ཆག༌ལས༌གུན༌ 17 - New Testament in Ladakhi Langage

حضرت پولُس تھسلُنیکے سکیودس۔

¹ تے ستینگنے حضرت پولُس تانگ سیلاس نیسکو امپھیپولیس تانگ اپُلونیہ ڈونگکھیر گُون گیُودتے تھسلُنیکے گیالسا لیب، تیرو یہُودی پے مجلِس جیگ یودپین۔

² حضرت پولُس، کھونگرانگی لوبس نانگجین عبادت خانہے نانّگا سکیودس، یانگ شابّاد سومی جاگّونلا تیرو یودکھانگون نیامپو ہلژخمہ شوقبُو بوے سکورلا ڈولدور زادس۔

³ کھونگی شوقبُو بوے نانگنے مسیحا ردوگنگال نیونگّوشیس تانگ شیکھانگونّی ٹونے سونتیا ژانگسگوشیسپو ہاگوچوگستے تانتان اینکھانبو ستانّا زادس یانگ مولس، ”نگے گواہ تانگکھانّی حضرت عیسیٰ سی نی خُدے لدامّا زادکھانّی مسیحا اینوگ۔“

⁴ یہُودی پا کھاچیگ، یُونانی پے خُدے جیگس تانگ سیوے نانّگا ڈولکھان مانگپو تانگ تے یولّی سیواچان بومو بانشیگیانگ کھونگی چھوسشادکھانبو لدینبا اینکھانبو ہاگوتے حضرت پولُس تانگ سیلاس گُونی ٹوا ڈیس۔

⁵ اِین نانگ یہُودی پاگونلا تشیگچیس یونگستے ٹھومسّی نانّگا کھورین دوگکھانّی می سوگپو بانشیگ لدوستے کھیونگس، یانگ گیالسے نانّگا ہیلینگس پھینگچوگس۔ کھونگونی میتشوگسّی ٹوا کھیونگچیسلا حضرت پولُس تانگ سیلاس گُون ژالین یاسونّی کھانگپا حملہ چوس۔

⁶ کھونگون ماتھوبپا، کھونگونی یاسون تانگ جان فونو(مسیح پا) کھاچیگ گیالسے وانگثولپاگونّی لدُونلا ٹُودین کھیرس، یانگ کُوچو تانگین زیرس ”می نییسّی دُنیا گانگپوے نانّگا ہیلینگس پھینگستے، تا اِیرو نگاتانگی گیالسا لیبستے اینوگ۔

⁷ یاسونّی کھونگون کھورانگی کھانگپے نانّگا دوگچوگس، یانگ حضرت عیسیٰ سی زیرکھانّی جانیانگ گیالپوجیگ یود زیرتے کھونگونی رومی گیالپوے شریعتی گیابگال چوستے اینوگ۔“

⁸ تے سپیرابو تشورّاچیگ میمانگس تانگ یولّی وانگثولپاگونّی نانّگا ہیلینگس شور۔

⁹ یانگ وانگثولپاگونّی یاسون تانگ کھوے ٹوپا ایمان چانگونلا پینے چھادپا چادتے پھودتانگس۔

حضرت پولُس تانگ سیلاس بیریہ گیالسا سکیودس۔

¹⁰ تینّا ژانلا تیرو یودکھانّی ایمان چانگونّی حضرت پولُس تانگ سیلاس بیریہ زیرسے ناسّا لامچوگس۔ تیرو لیبّاچیگ کھونگون یہُودی پے مجلِسی نانّگا سکیودس۔

¹¹ یہُودی پا تھسلُنیکے پاگون ژوگس سنینگ سکیونگپو میدوگپین، چیازیرنا کھونگونی حضرت پولُسی لابجا ما تھادپو نیامپو نیانس۔ یانگ ہلژخمہ شوقبُو گون جاگدانگ سیلتے کھونگی مولکھانگون تانتان اینّوگا مانوگ ستاچیسلا سارچود چوادپین۔

¹² یہُودی پا مانگپو ماتشاد یُونانی بُوژا تانگ بومو سیواچان مانگپوجیگیانگ ایمان کھیونگس۔

¹³ اِین نانگ تھسلُنیکے نانّگا یودکھانّی یہُودی پاگونلا حضرت پولُسی خُدے حُکم بیریہ زیرسے یولّی نانّگا شادّوگ زیرتے تشورّاچیگ، کھونگون تیروانگ سونگتے، حضرت پولُسی گیابگالّا زیرتے میمانگسّی نانّگا ہیلینگس بینگچوگس۔

¹⁴ تینّامالّا تیرو یودکھانّی ایمان چانگونّی حضرت پولُس گیاتشو تھامے ناسّا لامچوگا کھیرس، اِین نانگ سیلاس تانگ تِیمُتھیُس بیریآے نانّگا جوگس۔

¹⁵ حضرت پولُس لامچوگا چھاکھانگون اتھین گیالسا تشوگپا کھونگ لامچوگا سونگ، یانگ سیلاس تانگ تِیمُتھیُس نییسکوا تسامتھوب گیوگسپا حضرت پولُس یودسا یونگچیسلا لون کھورتے لوگستے یونگس۔

اتھینّی نانّگا حضرت پولُسی چھوسشادّا زادس۔

¹⁶ حضرت پولُس اتھینّی نانّگا سیلاس تانگ تِیمُتھیُس پھیا ثونگستے یود زانے تے گیالسابو سکونڈے گنگستے زیگسپا کھونگ تھوگسّکیومو سونگ۔

¹⁷ تیبویپھیا جاگدانگ کھونگی یہُودی پے مجلِسی نانّگا یہُودی پاگون تانگ خُدے جیگس تانگ سیوے نانّگا ڈولکھانّی یُونانی پاگون نیامپو ڈولدور یانگ ٹھومسّی نانّگا یودکھانّی میگونلا چھوسشادّا زادس۔

¹⁸ تیرو ایپیکورپا تانگ ستویکیپا سامتشول سوسویکا ڈولدور چوکھانگونّی حضرت پولُس نیامپو ڈولدور چوچیس گوزوگ چوستے کھاچیگی، ”کھوے چی چھولبے سپیرا زیرّانوگ“ یانگ کھاچیگی، ”کھوے جانما خُداونّی سکورلا شادتے اینتیگدوگ“ زیرس، (چیازیرنا حضرت پولُسی حضرت عیسیٰ تانگ شیکھانگون سونتیا لانگشیسّی سکورلا گاموےناتسُول شادّا زادس)۔

¹⁹ تینے کھونگونی حضرت پولُس ڈیسپے عبادت خانہ اریکوپاس زیرسا ٹھیدتے کھیرس، یانگ کھونّگا زیرس، ”تا نگاجا، کھیرانگی شادکھانّی لابجا سومابوے سکورلا شادّا زاد۔

²⁰ کھیرانگی زیرکھانگون یامتشان سپیراریگ راگ، تیگونّی تونبو نگاجا ہاگونیین راگ۔“

²¹ (اتھینّی یولپا تانگ پھیلوگنے یونگستے تیرو دُوگکھان تشانگمے رانگی توس مانگچھیابو سامبا سوما شادچیس تانگ نیانچیسّی نانّگا پھودّادکیاگ)۔

²² تینے حضرت پولُس اریکوپاس عبادت خانہے ژونّگا جانگستے مولس، ”اتھینپاگون، نگے تھونگچیسلا کھیوجا چیساتھوگنے ما چھوسپا دوگ۔

²³ کھیوجے گیالسے نانّگا ڈول زانے نگا گیالسا گانگپوبو سکونڈا تانگ چھودپا پھولچیسّی قُربان تانگساگون گنگستے تھونگ، یانگ قُربان تانگسا چیگچیگیکا نگا، ’نگوماشیسکھانّی خُدا‘ زیرتے ڈیسکھانجیگ تھونگ۔ کھیوجاگونّی ماشیسّا چولکھانّی تینّا خُدے سکورلا نگے شادین۔“

²⁴ ای دُنیا تانگ تینانّگا یودکھان تشانگما زادکھانّی خُدے، کھونگ سا تانگ نامکھے مسیح جُوگستے اینوگ۔ کھونگ می سیگسکھانّی بیت المقدِس گُونی نانّگا جوگسا مانوگ۔

²⁵ کالتیس می، کھونّگا گھوسدومی نانّگا جابستوگ جوین سامنا، ژو مینیان چیازیرنا کھونّگا گھوسدوم مانے میدکیاگ۔ کھونگی تشانگمالا سروک تانگ میتشے ماتشاد چیتشانگما سالّا زادّانوگ۔

²⁶ کھونگی کھونگرانگی چھاگنے زادکھانّی می چیگنے، ای گیالکھاگ گانگپوے میرگیود تشانگما چونگ چوگّا زادس، ماتشادپے تیگون وانگی نانّگا بوبشیس تانگ لانگچیسّی توس، یانگ دُوگسے ناسّے سانتشامس گُون لدامّا زادس۔

²⁷ میگونّی خُدے ژالنا تھوبچیسلا کھونگی تے تشانگما چوا زادس، اِین نانگ خُدے نی تانتانلا نگاتانگ ریرے نیامپو تھاگرینّگا میدپا اینوگ۔

²⁸ چیاجونا نگاتانگون کھونگی نانّگا ڈولین، میتشے پھودین، سونتیا لوستے اینوگ، کازوگ کھیوجے سومپاپو کھاچیگی زیردوگ، ”نگاتانگون کھونگی ٹھوگو اینوگ۔“

²⁹ نگاتانگون خُدے ٹھوگو این پاسانگ نگاتانگونّی خُدے، می کھیود تانگ سامبا گیُودتے چوسکھانّی سیر یا مول یا ردوے سکونڈا اینوگ سام ماگوس۔

³⁰ سنگونمے توسلا خُدے تے سامبا میدکھانّی لاسگونلا سنانگمید زادس، اِین نانگ تا کھونگی کارونگسا یودکھانّی میتشانگمالا دِیگپا سپانگستے گیودپا چوچیسلا کا سالّا زادس۔

³¹ خُدے لدامّا زادکھانّی جاگّا کھونگی لدامّا زادکھانّی می حضرت عیسیٰ سی گیُودتے دُنیائی می تشانگمیکا شاگس چادین، یانگ شیکھانگونّی ٹونے کھونگ سونتیا لانّگا زادتے میتشانگمالا تیبو ٹانگپو اینکھانبو ستانّا زادس۔

³² شیکھانگونّی ٹونے سونتیا لانگچیسّی سکورلا تشورّاچیگ، کھاچیگی ہابگود تانگس، اِین نانگ کھاچیگی، ”ستینگماجیگ ای سکورلا نگاجا تارُوانگ نیانّیینراگ“ زیرس۔

³³ تے ستینگنے حضرت پولُس کھونگونی ٹونے بینگستے سکیودس۔

³⁴ می کھاچیگی کھونگی لابجا ایمان تے حضرت عیسیٰ مسیح کا ایمان کھیونگس۔ تیٹوا اریکوپاسّی تشوگسپے تھوسمی دیونیسیوس زیرکھان، داماری زیرکھانّی بومو تانگ جانماگون یودپین۔