ཆག༌ལས༌གུན༌ 19 - New Testament in Ladakhi Langage

اِفسُس سی نانّگا حضرت پولُس۔

¹ اُپلّوؔس کرِنتُھس گیالسے نانّگا یود زانے، حضرت پولُس آسیہ یولجونگسّی نانگکوگی لامگون گیُودتے اِفسُس لا لیب، تیرو کھونّگا لوبٹوگس کھاچیگ تھوگ۔

² حضرت پولُسی کھونگونلا ٹیس، ”کھیوجے ایمان چواچیگ کھیوجیکا ہلژخمہ رُوح بابسّا؟“ کھونگونی لانتانگس، ”نگاجا ماتھوبلے، نگاجا ہلژخمہ رُوح بوے سکورلا تشور کھورانگ ماتشورلے۔“

³ تینے حضرت پولُسی ٹیس، ”کھیوجاگونّی کازوگ غوتا شیگ لینپین۔“ کھونگونی لانتانگس، ”یوحنّانی غوتا۔“

⁴ حضرت پولُسی مولس، ”یوحنّانی غوتا سالکھانبو نی گیودپا چوچیسّی پھیا اینوگ، کھونگی میگونلا، کھونگی ستینگنے سکیودچیسچانبویکا ایمان چوچیسلا مولس، کا بو نی حضرت عیسیٰ اینوگ۔“

⁵ تیبو تشورتے کھونگونی حضرت عیسیٰ مسیح مِنتخسی نانّگا غوتا لینس۔

⁶ حضرت پولُسی کھونگونی گویکا چھاگ بورّاچیگ، کھونگ تشانگمیکا ہلژخمہ رُوح بابس۔ کھونگونی سکاد سوسوے نانّگا سپیرا تانگس یانگ لونگستان شادس۔

⁷ کھونگونی ٹانگسکا ہالام چوگنییس یودپین۔

⁸ حضرت پولُس یہُودی پے مجلِسی نانّگا سکیودتے ہالام لزاوا سوم، ما ہامپا نیامپو چھوسشادتے خُدے گیالثیدّی سکورلا نیانکھانگونّی ایمان کھیونگنیانچیسّی ڈولدور چوا زادس۔

⁹ اِین نانگ کھاچیگی سیمس ما سکیونگپو چوستے ایمان کھیونگچیسلا ماتھاد، یانگ میمانگسّی لدُونلا مسیح لامیکا ڈولکھانگونّی سکورلا سپیرا نگانپا مانگپو زیرس۔ تیبویپھیا حضرت پولُس کھونگون بورتے لوبٹوگسگون کھونگرانگ نیامپو ٹھیدتے کھیرس، یانگ لوبجونگ چوسے ناسّا تیرّانّوسّی نانّگا جاگدانگ ڈولدور زادّادپین۔

¹⁰ تے ڈولدورّی تشیرکابو ہالام لو نیس تشوگپا ڈولپا، آسیہ یولجونگسّی نانّگا دوگکھانّی یہُودی پا تانگ یُونانی گُونلا مسیح کا تشور۔

¹¹ خُدے حضرت پولُس گیُودتے ما معجزہ گون زادّادپین۔

¹² سپیرنا حضرت پولُسی چھاگ تھوگکھانّی چھاگپھیس یا کوسلاگ می زُومو یونگکھانگونّی تھوگنا زُومو گیالچیس یانگ ردود جُوگستے یودکھانگون بینگتے چھادپین۔

¹³ ڈونگکھیرنے ڈونگکھیرلا ردود جوگسکھانگون پھینّگالا چھاکھانّی یہُودی پا کھاچیگی حضرت عیسیٰ سی تشان کولتے ردودگون پھینگچیسّی سونڈوس چوستے زیرس، ”حضرت پولُسی چھوس شادکھانّی حضرت عیسیٰ مسیح مِنتخسی نانّگا بینگتے چھاچیسلا نگے کاتانّگاد۔“

¹⁴ یہُودی پے اِمام کُنی چھونمو سکیوا زیرکھانّی بُوژا ردونکوے تیزوگ چوادپین۔

¹⁵ اِین نانگ جاگشیگ ردود پوے کھونگونلا زیرس، ”نگا حضرت عیسیٰ سی شیسّاد، یانگ حضرت پولُس سانگ، اِین نانگ کھیرانگّون سو این۔“

¹⁶ تینے تے ردود ژوگسکھانّی میبو کھونگّونّیکا لچیبس، کھونگونی سانگ وانگچھیا سونگتے کھونگونلا ثانٹے ردونگسپا کھونگون ٹھاق بینگین لجیرنیالّا تے کھانگپانے شور۔

¹⁷ تے ناتشولبو اِفسُس سی نانّگا یودکھانّی یہُودی پا تانگ یُونانی گُونلا گیوسچھاچیگ، کھونگونی حضرت عیسیٰ مسیح جیگسّی نانّگا، کھونگی ژانلا سیوا ٹاگپو تانگس۔

¹⁸ ایمان کھیونگکھانّی می مانگپو یونگستے رانگرانگی لاس نگانپاگون می تشانگمے لدُونلا شادتے گیودپا چوس۔

¹⁹ یانگ جادُو چوکھانگونّی رانگی نگانپا جادوی شوقبُو گُون کھیونگستے می تشانگمے لدُونلا میا توگس، تے سپیچھاگونّی رینتشادپو سیسپا، مولّی گیرمو ستونگ نابچو بینگ۔

²⁰ تیبوے جاستے مسیح کا کارونگسا پھیل یانگ ڈاسبو ٹاگپو سمین۔

²¹ تے تشانگما جُونگستے ستینگنے حضرت پولُسی مکدنیہ تانگ اخیہ یول گُون گیُودتے یروشالیمّا چھاچیسلا تھاگچادس، یانگ کھونگی مولس، ”تیرو دُوگستے ستینگنے نگا رومّانگ چھاگوس۔“

²² حضرت پولُسی کھونگی ٹوپا تِیمُتھیُس تانگ اِراستُس گُون مکدنیہ لامچوگس یانگ کھونگرانگ آسیہ نانّگا توسبانشیگ جوگس۔

اِفسُس سی نانّگا ہیلینگس بینگ۔

²³ تینّا توسلا اِفسُس سی نانّگا مسیح لامیکا ڈولکھانّی گیابگالّا ما ہیلینگس ثانٹے پھینگس۔

²⁴ دیمیترِیُس زیرکھانّی سیرگار کابوے ارتمِس بیت المقدِس سی زوگون مولّا چوستے تسونّگادپین۔ کھوے تشونگبو گیالّا ڈولپا، لاسمی زوپا مانگپوجیگ لاسّی پھیا بورتے یودپین۔

²⁵ کھوے رانگی ٹوپا زوپا تشانگما یانگ تشونگ تانگ ڈیلتے یودکھانّی میگون بودتے زیرس، ”لاسچیدپا ٹوپاگون، ای لاسپو گیُودتے نگاتانّگا یونگو مانگپو یودکھانبو کھیوجاگونلا گیوس اینّوگ۔

²⁶ اِین نانگ کھیوجاگونّی تھونگین یانگ تشورین اینوگ، تے می حضرت پولُسی اِفسُس ماتشاد آسیہ یول گانگپوے نانّگا می لاگپانے چوسکھانّی سکونڈاگون لدینبے خُدے مانوگ زیرتے می مانگپوا کھوے شادکھانبویکا ایمان کھیونگچوگس۔“

²⁷ کھوے تارُوانگ زیرس ”میگونّی نگاتانگی زولاسپوا کُوسپا چوچیسپو پھانگچیسّی جیگسپا ماتشاد، جیگسپو ارتمِسّی لاموے بیت المقدِس سی سکورلانگ سپیرا سوگپوگون زیرین۔ یانگ آسیہ مانپا، دُنیا گانگپوے نانّگا ای لاموبوا چولکھانگونّیانگ کھونّگا خُدے تسوگسلا سیوا می تانگ۔“

²⁸ تے تشانگما تشورّاچیگ زولاسپاگونلا ماثانٹے ثو یونگستے کُوچو تانگین زیرس، ”اِفسُس پے لامو ارتمِس ما جیگسپو این۔“

²⁹ تھونگین تھونگین تانگ گیالسا گانگپوے نانّگا ناسلوگ سوگپو سونگ، میگونّی مکدنیہ پا حضرت پولُسی بیسّی ٹوپا گیُس تانگ ارِسترخُس زومستے ٹُودین میگون دزومسّے ناسّا کھیرس۔

³⁰ حضرت پولُس سانگ میتشوگسّی ٹوا سکیودنیین یودپین، اِین نانگ لوبٹوگسگونّی گاگستے سکیود ماچوگس۔

³¹ یانگ حضرت پولُسی دزاو، تے گیالکھاگی سپونبو کھاچیگیانگ کھونّگا میتشوگس دزومسّا ماسکیود زیرتے جُووا پھولین لون کالس۔

³² میتشوگسّی نانّگا ہیلینگس چھینمو بینگ، می سوسوے سپیرا سوسو زیرین کُوچو تانّگادپین، یانگ مانگچھیابوا کھونگون تیرو چیپھیا یونگستے اینکھانبوانگ گیُوس میدپین۔

³³ تے ناسلوگپو ہاگوچوگچیسلا یہُودی پاگونّی اسکندریہ میتشوگسّی لدُونلا ریلس۔ کھوے میگونلا چوبچادچیسلا ستاگس چوستے سپیرا زیرچیسّی سونڈوس چوس۔

³⁴ اِین نانگ میگونّی کھو یہُودی پا، ارتمِس لا ماسیکھان اینکھانبو نگوشیسّاچیگ، می تشانگمے چیگ سونگتے چھوتشود نیس زام کُوچو تانگین زیرس، ”اِفسُس پے لامو ارتمِس جیگسپو این۔“

³⁵ اِین نانگ گیالسے سپونبوبوے، میتشوگسپوا چوبچادچوگنیان یانگ زیرس، ”اِفسُس پاگون، اِفسُس سی گیالسا، لامو ارتمِسّی بیت المقدِس تانگ نامکھانے بابسکھانّی کھونگی سکونڈا ثونگکھان اینکھانبو تشانگمالا گیوس اینّوگ۔

³⁶ تے دینباگونلا سوجیگیانگ گیابگال چومینیانچیسپوے، کھیوجا تشانگما چوبچادتے دوگشیگ یانگ رینگیوگسّی نانّگا سامبا میدکھانّی لاس ماچوشیگ۔

³⁷ کھیوجے زومستے ایکا کھیونگکھانگونّی نگاتی لاموا تتلوکما چوستوگ یا کھونگی بیت المقدِس ما چومستوگ۔“

³⁸ ”کالتیس سیرگار دیمیترِیُس تانگ کھوے ٹوپا زوپاگونّی کھونگونی شریعت چاگستوگ سامّادنا، ٹھیمسکھونگ پھیستے شخ چوکان گُون یودتے اینوگ، تیرو کھونگونی گیابگالّا شاگس تانگ نیانچیس اینوگ۔

³⁹ کالتیس کھیوجاگونلا کھونگونی گیابگالّا جانیانگ سکیون رجود یودنا تیگونّانگ تے شخ چوکان گونّی تھاگچاد نیانچیس اینوگ۔

⁴⁰ دیرینگ جونگکھان تشانگمے ستینگنے رومپے وانگثولپے نگاتانّگا ہیلینگس بینگچوگچیسلا نیادگال کالچیسّی جیگسپا اینوگ۔ ای ہیلینگس پھینگچیسپوے پھیا چانگ گیونتشان گیالّاجیگ میدپا نگاتانگی چی لانتانگین۔“

⁴¹ تیزوگ زیرتے ستینگنے کھوے تے میتشوگسپو شولچوگس۔