ཆག༌ལས༌གུན༌ 18 - New Testament in Ladakhi Langage

حضرت پولُس کرِنتُھس لا سکیودس۔

¹ تے ستینگنے حضرت پولُس اتھین گیالسانے کرِنتُھس گیالسا سکیودس۔

² تیرو حضرت پولُس لا پُنطُسی نانّگا سکیسکھان، اکوِلہ زیرکھانّی یہُودی پاجیگ تھوگ، کھو کھورانگی ناما پرِسکِلہ نیامپو نگیتھوبچیگرانگ اٹلی یولنے کرِنتُھس گیالسا یونگستے اینپین، چیازیرنا رومی گیالپو کلودیوسّی یہُودی پا تشانگما روم گیالسانے بینگتے چھاگوس زیرتے کا تانگستے اینپین۔

³ اکوِلہ تانگ پرِسکِلہ گُون تسوگسلا حضرت پولُس سانگ کور تسیمسچیسّی لاس زادکھان اینپا، حضرت پولُس کھونگونی کھانگپا جُوگستے کھونگون نیامپو لاس چوس۔

⁴ شابّاد ریمسّی کھونگ یہُودی پے مجلِس لا سکیودتے یہُودی پا تانگ یُونانی گُونلا کھونگی لونبویکا ایمان کھیونگچوگچیسّی سونڈوس چوین کھونگون نیامپو ڈولدور زادّادپین۔

⁵ سیلاس تانگ تِیمُتھیُس مکدنیہ نے لیبّاچیگ، حضرت پولُسی رانگی توس گانگپو چھوس شادین یہُودی پاگونلا حضرت عیسیٰ سی نی خُدے لدامّا زادکھانّی مسیحا اینکھانبوے گواہ تانگچیسّی نانّگا پھودس۔

⁶ اِین نانگ یہُودی پاگونّی حضرت پولُس لا گیابگال چوستے کھونگی سکورلا نگانپا زیرپا کھونگی کھونگرانگی نامزابو ثوگستے کھونگونلا سپانگپودین مولس، ”دِیگپا چوچیسپوے کھیوجا چھادپا پھوگنا کھیوجارانگی سکیون این، نگے مان۔ تانیپھارلا نگا یہُودی مانکھان گُونلا چھوسشادّا چھاد۔“

⁷ تینے کھونگ یہُودی پے مجلِس نے بینگتے خُدا چولکھانّی می طِطُس یوستوس زیرکھانّی کھانگپا سکیودس، کا بو عبادت خانہے لدویکا یودپین۔

⁸ تے عبادت خانہے اُسکیونگ کرِسپُس زیرکھان تانگ کھوے نانگتشانگس گانگپوے مسیح کا ایمان کھیونگس، کھونگون مانپا کرِنتُھس پا مانگپوجیگیانگ حضرت پولُسی چھوس تشورتے ایمان کھیونگس، یانگ غوتا لینس۔

⁹ جاگشیگ ژانلا ژالزیگسشیگی نانّگا حضرت عیسیٰ مسیح حضرت پولُس لا مولس، ”جیگس ماجیگس، چوبچادتے مادوگا چھوس شود۔

¹⁰ نگا کھیرانگ نیامپو یود یانگ سوجیگیانگ کھیورانّگا نودسکیال مینیان، چیازیرنا ای گیالسے نانّگا نگیکا ایمان چوچیسلا نگے می مانگپوجیگ لدامستے یود۔“

¹¹ تیبویپھیا حضرت پولُس تیرو لو چیگ نانگ پھید خُدے حُکم شادین ژوگس۔

¹² گلیو ے زیرکھانبو اخیہ یولجونگسّی کالون ینّی توسلا، حضرت پولُسی گیابگالّا یہُودی پاگون چیگ سونگتے کھونگ زومستے ٹھیمسکھونّگا کھیرس۔

¹³ کھونگونی نیادکالتے زیرس، ”ای می بوے میگونلا خُدا چولچیسّی تیزوگ تشول ریگی لابجا تانگدوگ، کا بو نگاجے شریعتی گیابگال اینوگ۔“

¹⁴ حضرت پولُسی مولچیس چواچیگ، گلیو ے یہُودی پاگونلا زیرس، ”کالتیس ای می بوے رومپے شریعت تانگ گالکھانّی میوسپْا چھونگون یا چھینموجیگ چوستے یودپینّا نگے کھیوجے سکیون رجود چوکھانبو نیانچیسراگپا،

¹⁵ اِین نانگ کھیوجے نیادگالبو نی سپیرا، مینگ تانگ کھیوجارانگی شریعتی سکورلا اینوگ، تیگون کھیوجارانگونّی تھاگچود۔ نگے تے تسوگسگونّیکا ٹھیمسچاد تانّگامید۔“

¹⁶ تیزوگ زیرتے کھوے کھونگون ٹھیمسکھونگنے پھینگستے تانگس۔

¹⁷ تینے کھونگونی عبادت خانہے اُسکیونگ سوستھینیس زیرکھانبو زومستے ٹھیمسکھونگی نانّگا ثانٹے ردونگس، اِین نانگ گلیو ے تیبویکا سنانّگا ماتانگس۔

حضرت پولُس انطاؔکِیہ ا لوگستے سکیودس۔

¹⁸ توسبانشیگ کرِنتُھس لا جُوگستے ستینگنے حضرت پولُسی ایمان چانگونلا ستینگجوگی سلام جُوس تے ٹُھوزینگا ژونتے سیرییا یولجونگسلا سکیودس، کھونگ نیامپو پرِسکِلہ تانگ اکوِلہ یودپین۔ ٹُھوزینگی نانّگا چھیسانگ سنگونلا خُدا کھاچھاد زادتے یودکھانبوے جاستے حضرت پولُسی کنخریہ زیرسے نانّگا کھونگرانگی ثا پاد چھونگون چوستے ڈاگس۔

¹⁹ کھونگون اِفسُس لا لیبّاچیگ حضرت پولُسی، اکوِلہ تانگ پرِسکِلہ تشوے تھاما بورس یانگ کھونگ یہُودی پے مجلِس لا سکیودتے یہُودی پاگون نیامپو شوقبُو بوے سکورلا ڈولدور زادس۔

²⁰ کھونگونی حضرت پولُس لا تارُونگ مانّگا جوگس زیرتے جُووا پھولسپا، کھونگ ماجوگس۔

²¹ اِین نانگ کھونگ عبادت خانہ نے بینگتے سکیود زانے مولس، ”کالتیس خُدے تھوگّونگس یودنا نگا کھیوجاگون یودسا یانگسکیار یونگین۔“ تینے کھونگ ٹُھوزینگا جونا زادتے اِفسُس نے سکیودس۔

²² تشوے تھامے گیالسا قَیصرؔیہ لیبّاچیگ، کھونگ یروشالیمّا سکیودتے، تیرو یودکھانّی عبادت خانہ تھوگ۔ تینے انطاؔکِیہ گیالسا چھوگسلا سکیودس۔

²³ انطاؔکِیہ ا توسبانشیگ جُوگستے ستینگنے، کھونگ گلَتیہ تانگ فروگیہ گیالکھاگی یول تشانگمالا سکیودتے، لوبٹوگسگونّی ایمان ستانپو چوا زادس۔

²⁴ تینّا توسلا اسکندریہ پا اُپلّوؔس زیرکھانّی یہُودی پاجیگ، اِفسُس لا لیب، کھو گیالّا سیلکھان سپیرا تانّگا کھاسپا یانگ کھوا یہُودی پے شوقبُو بوے نانّگا ہاگو تھارکھییل یودپین۔

²⁵ کھوا مسیح تھارپے لامی سکورلا لابجا تھوبتے سیمسشوگس تانگ ستوبس چھینمو نیامپو حضرت عیسیٰ سی سکورلا شادکھانگون لدینبا اینپین، اِین نانگ کھوا یوحنّانی سالکھانّی غوتا چیگپوے سکور مانے گیوسمیدپین۔

²⁶ کھوے مجلِسی نانّگا خُدے حُکم ما ستوبسشوگس نیامپو شادچیس گوزوگس۔ پرِسکِلہ تانگ اکوِلہ، اُپلّوؔس ّی چھوسشادکھانبو تشورّاچیگ، کھونگونی کھو ازامشیگّا کھیرتے خُدے تھارپے لامی سکور گانگپو تانگ مانّگا سالپو چوستے ہاگوچوگس۔

²⁷ اُپلّوؔس ّی اخیہ سکیودچیسّی دودپا سنگون چوگسپا تیرو یودکھانّی ایمان چانگونّی کھوا چھاچیسلا سپوسپا تانگستے اخیہ یودکھانّی لوبٹوگس گونلا اُپلّوؔس لا گاسوس جوچیسلا ایگے ڈیس۔ تیرو لیبّاچیگ، مسیح شزدے گیُودتے ایمان کھیونگسکھانگونلا کھونگ ما پھانتھوگسچان گیور۔

²⁸ کھونگی میمانگسّی لدُونلا یہُودی پاگونلا، حضرت عیسیٰ سی نی خُدے لدامّا زادکھانّی مسیحا اینکھانبو ہلژخمہ شوقبُو گیُودتے ستانین، کھونگونلا پھامسکالّادپین۔