تیموتھِی ۲ 3 - New Testament in Ladakhi Langage

تھامے جاگّونّی جیگسپاگون۔

¹ تِیمُتھیُس، تھامے جاگّونّی نانّگا ماثانٹے جیگسنانگچانّی توس ریگّانگ یونگچیسپو کھیورانّگا گیُوس یونگّوشیس اینوگ۔

² سپیرنا میگون کھورانگ تانگ کھورانگی پینے گُونلا یاشا چوکھان، رانگستود تانگکھان تانگ پھوسوچان، تامنگان تانگکھان، کھونگرانگونّی پھاماگونّی کھا مانیانکھان، ٹین میڈانکھان تانگ، کھونگونی چیجیگّانگ ہلژخمہ تھیا مانوگ۔

³ چیسپا میدکھان، مُعافی ماتانگکھان، جانماگونّی سچودپے سکورلا نگانپا زیرکھان، رانگسیمسچون مانیانکھان، ناگس ستانّا تھادکھان تانگ، زانگپوے گیابگال چوکھان اینوگ۔

⁴ دزاوگونلا نگولوگ چوکھان، گیوگسپا سامبا ماتانّگا لاس چوکھان، مانگستیانگ پھوسوچان تانگ، خُدے سانگ دُنیائی سکییدپوا یاشا چوکھان یونگین۔

⁵ کھونگونی ستانچیسّی پھیا خُدے سچودلامّی نانّگا ڈولزون تانّگانوگ، اِین نانگ تیبوے کھیود پوے نانّگا ایمان چوا مانوگ۔ تیتسوگسی میگونّے تھاگرینّگا دوگشیگ۔

⁶ تیتسوگسی میگونّی جانماگونّی نانّگا لوکھیل کھیونگستے کھونگونی کھانگپا سونگتے، دِیگپے نونگسّی لچید تانگ دُنیائی جانیانگ دودپے یوگا نانکھانّی بومو وتھوگسگونّی کانے پھانتھوگس لیناین۔

⁷ ( تیتسوگسی بوموگون توسگیون لابجا سوما ریگی ستینگرانگنے چھانوگ، اِین نانگ کھونگونلا لدینبابو مانے ہاگو تھوبّا مانوگ)۔

⁸ یانیس تانگ یامباریس گُونی پیغمبر حضرت مُوسیٰؔ سی گیابگال چوا تسوگسلا، تے میگونّی لدینبے گیابگال چوانوگ۔ تیگونلا سامبا نگانپا تانگ زوسمے ایمان یودتے اینوگ۔

⁹ اِین نانگ کھونگونی مانگپوجیگ یارگیاس میچو، چیازیرنا یانیس تانگ یامباریس گُونی ناسلوگ تسوگسلا، کھونگونی لاسگون سامبا میدکھان اینکھانبو می تشانگمے سالپو چوستے تھونگین ۔

حضرت پولُسی تِیمُتھیُس لا لابجا سالس۔

¹⁰ اِین نانگ تِیمُتھیُس، نگے چی لابّاد، نگے میتشے پھودتشول، چی دونّی پھیا نگے میتشے این، نگے ایمان نگے زودپا، نگے چیسپا، یانگ نگے ردوگنگال کھورچیسّی کھیودگون کھیورانّگا گیوس اینّوگ۔

¹¹ انطاؔکِیہ ، اِکُنیُم تانگ، لُسترا گیالساگُونی نانّگا نگا ناگس تانگ باردو ستانس۔ تیرو یود زانے نگے تسامشیگی ناگس تانگ ردوگنگال گُون کھورس، اِین نانگ مسیح نگا تے تشانگمے نانگنے تھار چوگّا زادکھانبو کھیورانّگا گیوس اینّوگ۔

¹² اونا، حضرت عیسیٰ مسیح نانّگا خُدے سچودلامیکا ڈولین میتشے پھودنیین یودکھان تشانگما ناگس تھونگین ۔

¹³ اِین نانگ مینگان تانگ گوبسکورکھان گُون، سوگپو نے تھوشوگ چھوگسلا چھین۔ کھونگونی جانماگونلا گوبسکوراین، یانگ کھورانگّونّانگ گوبسکورّی نانّگا سونگتے اینوگ۔

¹⁴ اِین نانگ کھیورانّگا لابجا تھوبکھانگونّیکا ستانپو دُوگستے تیگون لدینبا اینکھانبو ایمان چوس، چیازیرنا کھیورانّگا تے لابکھانّی میگون ایمان چان اینکھانبو گیوس اینّوگ۔

¹⁵ کھیورانّگا ٹھوگوی توسنے پھارلا ہلژخمہ شوقبُو بوے نانگنے لابستے اینپین۔ یانگ تے لابجاگونّی کھیورانّگا حضرت عیسیٰ مسیح نانّگا ایمان چوچیس گیُودتے، تھارپا تھوبچیسلا شیسرابسپو سالتے این۔

¹⁶ ہلژخمہ شوقبُو تشانگما، می گیُودتے خُدے ڈِیازادتے اینوگ، یانگ تیبو نگاتانگونلا لابچیس، سکیون رجود چوچیس، لام ٹانگپو ستانچیس تانگ میتشے ٹانگپوجیگ پھودچیسلا ٹھیدچیس گُونی نانّگا پھانتھوگسچان اینوگ۔

¹⁷ خُدے تیبو کھونگرانگی میگونلا لاس زانگپو تشانگما چوچیسّی کھیود سالتے ڈالڈیگ بورّا زادچیسلا کولّا زادّانوگ۔