تیموتھِی ۲ 4 - New Testament in Ladakhi Langage1 خُدے تانگ حضرت عیسیٰ مسیح کھونگرانگی گیالثید سکیونگچیسلا سکیود زانے، کھونگی سونپو تانگ شیکھان نیسکوے ٹھیمسچاد زادِین۔ کھونگ نیسکوے سکوندونلا نگے کھیورانّگا سنینگنے سپانگپودّاد۔ 2 سکابس یودڈو، یا میدڈو، خُدے حُکم گون شادچیسلا ڈالڈیگ دوگ۔ زودپا تانگ لابجا زانگپو نیامپو کھیرانگی میگونلا سکیون رجود چوس، لام ٹانگپو ستون، یانگ سپوسپا تونگ۔ 3 تیزوگ توسشیگ لیباین، میگونّی لدینبا تانگ زانگپوے لابجا گُونلا مانیانّا، کھورانگونّی دودپے گیابنے ڈولین یانگ کھونگی نامچھوگی نیانّیین ڈوکھانگون شادکھانّی گیرگان ریگ ژالین۔ 4 کھونگونی نامچھوگّون دینبانے تھاگرینّگا کھیرتے چوسمی رومسگون چھوگسلا گیورین۔ 5 اِین نانگ تیتسوگسی ناسلوگ تشانگمے نانّگا کھیرانگی شانگ چوستے سالپو سامبا تانگّوشیس اینوگ۔ مسیح پھیا ردوگنگال کھورچیسلا جیگس ماجیگس، جانماگونلا گاموےناتسُول شادچیسّی لاسگون چوس، یانگ کھیورانّگا خُدے چوالا سالکھانّی کھاگ تشانگما چوس۔ 6 نگارانگی سکورلا زیرنا نگے میتشیبو نی، خُدا پھولکھانّی چھوی چھوپھود تسوگسلا پھواینجیگ یود، نگا شیچیسّی توسپو نیموا لیبستے دوگ۔ 7 سالیانگس سیکھانجیگ تسوگسلا، نگیانگ ڈاندور گیالّا چوستے تانگسپین، نگے بانگیوگس تانگ تشارتے این، یانگ نگے ایمان ماپھانّگا ستانپو یود۔ 8 تا ٹانگپوے تھورشوگپو نگے پھیا ثونگستے یود، کا بو ٹھیمسچاد سالکھانّی مسیح ٹانگپوے، کھونگ لوگستے پھیبسشیسّی جاگپوا نگا سالّا زادِین۔ یانگ تے شزدے پو نگارانگ چیگپوا مانپا، کھونگ جالچیسلا ماثانٹے دودپا چھینمو بورکھان تشانگمے پھیانگ۔ حضرت پولُسی ستینگجوگی لابجا۔ 9 تِیمُتھیُس، جوجو یرو گیوگسپا یونگچیسّی سونڈوس چوس۔ 10 فونو دیماسّی ای دُنیائی سکییدپوگونلا چیسپا چوچیسپوے، نگا پھانگستے تھسلُنیکے گیالسا سونگ۔ ٹیسکین نی گلَتیہ یانگ طِطُس نی دالمیدیی یولگونلا سونگتے مید۔ 11 نگا نیامپو لوکا چیگپو یود۔ کھیرانگ یونگ زانے، مرقُس سانگ نیامپو ٹھیدتے کھیونگ، چیازیرنا نگے جابستوگی لاسّی نانّگا کھو ما پھانتھوگسچانجیگ این۔ 12 تُخِکُس نگے اِفسُس سی گیالسا لامچوگسپین۔ 13 کھیرانگ یونگ زانے، تروآسی ڈونگکھیرّی نانّگا یودکھانّی کارپوسّی کھانگپے نانّگا نگے بورتے یودکھانّی کوسپو کھورتے کھیونگ۔ نگے ثیلکھانّی سپیچھانگ کھورتے کھیونگ، میگسالّی رامے پاگسپا چوسکھانگون۔ 14 لچاگسلاس چوکھان الیگزاندیرّی، نگا مانگپو نودپا سکیالس، اِین نانگ کھوے چوکھانگونلا مسیح ٹھیمسچاد سالّا زادِین۔ 15 کھیورانّگانگ کھوے کانے شانگ چوس، چیازیرنا نگاجے لابجاگونلا کھوے ماثانٹے گیابگال چوستے اینپین۔ 16 نگا شخ چوکانی لدُونلا تانگپورانگ ٹھیدتے کھیر زانے، سوجیگّانگ نگا روگسلا مایونگس۔ تشانگمے نگا پھانگستے سونگ۔ خُدے تیگونّیکا سکیون کالا مازادشیگ۔ 17 اِین نانگ نگے گاموےناتسُول گانگپو شادتھوبتے یہُودی مانکھان تشانگمے تشورچیسّی پھیا، مسیح نگا نیامپو جوگسا زادتے نگا شید سالّا زادس۔ یانگ کھونگی سینگیگونلا زاچوگچیسّی چھادپے کانے نگا تھار چوگّا زادس۔ 18 اونا، مسیح نگا نگانپے حملہ چوچیسچان تشانگمے کانے سکیوبستے کھونگرانگی نامکھے گیالثیدّی نانّگا نگا کھامزانگ ٹھیدتے کھیرّا زادِین۔ خُدا تُوسگیُونّے گیُون سروک یودکھان تشانگمے کانے سپال تھوبشیگ، امین۔ حضرت پولُسی ستینگجوگی سلام۔ 19 پرِسکِلہ تانگ کھوے ماگپا اکوِلہ تانگ فونو اُنیسِفُرسی کھانگپے نانّگا دُوگکھان تشانگمالا نگے چھوگسنے سلام زیر۔ 20 اِراستُس کرِنتُھس گیالسا دُوگس، یانگ فونو ترُفِمُسلا زُومو یونگسپا، نگے میلیتُس سی ڈونگکھیرّی نانّگا بورتے یونگسپین۔ 21 گونتوسّی سانگ سنگونلا، یرو یونگچیسّی سونڈوس ثانٹے چوس۔ فونو ایوبولواسّی کھیورانّگا سلام کالدوگ، یانگ تینّا تسوگسلا فونو پھودین، فونو لینوس، سپونمو کلودییا یانگ، جان فونو تشانگمیانگ کھیرانگ سلام جُوروگ۔ 22 مسیح کھیرانگی رُوح نیامپو جُوگسشیگ۔ یانگ کھونگی شزدے کھیوجا تشانگما نیامپو لوسشیگ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation