ཆག༌ལས༌གུན༌ 2 - New Testament in Ladakhi Langage

تادپاچانگونّیکا ہلژخمہ رُوح پھابس۔

¹ پینتیکوسّی توسچھینّی جاگّا کھونگ تشانگما کھانگپاجیگی نانّگا دزومستے یود زانے

² ہونمیدلا نامکھانے لونگراگ ٹاگپوے سکاد تسوگشیگ یونگستے کھونگ تشانگما دزومستے یودکھانّی کھانگپابو گانگ۔

³ تینے کھونگونلا میے میلجاب مانگپو لچےژوگس تھونگ کاگون سوسو بیستے کھونگ ریریکا بابس۔

⁴ کھونگ تشانگما ہلژخمہ رُوح بوے گانگ یانگ رُوح بوے کھونگونلا کھیود سالچیسپوے، کھونگونی سکاد سوسوے نانّگا سپیرا تانگچیس گوزوگ۔

⁵ تےتوسلا خُدا ایمان چوکھانّی یہُودی پاگون دُنیائی چھوگس تشانگمانے یونگستے، یروشالیمّا زومتے یودپین۔

⁶ تے سکادگون تشورّاتانگ می مانگپو دزوم، یانگ تشانگما ہالاستے ہانڈانگ سونگ چیازیرنا کھونگ تشانگمے رانگرانگی یولّی سکادّی نانّگا لوبٹوگسگونّی سپیرا تانگین تشور۔

⁷ ماثانٹے ہالاستے کھونگونی چیگ تانگ چیگّا زیرس، ”نیونشیگ، ای سپیرا تانگکھان تشانگما گلِیل پا مانوگا؟

⁸ تینے کازوگی کھونگونی نگاتانگی سکیکھانی یول سوسوے سکادّی نانّگا سپیرا تانگین تشورّانوگ۔

⁹ نگاتانگونّی ٹوا پارتھاپا، میدییاپا، ایلام پا، مسوپتامیہ پا، یہُودیہ پا، کپَّدُکیہ پا، پُنطُس پا، آسیہ پا،

¹⁰ فروگیہ پا، پمفیلیہ پا، مصر پا، کیرینّی نیمو یودکھانّی لیبیاپا، رومپا بیسپا،

¹¹ (یہُودی پا تانگ یہُودی پے چھوسلا ایمان کھیونگکھان یہُودی مانکھان گُون) یانگ کریتے پا تانگ ارابیاپا گُون یودتے مانوگا؟ اِین نانگ نگاتانگونلا ای میگونّی نگاتانگ رانگی سکادّی نانّگا خُدے معجزہ چھاگلاس گُون شادین تشورین اینوگ۔“

¹² تے تشانگما ہالاستے تھے تشومس سونگتے چیگ تانگ چیگّا، ”ای ناسلوگی دُونبو چی اینوگ؟“ زیرین ٹیس۔

¹³ جان کھاچیگی ٹھیلگود تانگین زیرس، ”اِیگون چھانگ مانگپو تھونگستے راروستے اینوگ۔“

رسُول حضرت پطرؔس سی میتشوگسلا ہاگوچوگّا زادس۔

¹⁴ تینے حضرت پطرؔس رسُول چوگشیک نیامپو میتشوگسّی لدُونلا سکیودتے سکاد چھینموے نانّگا مولس، یہُودی پا تانگ یروشالیمّا دُوگکھان گُون نگے زیرچیسچانبوا گیالّا چوستے نیونشیگ۔ ای جُونگکھانگون نگے کھیوجا ہاگوچُوگین،

¹⁵ کھیوجے ای میگون راروستے اینوگ سامکھانبو ٹانگپو مانوگ، ستوسشیگّانگ نگاتوگی چھوتشود رگُوپا مانے چھا میدوگ۔

¹⁶ اِین نانگ توس مانگپوے سنگونلا اِیبوے سکورلا پیغمبر یوایلّی مولس،

¹⁷ خُدے مولس، تھامے توسلا نگے نگارانگی رُوح می تشانگمیکا لُوگین، یانگ کھیوجے بُوژا تانگ بومو گُونی لونگستان شادین۔ کھیوجے جونّوگونّی ژالزیگس تھونگین، یانگ کھیوجے رگادپوگونلا نییلام تھونگین۔

¹⁸ یانگ نگے تینّا توسلا نگے یوگپو تانگ یوگمو گونّیکانگ نگارانگی رُوح لُوگین، یانگ تیگونّی لونگستان شادین۔

¹⁹ نگے نامکھے نانّگا معجزہ لاس تانگ دُنیائیکا ستاگس گُون ستانین، تیگون ٹھاق، میے تانگ تُوتپا گُون این۔

²⁰ مسیح تے جاگ کھاگچان سپالچانبو جونگی سانگ سنگونلا نیما مونڈیگ چھین یانگ لزاوا ٹھاق ژوگس مارپو گیورین۔

²¹ اِین نانگ مسیح کا ایمان کھیونگکھان تشانگما تھارپا تھوبین۔

²² تا کھیوجا بنی اِسرائیل پا گون نگے سپیرا نیونشیگ۔ کھیوجاگونلا رگیُوس اینوگ خُدے حضرت عیسیٰ سی گیُودتے معجزہ لاس، زادپا تانگ ستاکس گُون زادتے کھونگی حضرت عیسیٰ سی ناصرة پا، کالا زادتے اینکھانبو ستانّا زادس۔

²³ خُدے جُونگچیسچانگون کھیینتے کھونگرانگی تھابس نانگجین حضرت عیسیٰ سی کھیوجاگونّی لاگا ستادچوگس یانگ خُدے شریعت کھا مانیانکھانگونّی روگس نیامپو کھیوجاگونّی کھونگ کیانگشینگیکا کیانگچوگستے سادس۔

²⁴ اِین نانگ خُدے کھونگ شیتے ردوگنگالّی نانّگا لوس ماشوگا سونتیا لانّگا زادس، چیاجونا شیچیسّی وانگی کھونگ زومستے مانے بور مینیان۔

²⁵ شوقبُو بوے نانّگا گیالپو داؤد ّی مسیح سکورلا مولدوگ، ”نگا تھونگ، مسیح نگے لدُونلا توسگیون جُوگستے دوگ۔ کھونگ نگا روگس زادّا نگا نیامپو جوگس پاسانگ نگا چانگ جیگسگوس مید۔

²⁶ تینّابویپھیا نگے سیمس تھادپو این، یانگ نگے لچے نیرانّگا ستودپا پھولّاد۔ ماتشاد جیدے نیامپو نگے زوگسپوانگ ریوا یود،

²⁷ چیازیرنا نیرانگی نگے سیمسنیدپو شیکھانگونّی ٹوا پھانگستے بورّا میزاد، یا نیرانگ ای ہلژخمہ ژابستوگپابو رُول چوگّا میزاد۔

²⁸ نیرانگی نگا سونتے لانگچیسّی لامبو ستانّا زاد، نیرانگ نگا نیامپو جوگشیسپے، نگا گاموے گانگ۔“

²⁹ یہُودی پے فونو گون، نگاتانگی اتا اپو گیالپو داؤد شی، جنازہ بو قبرستان سوبس یانگ کھونگی قبرستان بو داگسانگ نگاتانگی ٹوا یودکھانبو نگے تانتان زیر تھوبچیسراگ۔

³⁰ اِین نانگ کھونگ پیغمبر اینپین، یانگ خُدے کھونگ نیامپو وعدہ زادکھان نانگجین کھونگی اولاد نے چیگ کھونگی تخت پیکھہ ستاگّا زادچیسپوانگ گیُوس یودپین۔

³¹ گیالپو داؤد ّی یونگچیسچانّی توسّی نانّگا جونگچیسگون تھونگتے مسیحا شیکھانگونّی ٹونے سونتیا لانّگا زادچیسپو لونگستان شادتے مولس، ”کھونگ شیکھانگونّی ٹوا پھانگستے بورّا مازادس، یا کھونگی سکوشا رُول ماچوگس۔“

³² ”تینّا حضرت عیسیٰ، خُدے سونتیا لانّگا زادس، نگاجا گُونی تیبو گواہ تانّگاد۔

³³ کھو نگا خُدے چھاگ یوسپا دوگچیسّی سپال تھوب، یانگ یاب خُدے وعدہ زادکھانّی ہلژخمہ رُوح سالّا زادکھانبو حضرت عیسیٰ سی نگاجا تشانگمالانگ سالّا زادِین اینوگ، یانگ تیبو کھیوجے داگسا تھونگین یانگ تشورین اینوگ۔“

^34-35 گیالپو داؤد نامکھا ماکھیرنانگ کھوے مولس، خُدے نگے مسیحا مولس، نگے کھیرانگی ڈاو تشانگما، کھیرانگی کانگپے یوگا بوربور تشوگپا، کھیرانگ نگے لاگپا یاسپے ٹھیسّیکا دوگ۔

³⁶ تینّابویپھیا بنی اِسرائیل پا تشانگمالا تانتان ہاگوگوس۔ تینّا حضرت عیسیٰ سی کا بو کھیوجاگونّی کیانگشینگا کیانگس، خُدے کھونگ کھونگی لدامّا زادکھانّی مسیحا تانگ مسیح نیسکو زادس۔

³⁷ حضرت پطرؔس سی سپیراگون تشورّاچیگ کھونگون سنیینّگا دا زوگکھان جوگس سکیومو سونگتے، کھونگونی حضرت پطرؔس تانگ جان رسُول گُونلا جوس، ” فونو گون، نگاجے چی چوگوس؟“

³⁸ حضرت پطرؔس سی لانسالس، کھیوجے دِیگپاگونلا مُعافی تھوبچیسّی پھیا رانگرانگی سدیگپیکا گیودپا چوستے حضرت عیسیٰ مسیح مِنتخسی نانّگا غوتا لین۔ تینے کھیوجاگونلا ہلژخمہ رُوح بوے برکت تھوبین۔

³⁹ ای وعدہ بو کھیوجا، کھیوجے اولاد تانگ یہُودی مانکھان گُونی پھیا اینوگ، کاگونلا نگاتانگی خُدے کھونگی می گیورچیسلا بودّا زادس۔

⁴⁰ تینے حضرت پطرؔس سی لابجا مانگپو سالین سپانگپُھودے سنینگنے جُووا پھولین مولس، ”ای میرابس نگانپا پھوگچیسّی چھادپانے کھیوجارانگون سکیوبشیگ۔“

⁴¹ کھوے چھوس شادکھانبوا ایمان چوکھانگونّی غوتا لینس، یانگ تے جاگّا مسیح کا ایمان چوکھان ستونگ سوم زودچیگ عبادت خانہے ٹوا تھیا زادس۔

ایمان چانگونّی ڈیل چوچیس۔

⁴² کھونگون رسُول گُونی لابجا لینچیس، ڈیل چوچیس، کھارجی گوستے زاچیس (کابوے نانّگا حضرت عیسیٰ مسیح ایدتو چوین دونتانگ دونچیس) تانگ دُعا جوچیس گُون ما کھاگچان سامستے توسگیون دزومّادپین۔

⁴³ رسُول گُونی معجزہ تانگ ستاس مانگپو ستانّا زادچیسپوے می تشانگمے، جیگسّی نانّگا خُدا سیوا زادس۔

⁴⁴ ایمان چان تشانگما لان مانگپو دزومستے، چیتشانگما چیگ تانگ چیگ نیامپو گوادپین۔

⁴⁵ یودکھانّی نورگون تسونگستے گھوسدوم یودکھانگونلا گوستے تانّگادپین۔

⁴⁶ کھونگون جاگدانگ بیت المقدِس سی گیانگسکورّی نانّگا دزومّادپین۔ کھانگپاگونّی نانّگا مسیح ایدتو چوین دونکیر چاگستے گامو تانگ تھادپو نیامپو سنینگ پھیستے تشانگما نیامپو گوستے زین،

⁴⁷ خُدا ستودپا پھولّادپین۔ یانگ کھونگونی می تشانگمے چھوگسّکیور تھوبچیسلا تھادپو چوس۔ حضرت عیسیٰ مسیح تھارپا تھوبکھانگونّی ٹانگسکا جاگپاسانگجاگ پھیل چوگّا زادس۔