پیٹའر ۲ 1 - New Testament in Ladakhi Langage

حضرت پطرؔس سی سلام جْوس ۔

¹ نگا شمعُوؔن حضرت پطرؔس ، حضرت عیسیٰ مسیح یوگپو تانگ رسُول این۔ نگے نگاتانگی خُدے تانگ کھوم چُوک کھن حضرت عیسیٰ مسیحاگُونی ٹانگپو زادچیسپوے، نگاجا تسوگسلا تینّا رینچان ایمان تھوبکھانگونلا ای ایگیبو ڈِیاد۔

² کھیوجاگونّی ڈیلبو خُدے تانگ نگاتانگی حضرت عیسیٰ مسیح نانّگا لداناین چھا زانے، کھیوجاگونلا شزدے تانگ جیدے مانگنے مانّگا تھوبشیگ۔

ایمانی نانّگا یارگیاس۔

³ نگاتانگی خُدے سچودلامّی نانّگا ڈولین میتشے پھودچیسّی پھیا، خُدے معجزہ شیدّی، نگاتانگونلا گھوسدوم تشانگما سالّا زادس۔ نگاتانگونلا تے تشانگما کھونگ شیشیسپوے تھوبتے اینوگ، کھونگی نگاتانّگا کھونگرانگی زانگپو تانگ معجزہ سپال گیُودتے، بودّا زادس۔

⁴ تیگونّی جاستے، کھونگی نگاتانگونلا وعدہ ما چھینمو تانگ رینچان گُون سالّا زادس۔ تے وعدہ گونّی، نگاتانّگا دُنیائی نانّگا یودکھانّی دودپا نگانپاگونّے تھارچیس تانگ، خُدے سچودلامّی نانّگا کھاگنین چوگّا زادس۔

⁵ خُدے تے تشانگما چوا زاد پاسانگ، کھیوجاگونّی ایمانی نانّگانگ ای کھیود تشانگما کھیونگچیسّی ما سونڈوس چوسشیگ۔ کھیوجے ایمان دانگنیامپو سچودپا زانگپو، سچودپا زانگپو دانگنیامپو خُدے تھوگستھادکھانگون شیشیسّی یونتان،

⁶ خُدے تھوگستھادکھانگون شیشیسّی یونتان دانگنیامپو رانگسیمس چونّیانکھان، رانگسیمس چونّیانکھان دانگنیامپو سنینگروس، سنینگروس دانگنیامپو خُدے سچودلامیکا ڈولکھانّی میتشے جیگ پھودنیانکھان،

⁷ خُدے سچودلامیکا ڈولکھانّی میتشے دانگنیامپو فونو گونلا چامسپا، یانگ تے چامسپا نیامپو تشانگمالا سنینگی تھیلنے چامسپا یونگّوشیس اینوگ۔

⁸ تا کالتیس تے کھیود تشانگما کھیوجے نانّگا گیاسین چھادنا، تیبوے کھیوجاگونّی میتشے نگاتانگونّی حضرت عیسیٰ مسیح ا شیشیسّی نانّگا مانّگا ڈاسبو سمینکھان تانگ پھانتھوگسچان گیور چوگین ۔

⁹ اِین نانگ تیتسوگسی کھیود میدکھان گُون گیالّا چوستے ماتھونگکھان تانگ جارا ژوگس اینوگ۔ یانگ کھوے سنگونلا چوسکھانّی دِیگپاگون داگچوگّا زادکھانبو رجیدتے اینوگ۔

¹⁰ تیبویپھیا کھیوجا فونو گونّیانگ، خُدے بودّا زادکھان تانگ، لدامّا زادکھان گُونی ٹونے اینکھانبو، ستانچیسلا سونڈوس چوسشیگ۔ تیزوگ چونا، خُدے نانّگا یودکھانّی ایمانی کانے کھیوجاگون مانے میگییل۔

¹¹ تینے نگاتانگونّی مسیح خُدے تانگ کھوم چُوک کھن ژوگسکھانّی حضرت عیسیٰ سی مسیح، تھامیدپے گیالثیدّی نانّگا کھیوجاگونلا معجزہ گاسوس زادِین۔

ہلژخمہ شوقبُو لا سنانّگا چوچیس۔

¹² تیبویپھیا جان کھیوجاگونلا تے لابجاگون ہاگوتے تے دینباگونّیکا ستانپو دُوگستے اِین نانگ ، نگے کھیوجاگونلا ای لابجاگون توسگیون ایدتو سکولاین۔

¹³ نگا سونتیا یودیوت پو، تیگون ایدتو سکولچیس نگے اوسپا سامّاراگ۔

¹⁴ اِین نانگ نگا گیوگسپا ای دُنیانے چھاگوشیسپو گیوسیود، چیازیرنا نگاتانگی حضرت عیسیٰ مسیح نگا ایبو سنگون چوگّا زادس۔

¹⁵ نگا شیتے ستینگنیانگ، کھیوجاگونّی ای لابجاگون ایدتو بورچیسّی پھیا نگے سونڈوس چواد۔

¹⁶ نگاجے نگاتانگی حضرت عیسیٰ مسیح ا وانگ نیامپو یانگسکیار لوگستے سکیودچیسّی سکورگون شاد زانے، سکیونجان رُومسگون ماچوا، حضرت عیسیٰ سی شان نگاجا رانگی میگنے جالتے اینپین۔

^17-18 خُدے یابّی چھوگسنے مسیحا سیوا تانگ سپال سالّا زاد زانے، نگاجانگ کھونگ نیامپو ہلژخمہ ریکا یودپین۔ تے شان پوے نانّگا، نامکھانے خُدے سونگسکادپوے، ”یبو نی نگے چیسپے بُوژا این، کھو نیامپو نگا ماثانٹے تھادپو این“ مولین نگاجے تشور۔

¹⁹ تیبوے جاستے نگاجا گُونلا پیغمبر گونّی، حضرت عیسیٰ مسیح سکورلا ڈیکھانگونّی نانّگا مانّگا لوکھیل راگ۔ یانگ کھیوجاگونّیانگ تیگونّیکا سنانّگا مانّگا تانگّوشیس اینوگ، چیازیرنا کھیوجاگونّی پھیا تیگون نییما شارشار تشوگپالا مونڈیگی نانّگا، اوت لدانگشانجیگ ژوگس اینوگ۔ تینے کھیوجاگونّی سیمسّی نانّگا ناملانگسّی سکارچھین مسیحا شارّا زادِین۔

²⁰ اِین نانگ سنگونلا کھیوجاگونلا ایبو ہاگو گوشیسپو کھاگچان اینوگ۔ ہلژخمہ شوقبُو بوے لونگستانّی تشیگس چیگّانگ پیغمبر جیگی رانگی سامبا نانگجین ڈِیستے مانوگ۔

²¹ چیازیرنا لونگستانّی تشیگس چیگّانگ میی سامبانے مایونّگا، ہلژخمہ رُوح گیُودتے پیغمبر گونّی خُدے ژالتاگون شادتے اینوگ۔