کورینتھیپའ ۲ 7 - New Testament in Ladakhi Langage

¹ نگاتانگونلا تے وعدہ گون یود پاسانگ، دزاوگون، نگاتی زوگسپو تانگ سیمسنید تشیتو چوکھان تشانگما پھانگستے نگاتانگرانگ ژانگما چوشیگ، یانگ خُدا کُوسپا چوین کھونگی جیگسّی نانّگا نگاتانگرانگ چیساتھوگنے ہلژخمہ گیورچوگچیسلا لاس چوشیگ۔

² سنینگ شاگستے نگاجا گُونلا چیسپا چوشیگّانگ، نگاجا گُونی سوجیگّانگ نورٹھول ماچوسپین، یا سوجیگّانگ لام نورکھانّیکا ٹھیدتے ماکھیرپین، یا سوجیگی کانیانگ پھانتھوگس مالینپین۔

³ تیبو نگے کھیوجاگونلا سکیون کالا زیرّامید۔ نگے سنگونلا زیرپین، نگاجے کھیوجا ایزام چیسپا چواد، نگاجا کھیوجا نیامپو سونتیا دوگچیس یا شیچیسلانگ ڈالڈیگ این۔

⁴ نگا کھیوجاگونّی نانّگا تشانگمیسانگ مانّگا لوکھیل راگ، یانگ کھیوجاگونّی پھیا نگا ماثانٹے پھوسو تشورّاراگ۔ ردوگنگالّی نانّگانگ، کھیوجاگونّی نگا ماثانٹے سپوسپا تانگستے تھادچوگس۔

حضرت پولُسی تھادپو۔

⁵ مکدنیہ نانّگا لیبّاچیگ، نگاجا گُونلا آرام چوچیسی توس میدپین، چیازیرنا نگاجا گُونلا چھوگس تشانگمانے ناگس تانگ باردو تھونگ، تیبو نی پھیلوگنے گیابگال چوکھان تانگ سنینگی جیگسپاگون اینوگ۔

⁶ اِین نانگ سپوسپا میدکھانگونلا سپوسپا سکیے چوگّا زادکھانّی خُدے، طِطُس نگاجا یودسا لیب چوگّا زادتے، نگاجا گُونلا سپوسپا سکیے چوگّا زادس۔

⁷ کھو نگاجا گُونی ٹوا لیبچیس ماتشاد، کھیوجاگونّی کھوا سپوسپا تانگچیسپو تشورتے، نگا ما تھادپو سونگ۔ کھیوجاگونّی نگا تھونگچیسّی ثانٹے دودپا، نگا تشیرکھا ستانچیسّی پھیا کھیوجاگون سکیومو چھاچیس، یانگ نگے تونلا کھیوجاگونّی سامبا تانگچیس گُون تشورتے، نگا ما تھادپو سونگ۔

⁸ جان نگے سنگونّی ایگیبوے کھیوجاگونّی سیمسّکیومو چوستے یودنانگ، داگسا نگا گیودپا میراگ۔ تیبو کالتے ستینگنے نگے گیودپا چوسپین، چیازیرنا نگا گیوسّونگتے ایگیبوے، توس نیونگونجیگ کھیوجاگونّی سیمسّکیومو چوستوگ۔

⁹ چیاینّانگ، تیبو کالچیسپوا نگا تھادپو راگ، تیبو کھیوجاگونلا تشیرکھا چونگچوگچیس مانپا، تے تشیرکھابوے، کھیوجاگونلا گیودپا سکیچوگستے، کھیوجے میتشے پھودتشولبو سپوچوگس۔ تیبو خُدے کھونگرانگی میگونلا جونگچوگچیسّی تھوگسدود یودکھانّی تشیرکھے ریگسشیگ اینوگ، سونگپاسانگ نگاجے، کھیوجاگونلا چیجیگی تھوگنیانگ نودپا ماسکیالپین۔

¹⁰ خُدے نگاتانگونلا تھونّگومس چھاچوگّا زادچیسّی تشیرکھابوے، نگاتانگون دِیگپانے تھاگرینّگا کھیرّا زادچیس تانگ تھارپا تھوب چوگّا زادّانوگ۔ تیتسوگسی تشیرکھے پھیا گیودپا چوگوس میدپا اینوگ، اِین نانگ گیودپا میدکھانّی دُنیائی تشیرکھے تھامیدپے شیچیس کھیونّگانوگ۔

¹¹ ستوسشیگ، خُدے تھوگستھاد چوگکھانّی گیودپے، کھیوجاگونّی نانّگا کازوگ لاس زانگپوے ڈاسبو سمیندوگ، سپیرنا سیمسّی نانّگا ٹانگپو یانگ سکیون پھوگکھانگون میدکھان چوچیسّی دودپا، دِیگپا چوکھان گونّیکا ثو ثانٹے، دِیگپے جیگسنانگ، نگا تھونگچیسّی دودپا، نگے لابجاگون کھانیانچیسلا رینگشیس، نورٹھول چوکھانبوا گیوگسپا چھادپا کالچیس، تے تشانگما گیُودتے، کھیوجاگون نونگسمید اینکھانبو کھیوجارانگی ستانتے اینوگ۔

¹² نگے سنگونمے ایگیبو، نورٹھول چوکھان یا نودپا پھوگکھان گُونی سکورلا ماڈیسپین، اِین نانگ خُدے سکوندونلا، کھیوجاگون، نگاجے پھیا تسامشیگی دادچان این تیبو کھیوجارانگی تھونگنیانچیسّی گیونتشانبوے پھیا ڈیسپین۔

¹³ تیبوے جاستے نگاجا گُونلا سپوسپا سکیستے راگ۔ نگاجا سپوسپاگونّی نانما، کھیوجے فونو طِطُسلا گاسوس یانگ سیمسّی نانّگا جیدے کھیونگستے تھادپو چھاچوگچیسپوا نگاجا گُون ما تھادپو سونگ۔

¹⁴ کھیوجے پھیا نگا تسامشیگی پھوسو تشورکھانبو نگے تیتوسلا شادپین، یانگ کھیوجاگونّی نگے ریوا ماچاگا اینوگ۔ تیبویپھیا نگے کھیوجاگونلا توسگیون ٹانگپو شادّا تسوگسلا داگسانگ نگے کھیوجے سکورلا فونو طِطُسی لدُونلا پھوسو چوکھانبو لدینبا اینکھان ستانّانوگ۔

¹⁵ کھیوجاگونّی کھوے کھانیانتے جیگس تانگ سنینگی تھیلنے کُوسپا نیامپو گاسوس جوکھانگون، ایدتو چوستے کھوے کھیوجاگونلا سنگونّی سانگ مانّگا یاشا چوروگ۔

¹⁶ نگا ماثانٹے تھادپو راگ چیازیرنا نگا کھیوجاگونّی نانّگا تھارکھییلپے لوکھیل راگ۔