ཆག༌ལས༌གུན༌ 15 - New Testament in Ladakhi Langage

یروشالیمّی تشوگسدو۔

¹ یہُودیہ یولنے انطاؔکِیہ ا یونگکھانّی می کھاچیگی ایمان چانگونلا، ”کالتیس پیغمبر حضرت مُوسیٰؔ سی شریعت نانگجین کھیوجے بُوژا گُونلا لقپہ ہلژخمہ ماچونا کھیوجاگونلا تھارپا میتھوب“ زیرین لابجا تانگس۔

² یانگ حضرت پولُس تانگ برنباسی کھونگونی لابجے گیابگال چوچیسپوے کھونگون نیامپو ثانٹے زیرزیر سونگ۔ تے عبادت خانہے، حضرت پولُس، برنباس یانگ ایمان چان کھاچیگ یروشالیمّا رسُول تانگ اُسکیونگ گُونی لدُونلا تے لابجے سکورلا سپیرا تانّگا چھاچیسلا لدامس۔

³ عبادت خانہے کھونگون لامچوگس، یانگ کھونگون پھونیشیا تانگ سامریہ یول گُون گیُودتے چھا زانے کھونگونی ایمان چانگونلا یہُودی مانکھان گُونی مسیح کا ایمان کھیونگین یودکھانبو شادس، تیبو تشورتے فونو تشانگما مانگپو تھاد۔

⁴ یروشالیمّا لیبّاچیگ، تیرو یودکھانّی عبادت خانہ، رسُول گُون تانگ اُسکیونگونی کھونگونلا گاسوس جوس۔ خُدے کھونگون گیُودتے زادکھانّی چھاگلاسگونّی سکورلا کھونگی شادّا زادس۔

⁵ اِین نانگ فریسی پا سدے نانگنے اینکھان ایمان چان کھاچیگ لانگستے زیرس، ”ایمان چان یہُودی مانکھان بُوژا گُونلا لقپہ ہلژخمہ چوگوشیس تانگ پیغمبر حضرت مُوسیٰؔ سی شریعت گُون کھانیانگوس۔“

⁶ تینّابویپھیا رسُول تانگ اُسکیونگ گونتے لابجے سکورلا ٹابس زادچیسلا دزومس۔

⁷ مامانگپو ٹابس چوستے ستینگنے حضرت پطرؔس لانگستے کھونگونلا مولس، ” فونو گون کھیوجاگونلا گیوس اینّوگ، توسبانشیگی سنگونلا، گومارانگ یہُودی مانکھان گُونی گاموےناتسُول تشورتے ایمان کھیونگچیسّی پھیا خُدے کھیوجے ٹونے نگا کھونگونلا تبلیغ سلا لدامّا زادس۔

⁸ نگاتانگونّی سیمسّی نانّگا یودکھان تشانگما کھیینّا زادکھانّی خُدے نگاتانگون تسوگسلا یہُودی مانکھان گُونلا ہلژخمہ رُوح سالّا زادتے کھونگونانگ خُدے اینکھانبوے گواہ سالس۔

⁹ خُدے نگاتانگ تانگ کھونگونی نانّگا چانگ کھیاد بورّا مازادس، چیازیرنا ایمان کھیونگچیسپوے کھونگونی سیمس لاگمو زادس۔

¹⁰ تا یہُودی مانکھان لوبٹوگ گُونی سپونگپیکا، نگاتانگ یا نگاتانگی اتا اپو گونّی کھور مانیانکھانّی کھورو لچینتے کالتے کھیوجاگونّی چیا خُدا تھوگسثو سکیودچوگاد؟

¹¹ مان، حضرت عیسیٰ مسیح شزدے گیُودتے نگاتانّگا تھارپا تھوبکھان تسوگسلا کھونگون لانگ تھوبتے اینکھانبوا نگاتانگی ایمان چوانوگ۔“

¹² تینے تیرو دزومسکھانّی میتشانگما چوبچادتے برنباس تانگ حضرت پولُس گیُودتے خُدے یہُودی مانکھان گُونی ٹوا کازوگ معجزہ چھاگلاس تانگ زادپا زادکھانّی سکورلا شادکھانگون نیانس۔

¹³ کھونگونی مول تشارتے ستینگنے یعقُوبؔ ی مولس، ” فونو گون نگے سپیرا نیانّا زاد۔

¹⁴ خُدے گومارانگ یہُودی مانکھان گونّیکا سنینگرجے سکیستے کھونگونی ٹونے کھونگرانگی پھیا میگون لدامّا زادکھانبوے سکورلا شمعُوؔن حضرت پطرؔس سی نگاتانّگا شادّا زادس۔

¹⁵ پیغمبر گونّی لونگستانبو تیبو گیُودتے ڈانڈا ڈوبتے اینوگ، کازوگ شوقبُو بوے نانّگا ڈِیازادتے اینوگ، “

¹⁶ ”تیبوے ستینگنے نگا لوگستے یونگین یانگ گیالپو داؤد ّی گیالثید جیگکھانبو یانگسکیار لانگین جیگکھانگون سیگستے یانگسکیار سوما چوین

¹⁷ تیگون چوچیسّی گیونتشانبو نی لوسکھانّی دُنیائی می گونّی مسیح تسالتھوبچیس یانگ نگے مینگ کھورکھانّی یہُودی مانکھان تشانگمیانگ۔

¹⁸ نگے گومانے پھارلا تے تشانگما سنگون چوگستے این۔“

¹⁹ تینّابویپھیا نگے تھاگچادبو نی، نگاتانگونّی خُدے چھوگسلا سیمس گیورین یودکھانّی یہُودی مانکھان گُونلا کاگسپو تھونگچوگ ماگوس۔

²⁰ اِین نانگ ایگے ڈِیستے کھونگونلا سکونڈاگونلا چھودپا پھولتے تشیتو چھاکھانّی زان میزاچیس، لوسڈیل نگانپاگونّے تھاگرینّگا دوگچیس، سکے کِیگستے سادکھانّی سیمسچانگونّی شا یانگ ٹھاق چانّی شا میزاچیسّی سکورلا سالپو چوستے شادگوس۔

²¹ چیازیرنا حضرت مُوسیٰؔ سی شریعتی نانّگا تیگون سنگون مانے پھارلا گیالسا تشانگمے مجلِس گُونی نانّگا شابّاد ریمسّی میگونّی پھیا سالین اینوگ۔

ایمان چانّی یہُودی مانکھان گُونلا ایگے ڈیس۔

²² تینے رسُول گُون، اُسکیونگون تانگ عبادت خانہ گانگپو دزومستے کھونگونی ٹونے می نیس لدامستے حضرت پولُس تانگ برنباس نیامپو انطاؔکِیہ گیالسا لامچوگچیسلا تھاگچادس۔ تے لدامسکھانگون شریعتی اُسکیونگ بارساباس زیرکھانّی یہُوداؔہ تانگ سیلاس کابو فونو گونی اسکیون انپین۔

²³ کھونگون نیامپو ای چھاگڈیسپو کالس، ”رسُول تانگ اُسکیونگ گُونی چھوگسنے، انطاؔکِیہ گیالسا، سیرییا، کِلِکیہ پے نانّگا یودکھانّی یہُودی مانکھان ّی فونو گونلا جولے۔“

²⁴ ”نگاجے ٹونے نگاجے ماکالکھانّی می کھاچیگ کھیوجے ٹوا لیبتے سپیراریگ زیرتے کھیوجے سیمسلا تھےژومس سکیچوگکھانبو نگاجاتشور۔

²⁵ تینّابویپھیا نگاجا گُونی نگاجے ٹونے می نیس لدامستے نگاجے چیسپا حضرت پولُس تانگ برنباس نیامپو کھیوجاگونّیکا کالچیسلا ٹابس سونگ۔

²⁶ نگاتانگی حضرت عیسیٰ مسیح پھیا برنباس تانگ حضرت پولُس سروک سالچیسلا ماجیگس۔

²⁷ نگاجے ای ایگے نانّگا ڈیسکھانبوے گواہ تانگچیسلا یہُوداؔہ تانگ سیلاس، کھونگون نیامپو کالّاد۔“

²⁸ ”ای سپیرا کھاگچانگون مانپا جانیانگ لچیدچیگ کھیوجاگونّیکا می کالچیسلا ہلژخمہ رُوح تانگ نگاجا گُونی تھاگچادس۔

²⁹ کھیوجے سکونڈاگونلا چھودپا پھولکھانّی زان، یانگ ٹھاق یودکھانّی شا، تانگ سیمسچان سکے کِیگستے سادکھانّی شا مازا، یانگ لوسڈیل نگانپاگونّے تھاگرینّگا دوگشیگ۔ اِیگون کھانیانّا کھیوجا گیالّا چھین، جولے۔“

³⁰ تینے لامچوگسپا کھونگون انطاؔکِیہ گیالساسونگ یانگ تیرو عبادت خانہ گانگپوا بودتے چھاگڈیسپو کھونگونی لاگا تانگس۔

³¹ تے سپوسپاچانّی ایگے سیلپا میگون تھادپو سونگ۔

³² پیغمبر اینکھان یہُوداؔہ تانگ سیلاس گُونی ایمان چانگونلا سپوسپاچانّی لابجا مانگپو سالتے کھونگون ایمانی نانّگا ستانپو گیورچوگّا زادس۔

³³ جاگ کھاچیگی ستینگنے فونو گونّی سیلاس تانگ یہُوداؔہ کھونگ کالکھانّی ٹوپاگون یودسا کھامزانگ لیب چیسلا دُعا جوستے کھونگون لوگستے لامچوگس۔

³⁵ اِین نانگ حضرت پولُس تانگ برنباس انطاؔکِیہ گیالسے نانّگا ژوگس، تیرو کھونگون تانگ جانما مانگپوے، حضرت عیسیٰ مسیح گاموےناتسُول شادین لابجا سالّا زادس۔

حضرت پولُس تانگ برنباس نیسکو بیس۔

³⁶ توسبانشیگی ستینگنے حضرت پولُسی برنباسلا مولس، ”نگاتانگی مسیح کا شادکھانّی ڈونگکھیرگونلا نگاتانگ یانگسکیار سونگتے ایمان چانگونّی ایمانی ناسلوگپو کازوگشیگ دوگ ستینا؟“

³⁷ برنباسی حضرت یُوؔحنّا ٰ کابوا مرقُس سانگ زیرّادپین، کھونگون نیامپو کھیرنیین یودپین۔

³⁸ اِین نانگ حضرت پولُس لا، مرقُس کھونگون نیامپو کھیرچیسپو سامباچانّی لاس مانوگ سام، چیازیرنا کھوے پمفیلیہ نانّگا کھونگون نیامپو لاس چوین مادوگا پھانگستے سونگتے اینپین۔

³⁹ حضرت پولُس تانگ برنباسی نانّگا ثانٹے زیرزیر سونگپا کھونگون سوسو بیگوس، برنباس مرقُس ٹھیدتے ٹُھوزینگا جونتے کُپُرؔس لا سونگ۔

⁴⁰ اِین نانگ حضرت پولُسی سیلاس کھونگ نیامپو کھیرچیسلا لدامس، یانگ ایمان چانگونّی کھونگون خُدے شزدے چھاگّا ستادس۔

⁴¹ حضرت پولُس سیرییا تانگ کِلِکیہ گیُودتے عبادت خانہ گون ستانپو زادِین سکیودس۔