ཆག༌ལས༌གུན༌ 1 - New Testament in Ladakhi Langageہلژخمہ رُوح بوے وعدہ۔ 1-2 چیسپے تھیُفِلُس نگے ڈیسکھانّی شوقبُو تانگپوے نانّگا، حضرت عیسیٰ مسیح خُدے نامکھا لین لین تشوگپا کھونگی لابجا سالکھان تانگ چھاگلاس زادکھان تشانگمے سکورلا ڈِیستے یود۔ نامکھا لینّا زادّی سانگ سنگونلا، حضرت عیسیٰ سی کھونگرانگی لدامّا زادکھانّی رسُول گُونلا ہلژخمہ رُوح گیُودتے لابجا سالتے اینپین۔ 3 ردوگنگال نامستے ستینگنے حضرت عیسیٰ سی کھونگ سونتیا جانگسکھانّی ستاگس مانگپو کھونگونلا ستانّا زادتے، جاگ 40 کھونگونلا کھونگرانگ سنگون چوگّا زادس یانگ خُدے گیالثیدّی سکورلا شادّا زادس۔ 4 لانچیگ لوبٹوگسگون نیامپو دونتانگ دونّی توس حضرت عیسیٰ سی مولس، ”نگے کھیوجاگونلا زیرکھان نانگجین، نگے یابّی وعدہ زادکھانّی کھیود پو تھوبتھوب تشوگپا کھیوجا یروشالیم نے پھیلوگا ماچھا۔ 5 یوحنّانی میگونلا چھوی غوتا تانگستے اینپین، اِین نانگ جاگ کھاچیگی نانّگا کھیوجاگونلا ہلژخمہ رُوح بوے غوتا تھوبین۔“ خُدے حضرت عیسیٰ سی نامکھا لینّا زادس۔ 6 رسُول گُون حضرت عیسیٰ سی نیامپو زومستے یود زانے کھونگونی زیرس، ”مسیح لے، نیرانگ ای بنی اِسرائیل پاگونلا رومی وانگنے رانگوانگ سالتے نگاتانگی گیالثیدپو لوگستے کھیونگا زادچیسّی توسپو اینّا؟“ 7 حضرت عیسیٰ سی کھونگونلا مولس، ”تے توسّکابس تانگ ناسلوگ گُون لدامّا زادچیسّی وانگبو یاب چیگپوا یودتے اینوگ، یانگ کھیوجا تیگون شیسگوس میدپا اینوگ۔ 8 ہلژخمہ رُوح کھیوجیکا بابسّی توس، کھیوجاگونلا ستوبس تھوبتے کھیوجاگونّی یروشالیم، یہُودیہ یول گانگپو، سامریہ یانگ دُنیا گانگپوے نانّگا نگے گواہ تانگین۔“ 9 تے تشانگما مولتے ستینگنے کھونگونی میگی لدُونلا حضرت عیسیٰ مسیح نامکھا کھیرّا زادتے ثینّی کابّا زادس یانگ کھونگونلا کھونگ جال ماتھوب۔ 10 کھونگونی حضرت عیسیٰ سی نامکھا لینّا زادکھانبوا ستین دُوگستے یود زانے، ہونمیدلا می کوس کارپو گونکھان نیس کھونگونی لدُونلا جُونگستے 11 مولس، ”گلِیل پاگون، چیپھیا نامکھا ستاستے دوگّاد؟ کازوگ کھیوجے حضرت عیسیٰ سی نامکھا لینّا زادکھانبو تھونگ، تینّا تسوگسلا کھونگ یانگسکیار لوگستے سکیودین۔“ یودے تشابسلا رسُول سکوا زادس۔ 12 تے ستینگنے کھونگون ذیتونی ری کانے بابستے یروشالیمّا لوگستے سکیودس، کا بو گیالسانے شابّاد ای جاگ چیگی (کیلومیٹار چیگ) تھاگرینّگا یودپین۔ 13 تیرو لیبّاچیگ، رسُول گُون سنگونلا دُوگستے یودکھانّی کھانگپے سکیانگتھوگّا سونگ۔ کھونگون حضرت پطرؔس ، حضرت یُوؔحنّا ٰ، حضرت یعقُوبؔ ، حضرت اندرؔیاس ، حضرت فِلپُس، حضرت توما، حضرت برتلما، حضرت متّی، حلفئی سی بُوژا حضرت یعقُوبؔ ، حضرت شمعُوؔن یولدادچان تانگ حضرت یعقُوبؔ ی بوژاحضرت یہُودہ گُون اینپین۔ 14 تے رسُول تشانگما سیمس چیگ سونگتے توسگیون دُعا چوالا زومّادپین، جان بومو کھاچیگ، حضرت عیسیٰ سی اما حضرت مریم تانگ، حضرت عیسیٰ سی نوگونّانگ، کھونگون نیامپو زومّادپین۔ 15 لانچیگ فونو (ایمان چانّی می) 120 دزومستے یودی توس، حضرت پطرؔس لانگستے مولس، 16 ” فونو گون کازوگ ہلژخمہ شوقبُو بوے نانّگا ڈِیا زادکھان نانگجین، ہلژخمہ رُوح بوے گیالپو داؤد گیُودتے یودے سکورلا لونگستان شادکھانگون ڈوبگوستے اینوگ، کا بو یہُوداؔہ نی حضرت عیسیٰ سی زومکھانگونّی لامستانپا گیور۔ 17 کھو نگاجے ٹوپا یانگ کھوے نگاجا نیامپو جابستوگ جوستے اینپین۔“ 18 (اینّانگ کھوے لاسنگانبوے رینبوا جینگ جیگ نیوس، یانگ گوے رسا بِستے سیکا بُود، کھوے ٹودپا چھادتے نانگچھا تشانگما بینگ۔ 19 یانگ تیزوگ چونگکھانبو ای یروشالیم پا تشانگما تشور، تے جِنگبوے مینّگا کھونتی سکادّی نانّگا ” اکیلداما“ تاگس، کابوے تونتاق پو ”ٹھاق گی جینگ“ اینوگ)۔ 20 حضرت پطرؔس سی مولس، ”زابوری شوقبُوئ نانّگا ’کھوے کھانگپے نانّگا سوانگ مادوگا نانگستونگ چھاشیگ۔‘ زابوری جانیانگ ناسّاجیگیکا، کھوے وانگثولچیسّی کوسا جانجیگی کھیرین ڈِیازادتے اینوگ۔“ 21-22 ”تیبویپھیا حضرت عیسیٰ مسیح نگاتانگون نیامپو یود زانے (یوحنّانی حضرت عیسیٰ سی غوتاسالّی توسنے کھونگ نامکھا لین لین تشوگپا) توسگیون نگاتانگ نیامپو یودکھان گُونی ٹھونے نگاتانگی، یودے تشابسشیگ لداماگوس۔ سوجیگ لدام نانگ کھو نگاتانگ نیامپو حضرت عیسیٰ سونتیا جانگسکھانّی گواہ گیورگوس“ 23 تینے کھونگونی می نییسّی مینگ لدامّالا کھیونگس، مینگ چیگپو حضرت یُوسفؔ یا بارسابازیرّادپین (کابوا یوستوسّانگ زیرّادپین) یانگ مینگ چیگپوحضرت متّیاہ اینپین۔ 24-25 تینے کھونگونی دُعا جوس، ”کیے مسیح، نیرانگی می تشانگمے سنینگ کھینّانوگ۔ رسُول گُونی لاس پھانگستے اوسپا اینکھانّی نیالوے نانّگا سونگکھانّی یہُوداؔہ تشابسلا، حضرت عیسیٰ سی رسُول تانگ جابستوگ جوچیسّی پھیا ای نیسکوے نانگنے نیرانگی لدامّا زادکھانبو نگاجا ستانّا زاد۔“ 26 رگیان گیابسپا حضرت متّیاہ سی مینگ بینگ، یانگ کھو رسُولی ٹوا ثیس۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation