ཆག༌ལས༌གུན༌ 14 - New Testament in Ladakhi Langage

حضرت پولُس تانگ برنباس اِکُنیُما جوگس۔

¹ اِکُنیُمامی نانّگانگ حضرت پولُس تانگ برنباس، لوبس نانگجین یہُودی پے مجلِس گُونی نانّگا سکیودس، یانگ ما کھیودچان چھوسشادپا، یہُودی پا تانگ یہُودی مانکھان مانگپوے ایمان چوس۔

² اِین نانگ ایمان ماکھیونگسکھان یہُودی پاگونّی یہُودی مانکھان گُونلا کھونگی سچودلامّی سکورلا نگانپا زیرتے ثو سکولتے کھونگونی نانّگا ایمان چانگونّی چھوگسلا سیمسنگان سکییچوگس۔

³ تینّابویپھیا حضرت پولُس تانگ برنباس تیرو توس مانگپوجیگ جُوگستے، ما سیمسّتوبس چھینمو نیامپو مسیح شزدے سکورلا شادّا زادس، یانگ حضرت عیسیٰ مسیح کھونگونلا معجزہ ستاس تانگ معجزہ چوچیسّی کھیود سالتے، تے لونبو لدینبا اینکھانبوے گواہ سالّا زادس۔

⁴ اِین نانگ گیالسے میگونّی نانّگا پوبودتے کھاچیگی یہُودی پاگونّی یانگ کھاچیگی رسُول گُونی چھوگس چوس۔

⁵ یہُودی پا، یہُودی مانکھان تانگ کھونگونی اُسکیونگ تشانگمے دزومستے رسُول گُونلا نگانپا چوستے ردوا گیابستے سادچیسّی جوسنگان لدینگس۔

⁶ اِین نانگ حضرت پولُس تانگ برنباسلا تے جوسنگانبوے سکورلا گیوسّونگپا کھونگون تیکانے شورتے لیکاونییا یولجونگسّی لُسترا تانگ دِربے گیالسا یانگ تے نییکھورّی ناسّاگونّی نانّگا سکیودس،

⁷ یانگ کھونگونی تیرو گاموےناتسُول شادس۔

لُسترا تانگ دِربے گیالسا۔

⁸ لُسترا نانّگا ژاوجیگ یودپین، کھو سکیسپانے پارلا ڈول مانیانّا اینپین۔ کھو سیکا دُوگستے

⁹ حضرت پولُسی مولکھانگونلا نیانّادپین۔ حضرت پولُسی کھوا کھاڈانّگا زِیگس یانگ کھوے نانّگا کھو گیالتھوبچیسّی ایمان تھونگتے

¹⁰ کھونگی تے ژاوبوا شیدنانگ مولس، ”رانگی کانگپیکا کواگ لونگس۔“ کھو چھومس یانگ لانگستے ڈولس۔

¹¹ میتشوگسّی حضرت پولُسی چھاگلاسپو تھونّگاچیگ، لیکاونییاپے سکادّی نانّگا کُوچو تانگس، ”خُداون میا زوستے بابستے سکیودتے دوگ۔“

¹² کھونگونی برنباسلا زیُوس یانگ حضرت پولُس لا ہارمیس مینّگا تاگس چیازیرنا حضرت پولُس چھوسشادکھان گاُسکیونگ بُو اینپین۔

¹³ زیُوسی بیت المقدِس گیالسے پھیلوگپویکا یودکھانّی اِمام گُونی مینتوگی سکیچھا تانگ لانگتوجیگ گیالسے گیاسگھویکا ٹھیدتے کھیونگس، چیازیرنا کھو تانگ یولمیگونّی رسُول نییسکوا چھودپا پھولین سام۔

¹⁴ اِین نانگ تیبو حضرت پولُس تانگ برنباس رسُولا تشورّاچیگ، کھونگی رانگی نامزاگون شاگس یانگ میتشوگسّی ٹوا گیوگین سونگتے کُوچو تانگین مولس،

¹⁵ کھیوجے ایزوگ چیا چواد؟ نگاجانگ کھیوجاگون ژوگس می این، نگاجے کھیوجاگونلا گاموےناتسُول شادچیسّی گیونتشانبو نی یتسوگسّی تونمیدّی لاسگون پھانگستے سونپو خُدے چھوگسلا سیمس گیورچیسپو این، کھونگی نامکھا، دُنیا، گیاتشو یانگ تیگونّی نانّگا یودکھان تشانگما زادستے اینوگ۔

¹⁶ بودکھانّی میرابسگونّی نانّگا خُدے گیالکھاگ تشانگما رانگ رانگ تھادسے لامیکا ڈول چوگّا زادس۔

¹⁷ تینیانگ خُدے کھونگون نیامپو کھونگ تانگ کھونگی شزدے یودکھانّی گواہ سالین ژوگس، سپیرنا کھیوجا نامکھانےچھارپا تانگ ستونتھوگ گیالّا، زاچیسلا زان یانگ سیمستھادپوے سکانّگا زادس۔

¹⁸ تے سپیراگون شادتیانگ، کھونگونلا چھودپا پھولچیسنے میتشوگسپوا گھاگچیس ما کاگسپو سونگ۔

¹⁹ تینے انطاؔکِیہ گیالسا تانگ اِکُنیُم نے یونگسکھانّی یہُودی پا کھاچیگی تے یولّی میگون کھورانگونّی چھوگسلا کھیونگستے حضرت پولُس لا ردوا گیابس، یانگ کھونگ شیتے اینوگ سامستے گیالسانے پھیلوگا ٹودتے کھیرس۔

²⁰ اِین نانگ لوبٹوگسگون حضرت پولُسی لدُونلا کھورّاچیگ، کھونگ لانگستے گیالسا لوگستے سکیودس۔ ستینگماجاگپو کھونگ برنباس نیامپو دِربے یولا سکیودس۔

حضرت پولُس تانگ برنباس انطاؔکِیہ ا لوگستے سکیودس۔

²¹ حضرت پولُس تانگ برنباسی دِربے گیالسے نانّگا گاموےناتسُول شادپا می مانگپوجیگی ایمان کھیونگس یانگ لوبٹوک گیور۔ تینے کھونگون لُسترا، اِکُنیُم تانگ انطاؔکِیہ ی گیالساگونلا لوگستے سکیودس۔

²² کھونگونی لوبٹوگس گونلا ایمانی نانّگا ستانپو دوگچیسلا سپوسپا تانگین مولس، ”خُدے گیالثیدّی نانّگا لیبّالا نگاتانّگا سکالاس مانگپوے دونگلین چوگوسین۔“

²³ کھونگ نیسکوے عبادت خانہ تشانگمے نانّگا ایمان چانگونّی پھیا اُسکیونگون لدامّا زادس، یانگ نییناس یانگنا روزا دُوگستے دُعا چوستے کھونگون حضرت عیسیٰ مسیح چھاگّا ستادا زادس کابوے نانّگا کھونگونی ایمان کھیونگس۔

²⁴ تینے کھونگ نیسکو پیسیدیا گیُودتے پمفیلیہ یولّا سکیودس۔

²⁵ کھونگونی پیرگا ڈونگکھیرّی نانّگا گاموےناتسُول شادّا زادتے ستینگنے اتالیی چھوگسلا سکیودس۔

²⁶ تیکانے حضرت پولُس تانگ برنباس ٹُھوزینگا ژونتے انطاؔکِیہ گیالسا لوگستے سکیودس، کارُو ایمان چانگونّی کھونگ نییسکوا لاس چوچیسلا خُدے شزدے چھاگّا ستادا زادتے اینپین، کا بو کھونگونی ڈوبتشارتے اینوگ۔

²⁷ انطاؔکِیہ ا لیبتے کھونگونی عبادت خانہ پو دزومس چوگستے، خُدے کھونگ گیُودتے زادکھانّی لاسگون تانگ یہُودی مانکھان گُونلا ایمان چو چوگّا زادکھانّی سکورگون شادس۔

²⁸ یانگ کھونگون تیرو لوبٹوگسگون نیامپو توسبانشیگ جوگس۔