁰ ماگسپونّے گونگسپا تھوبستے حضرت پولُس ثاسکیکا لانگستے میتشوگسلا چوبچادچیسلا لاگپا نیامپو ستاگس چوس۔ میتشوگس چوبچادّاچیگ، کھونگی عِبرانی سکادّی نانّگا مولچیس گوزوگ۔