تیموتھِی ۲ 2 - New Testament in Ladakhi Langageحضرت عیسیٰ مسیح ماگمی زانگپو۔ 1 تِیمُتھیُس، نگے بُوژا، خُدے کھیورانّگا حضرت عیسیٰ مسیح گیُودتے سالّا زادکھانّی شزدے نانّگا ستوبسچان گیور۔ 2 نگے می مانگپوے لدُونلا لابجا تانگکھانگون کھیرانگی تشورتے اینوگ، تا تے لابجاگون کھیرانگی ایمان چانّی میگونلا لابگوس، تینے جانما شادچیسّی لوبجونگ کھونگونلا تھوبین۔ 3 حضرت عیسیٰ مسیح ماگمی زانگپوجیگی تشولّا نگا نیامپو باردوگون کھور۔ 4 ماگمیگونّی ماگمی مانکھان میگونّی میتشیے نانّگا تھیسّتوگ تانّگا مانوگ، چیازیرنا کھونگونی کھورانگی ماگمی اُسکیونگ تھادچوگچیسّی سونڈوس چوانوگ۔ 5 یانگ سالیانگس سیکھانجیگّا گیالکھے شزدے تھوبّا مانوگ، نامتشوگپا کھونگون ٹھیمسّیکا ڈول میڈول۔ 6 تینّا تسوگسلا، سونڈوس چوکھانّی جینگبادپا، کھورانگی لاس چوکھانّی ڈاسبو نیانگکھان دانگپوبو اینگوس۔ 7 نگے چیریگ زیرّاد، تیگونّی سکورلا سامبا تونگ۔ مسیح کھیورانّگا ای تشانگما ہاگوچیسّی نانّگا روگس زادِین۔ 8 گیالپو داؤد ّی اولاد، حضرت عیسیٰ مسیحاڈونگستے سونتیا جانگستے اینکھانبو ایدتو چوس، تیبو نی نگے شادکھانّی گاموےناتسُولبو این۔ 9 کابوے پھیا نگا ردوگنگال تھونگدوگ، یانگ ٹھیمسچاگکھانجیگ تسوگسلا لچاگتھاگ نیامپو چینگستے بورس۔ اِین نانگ خُدے کا بو لچاگتھاگا لدامستے بور مینیان۔ 10 تیبویپھیا خُدے لدامّا زادکھانّی میگونلا تھارپا تھوبچیسلا نگا ردوگنگال چیجیگ چونگنانگ کھورچیسلا تھادپو این۔ تے تھارپابو حضرت عیسیٰ مسیح نانّگا تھامیدپے شان نیامپو دوگچیسپو این۔ 11 ای ژالتاگون ایمان چان اینوگ۔ کالتیس نگاتانگون مسیحا نیامپو شینا، نگاتانگون کھونگ نیامپو سونتیانگ لوسین۔ 12 کالتیس نگاتانگونّی ردوگنگال کھورنا، کھونگ نیامپو نگاتانگونّی وانّگانگ ثولاین۔ کالتیس نگاتانگونّی کھونگ شیسّامید زیرنا، کھونگ یانگ نگاتانگون شیسّامید مولین۔ 13 کالتیس نگاتانگون ایمان چان مالوسنا، کھونگ ایمان چان جوگسانوگ۔ چیازیرنا کھونّگا کھونگرانگی سچودلامّی گیابگال زادنیانّا مانوگ۔ خُدے تھوگستھاد چوگکھانّی ژابستوگپاجیگ۔ 14 تے لابجاگونّی سکورلا میتشانگمالا ایدتو سکول، یانگ تیگونلا سپیرا کھاگچان مانکھانّیکا ٹھابچیسگون گوگ زیرتے خُدے سکوندونلا لدامجاگ تونگ۔ یتسوگسّی دزینگموے کانے پھانتھوگس میدپا، تیبو نیانکھان ایمان چانگونّی میتشے دودمید چوانوگ۔ 15 خُدے سکوندونلا کھونگ تھوگستھاد چوگکھانجیگ ستانچیسلا سونڈوس چوس۔ کھیرانگ ٹھیلگوس میدکھان تانگ لدینبے کاگون گیالّا چوستے ہاگوچوگ نیانکھانّی جابستوگپا زانگپوجیگ یونگّوس۔ 16 تونتاگ میدکھان تانگ سامبا میدکھانّی سپیرا گونّے تھاگرینّگا دوگشیگ، کاگونّی مانّگا سچودپا نگانپا چھوگسلا ٹھیدتے کھیرّانوگ۔ 17 تیتسوگسی سپیراگون شا زاکھانّی سماکھا نگانپا تسوگسلا گیاسّانوگ، سپیرنا ہُمنیُس تانگ پیلیدوس گُون ژوگس اینوگ۔ 18 کھونگونی مسیح نانّگا ایمان چان شیکھانگون سونتیا لانگ تشارتے اینوگ زیرتے لدینبے لامبو پھانگستے اینوگ۔ یانگ تیزوگ زیرتے ایمان چان کھاچیگی سونتیا لانگچیسّی ریوابو چاگستے کھونگونی ایمان میدکھان چوستے اینوگ۔ 19 اِین نانگ خُدے لدینبابو سیگسّمانگ تسوگسلا ستانپو لوسین کابویکا۔ ”مسیح کھیینّانوگ کھونگی اینکھانگون“ یانگ ”حضرت عیسیٰ، نگے مسیح این زیرکھان تشانگما، نگانپا چوچیسنے گیورگوس“ ڈِیازادتے یودتے اینوگ۔ 20 سپیرنا نانگتشانگس چھوگپوجیگی کھانگپے نانّگا نود کھاچیگ سیر تانگ مولّی یانگ کھاچیگ شینگ تانگ کالاگ گُونی چوستے یودتے اینوگ۔ رینچانّی نودگون میگسالّی گاستونّی پھیا یانگ کھییمو نودگون جاگدانگی گھوسدومی نانّگا کولّانوگ۔ 21 نگے سنگونلا زیرکھانگونّی کانے ژانگما بورکھانگون، میگسالّی سیوے پھیا کولّا زادچیسّی لاگچھا ریگ گیورین، ہلژخمہ گیُودتے سپونبوے پھیا پھانتھوگسچان گیورین، یانگ لاس زانگپو تشانگما چوچیسلا ڈالڈیگ دوگین۔ 22 ژونّوی لوسّی دودپا نگانپاگونّے شورتے ٹانگپو تانگ ایمان چانّی میتشے پھودچیس، چیسپا تانگ، جیدے گُونی گیابنے بانگتونگشیگ، تیگون ماتشاد کھیوجے ڈیل، سیمس لاگمو نیامپو خُدا دُعا پھولکھانگون نیامپو لدانچوگّوشیس اینوگ۔ 23 یانگسکیار نگے زیرّاد، سامبا میدکھان تانگ تونتاگ میدکھانّی دزینگمو گُونی نانّگا ماڈیس، چیازیرنا یکانے نولچیس چیگپو سمینّانوگ۔ 24 مسیح جابستوگپا دزینگمو ماتانّگا، میتشانگمالا سنینگرجے ستانکھان، می سکیونگپوگون نیامپو زودپاچان یانگ گیالّا چوستے لابنیانکھانجیگ یونگّوس۔ 25 پاسمو نیامپو گیابگال چوکھانگونلا لابجا تونگ۔ چیگیوس، خُدے کھونگونی سنینگّون گیورچوگّا زادتے لدینبے لابجے گیابنے ڈولچیسلا سکابس سالثیدچیس اینوگ۔ 26 تینے کھونگون سامباچان گیورتے ردودگونّی گوبے زومستے بورتے یودکھانبوے نانگنے تھارین، کابوے کھونگون کھوے دودپا نانگجین چوچوگچیسلا زومستے یودپین۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation