ཆག༌ལས༌གུན༌ 11 - New Testament in Ladakhi Langage

حضرت پطرؔس سی کھوے لاسگون سالپو ہاگوچوگّا زادس۔

¹ یہُودیہ نانّگا یودکھانّی رسُول گُون تانگ جان فونو گونلا یہُودی مانکھان گونّیانگ خُدے کیکا ایمان کھیونگستوگ زیرتے تشور۔

² حضرت پطرؔس یروشالیمّا لوگستے سکیودّاچیگ، لا لقپہ ہلژخمہ چھوکن کھاچیگی کھونّگا سکیون رجود چوستے زیرس،

³ ”نیرانگ یہُودی مانکھان تشیتوگونّی کھانگپا سونگتے کھونگون نیامپو زان زوستوگ۔“

⁴ تینے حضرت پطرؔس سی جونگکھان تشانگما گونّے جوگ تشوگپا تشیر تشیر تشیرلا کھونگونلا شادس۔

⁵ ”نگے یافا ڈونگکھیرّی نانّگا دُعا جوین یودپین، ہونمیدلا نگا ای ژالزیگسپو تھونگ۔ نامکھانے راس چھینمو تسوگسشیگ ٹو ژیکونے زومستے نگے لدُونلا پھابس۔

⁶ نگے تیبوا تانتان چوستے ستاسپا، تینانّگا ثالکھان تانگ ناگتشوگسّی سیمسچان، بوتسیگ نامینا تشانگس تانگ چاچیو گُون تھونگ۔

⁷ تینے نگا سونگسکادچیگی ’حضرت پطرؔس ، تا لانگستے یگون سادتے زو‘ مولین تشور۔“

⁸ ”نگے زیرپین، ’کیے مسیح مانے میزا، دیرینگ تشوگپا نگے یہُودی پے شریعت ثونگستے یتسوگسّی تشیتو تانگ کھاملوگ زانگون مازوسپین‘۔“

⁹ ”نامکھانے تے سونگسکادپوے لان نیسپا مولس، ’خُدے ژانگما زادکھانگونلا کھیرانگی تشیتو مازیر۔‘

¹⁰ تینّابو تشیر سوم چونگ، تے ستینگنے تے تشانگما لوگستے نامکھا تھینّا زادس۔“

¹¹ ”تینّا توسلا قَیصرؔیہ نے نگا یودسا کالکھانّی مینگّو سوم، نگا ڈانگسا دوگکھانّی کھانگپابوے گھویکا لیب۔

¹² ہلژخمہ رُوح بوے نگا مولس ’ کھیرانگ ای میگون نیامپو تھےژومس میدپا سونگ۔‘ ای ایمان چان فونو ڈوگانگ نگا نیامپو یونگس، یانگ نگاجا گُون نگا بودّا کالکھانّی می بوے کھانگپے نانّگا سونگپین۔

¹³ کھوے نگاجا شادس، کھوا کھورانگی کھانگپے نانّگا خُدے فرشتاجیگ جالتے ’یافا زیرسا میگون لامچوگستے شمعُوؔن حضرت پطرؔس زیرکھانّی میبو یرو بودتے کھیونگ۔

¹⁴ کھوے شادکھانّی لونبوے کھیرانگ تانگ کھیرانگی نانگتشانگس تشانگما تھارپا تھوبین‘ مولّاراگ۔“

¹⁵ ”نگے شادچیس گوزوگ چواچیگ، کھونگّونّیکانگ ہلژخمہ رُوح بابس کازوگی نگاتانگونّیکا گوما بابستے اینپین۔

¹⁶ تینے نگا حضرت عیسیٰ مسیح ’یوحنّانی چھوی غوتا التے اینپین، اِین نانگ کھیوجاگونلا ہلژخمہ رُوح بوے غوتا تھوبین‘ مولکھانبو ایدتو یونگس۔

¹⁷ حضرت عیسیٰ مسیح ا ایمان چوکھان نگاتانگونلا سالکھانّی تینّا برکت پو خُدے کھونگون لانگ سالتے اینّا، تینے خُدا گیابگال چونیانین سامکھان نگا سو اینوگ؟“

¹⁸ سکیون رجود چوکھانگونّی تے سپیراگون تشورّاچیگ، کھونگونی گیابگال چوچیس پھانگستے خُدا ستودپا پھولین زیرس، ”تا ہاگو، گیودپا چوکھانّی یہُودی مانکھان گونلانگ خُدے تھامیدپے میتشے تھوبچیسّی سکابس سالّا زادتے اینوگ۔“

انطاؔکِیہ گیالسے نانّگا یودکھانّی عبادت خانہ۔

¹⁹ حضرت ستِفنُس سادتے ستینگنے ناگس تھونگکھانّی ایمان چانگون شورتے تھاگرینگی یول، پھونیشیا، کُپُرؔس تانگ انطاؔکِیہ گیالسا گُونلا لیب۔ کھونگونی خُدے حُکم یہُودی پاگونلا مانے ماشادس۔

²⁰ اِین نانگ کھونگونی ٹونے کُپُرؔس تانگ کیرین یولنے اینکھان کھاچیگ انطاؔکِیہ گیالسا سونگتے یہُودی مانکھان گُونلا حضرت عیسیٰ مسیح سکورلا گاموےناتسُول شادچیس گوزوگ چوس۔

²¹ مسیح خُدے کھیود کھونگون نیامپو یودپین، یانگ می مانگپوے لونبویکا ایمان کھیونگستے حضرت عیسیٰ مسیح گیابنے ڈانگس۔

²² تے ناتشولبو یروشالیمّا یودکھانّی عبادت خانہے تشور، یانگ کھونگونی برنباس انطاؔکِیہ ا لامچوگس۔

²³ برنباس تیرو لیبّاچیگ، خُدے شزدے تھونگتے تھاد، یانگ کھونگونلا حضرت عیسیٰ مسیح نانّگا ستانپو دوگچیسلا سونڈوس ثانٹے چوچیسّی سپوسپا سالس۔

²⁴ برنباس نیما می زانگپوجیگ، ہلژخمہ رُوح بوے گنگستے ایمان ستانپوچان اینپین۔ کھونگ گیُودتے می مانگپوے حضرت عیسیٰ مسیح نانّگا ایمان کھیونگس۔

²⁵ تینے برنباس حضرت ساؤل ژالّا تَرسُس سی گیالسا سکیودس۔

²⁶ حضرت ساؤل تھوبّاچیگ، کھونگ انطاؔکِیہ ا کھونگرانگ نیامپو کھیونگس۔ تیرو کھونگ نیسکو لو گانگپو عبادت خانہے نانّگا دزومستے می ما مانگپوا حضرت عیسیٰ سی سکورلا لابّا زادس۔ انطاؔکِیہ ی نانّگا گومارانگ مسیح لوبٹوگس گونلا مسیح پا زیرس۔

²⁷ تینّا توسلا پیغمبر کھاچیگ یروشالیم نے بابستے انطاؔکِیہ ا سکیودس۔

²⁸ کھونگونی ٹونے چیگ اگبُس زیرکھانبو لانگستے ہلژخمہ رُوح گیُودتے رومی نگایوگا یودکھانّی یول گانگپوے نانّگا موگے ثانٹے یونگچیسّی لونگستانبو سالس۔ (ای موگیبو رومی گیالپو کلودیوسّی توسلا جُونگستے این)۔

²⁹ لوبٹوگسگونّی رانگرانگی کھیود نانگجین یہُودیہ نانّگا یودکھانّی ایمان چانگونلا پینے روگس چوچیسلا تھاگچادس۔

³⁰ یروشالیمّی شریعت لابکھان گون ی لاگا تانگچیسلا حضرت ساؤل تانگ برنباس نیامپو کھونگونی پینے لدوسکھانبو کالس۔