تھیسའلونیکའپའ ۲ 3 - New Testament in Ladakhi Langageدُعا گونی پھیا جُووا۔ 1 ستینگجوگا، لے فونو گون حضرت عیسیٰ مسیح کسل پو، گیوگسپا پھیلچیس تانگ کھیوجاگونّی سیوا چوا تسوگسلا، جانماگونّی کانیانگ کابوا سیوا تھوبچیسلا نگاجے پھیا دُعا چوشیگ۔ 2 یانگ نگاجا می سوگپو تانگ نگانسیمسچان گُونی کانے تھارچیسلا دُعا چوشیگ، چیازیرنا می مانگپوے گاموےناتسُولّیکا ایمان چوا مانوگ۔ 3 اِین نانگ مسیح نی ایمان چانجیگ اینوگ، کھونگی کھیوجاگون ستانپو زادتے شیطانی لاس نگانپانے سکیوبستے بورّا زادِین۔ 4 مسیح نانّگا کھیوجاگونلا نگاجے لاس چوچیسلا کا تانگکھانگون لاگلین چوستے اینوگ، یانگ یونگچیسچانّی توسّی نانّگا چوین دوگچیسّی، نگاجا گُونلا لوکھیل یود۔ 5 حضرت عیسیٰ مسیح کھیوجے سنینگّون، خُدے تسامشیگی چامسپا زادچیس تانگ، مسیح کانے تھوبکھانّی زودسیمسچانّی سنینگروس گُون مانّگا ہاگوچیسّی نانّگا ٹھیدّا زادشیگ۔ لاسمیلام ماگیورشیگ۔ 6 لے فونو گون، نگاجے نگاتانگی حضرت عیسیٰ مسیح وانگی نانّگا کھیوجاگونلا ای کا بو تانّگاد۔ کھیوجاگون ایمان چانّی لاسمیلام یانگ نگاجے تانگکھانّی لابجاگون نانگجین ماڈولکھانگونّے تھاگرینّگا دوگشیگ۔ 7 نگاجا کھیوجا نیامپو یود زانے، نگاجا لاسمیلام میدکھانبو کھیوجاگونلا گیوس اینّوگ، نگاجے میتشے پھودتشولبو سپے لینگوس۔ 8 رین ماشالّا نگاجے سوجیگی کانیانگ زان مازوسپین، اِین نانگ کھیوجا سوانگ باردو میستانچیسّی پھیا تشان نین میدپا، سونڈوس ثانٹے نیامپو لاس چوسپین۔ 9 نگاجا گُونلا نگاجے گھوسدومگون تونگ زیرچیسّی وانگ یودتیانگ، کھیوجاگون نگاجے سپییکا ڈولچیسّی پھیا نگاجے میتشے تے تشولّا پھودپین۔ 10 یانگ نگاجا کھیوجا نیامپو یود زان یانگ، نگاجے اینّابو کا تانگسپین، ”کالتیس میجیگّا لاس چوچیسّی دودپا میدنا، کھوا زاچیسلا زان ماتانگشیگ۔“ 11 کھیوجے ٹونے کھاچیگ لاس چانگ ماچوا لاسمیلام گیورتے یودکھان یانگ جانماگونّی لاسّی نانّگا تھیسّتوگ تانگین دوگچیسپو نگاجے تشور۔ 12 تیتسوگسی میگونلا، چوبچادتے رانگی کھارجی پھیا سونڈوس چوستے لاس چوگوسچیسلا نگاجے حضرت عیسیٰ مسیح وانگی نانّگا سپوسپا تانگ کاتانّگاد۔ 13 تا کھیوجا لوسکھانّی فونو گُونی لاس زانگپو چوین دوگچیسلا سنانّگا ماتشیرشیگ۔ 14 کالتیس سوجیگی ای ایگے نانّگا ڈیسکھانّی لابجاگونلا مانیانّا، تے میبویکا نانگستاگ بور۔ کھوا ٹھیلبا چھاچیسّی پھیا کھو نیامپو ڈیل مابورشیگ۔ 15 اِین نانگ کھوا ڈاو ماسامّا، رانگی فونو جیگ تسوگسلا لدامجاگ تونگشیگ۔ ستینگجوگی دُعا تانگ جُووا۔ 16 تا جیدیے سالّا زادکھانّی حضرت عیسیٰ سی مسیح، کھونگرانگی جیدے کھیوجاگونلا توسگیون تانگ ناسلوگ تشانگمے نانّگا سالّا زادشیگ، یانگ مسیح کھیوجا تشانگما نیامپو جُوگسشیگ۔ ستینگجوگی جوبو 17 تا نگے ایگے ڈیکھانبوے کانے نییگوبو کھیونگستے، نگا حضرت پولُسی رانگی لاگڈیسّی نانّگا ای جوبو ڈِیاد۔ نگے ایگے تشانگمے نانّگا تیبو، نگے چھوگسنے اینکھانّی میگسالّی ستاگس شیگین۔ 18 نگاتانگی حضرت عیسیٰ مسیح شزدے کھیوجا تشانگمالا تھوبشیگ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation