کورینتھیپའ ۲ 5 - New Testament in Ladakhi Langageنامکھے زوگسپو۔ 1 نگاتانگونلا گیوس اینّوگ، نگاتانگ دوگکھانّی ای دُنیائی کوربو میدکھان چھانا، نگاتانگونلا تھامیدکھانّی کھانگپاجیگ نامکھے نانّگا یودتے اینوگ، کا بو میی لاگپانے ماچوا خُدے کھونگرانگی نگاتانگونّی پھیا زادتے اینوگ۔ 2 نگاتانگون داگسا یودکھانّی زوگسپوے نانّگا وتھوگستے، کوسلاگ سوما تسوگسلا نامکھے زوگسپوبو گونچیسلا رینگسین اینوگ۔ 3 نگاتانگونّی نامکھے زوگسپوبو گونچیس این پاسانگ، لجیرنیالّا میلوس۔ 4 ای دُنیائی زوگسپوے نانّگا دوگ زانے، نگاتانگون اوتھوگّانوگ، اِین نانگ نگاتانگون ای تشانگمے کانے تھارچیسلا شینیین ماڈوا، ای ستاگس پا میدکھانّی زوگسپوبو، تھامیدپے میتشیے نانّگا گیورچیسّی پھیا، نامکھے زوگسپوگون گونّیین ڈوانوگ۔ 5 تیگونّی پھیا خُدے کھونگرانگی نگاتانگون ڈالڈیگ چوا زادتے اینوگ، یانگ نگاتانگونلا ہلژخمہ رُوح سالّا زادتے، کھونگی سالّا زادچیس تشانگما تانتان چوا زادتے اینوگ۔ 6 تیبویپھیا نگاجا گُونلا توسگیون لوکھیل راگ، ای دُنیائی زوگسپوے نانّگا یود زانے، نگاجا گُون مسیح نیامپو نامکھے کھامپے نانّگا مادوگا اینکھانبو گیوس اینّوگ۔ 7 نگاجا گُونی میتشے تھونگکھانبویکا مانپا، خُدے نانّگا ایمان چوینجیگ پھودّاد۔ 8 اونا نگاجا گُونلا تانتان لوکھیل راگ، یانگ نگے زیرّاد ای دُنیائی زوگسپوے نانّگا دوگّا سانگ، نامکھے کھانگپے نانّگا حضرت عیسیٰ مسیح نیامپو دوگّالا تھادّاراگ۔ 9 تیبویپھیا نگاجا گُون ای زوگسپوے نانّگا دوگین یودڈو یا تیبونے تھاگرینّگا، حضرت عیسیٰ سی تھوگستھاد چوگچیسپو نگاجے میگجی این۔ 10 چیازیرنا جاگشیگ نگاتانگ تشانگما مسیح سکوندونلا، ٹھیمسچادّی پھیا، لانگّوسّانوگ، تینے ای دُنیائی زوگسپوے نانّگا زانگپو یا نگانپا چوکھانگونّی ڈاسبو نگاتانگ ریریا سمینّانوگ۔ مسیحا گیُودتے خُدے نیامپو ڈیل۔ 11 مسیح ٹھیمسچاد تسامشیگ کاگسپو یودکھانبو نگاجا گیوسیود پاسانگ، نگاجے جانماگونلا مسیح نانّگا ایمان کھیونگچوگچیسّی سونڈوس گیالّا چواد۔ نگاجے سنینگی نانّگا یودکھانبو، خُدے سالپو کھیینّا زادّانوگ، یانگ کھیوجاگونّیانگ شیشیسّی ریوا چواد۔ 12 نگاجے یانگسکیار نگاجا رانگی سکورلا پھوسو چوروگّا؟ چوامید۔ نگاجے کھیوجاگونلا نگاجے سکورلا تھادپو چوچیسّی سکابس تانّگاد، تینے کھیوجاگونّی سیمس ٹانگپو یودچیسلا پھوسو ماچوا، رانگی لاسگونّیکا پھوسو چوکھانگونلا لانتانگنیانین۔ 13 کالتیس نگاجے می سنیونباگون تسوگسلا سپیرا تانگدوگ سامّادنا، تیبو خُدا سپال تھوبچیسلا چواد۔ یانگ کالتیس نگاجے شیسرابسچانّی لابجا تانگدوگ سامنا، تیبو کھیوجاگونّی پھانتھوگسّی پھیا این۔ 14 مسیح چامسپے نگاجا تیگون چوچوگدوگ۔ نگاتانگونّی مسیحا نگاتانگ تشانگمے تونلا ڈونگستے اینکھانبوا ایمان چوسپا، نگاتانگونّی نگاتانگرانگی سنینگپا میتشے پھودتشولبو، شیتے اینکھانبویکانگ، ایمان چوانوگ۔ 15 مسیحا تشانگمے پھیا ڈونگس۔ کھونگی تیبو چوا زادس چیازیرنا، میتشے سوما تھوبکھانگونّی کھورانگونّی پھیا، میتشے ماپھودّا، مسیحا ڈونگستے سونتیا لانّگا زادکھانبوے پھیا میتشے پھودچیسّی تھوگسدود زادّانوگ۔ 16 تا نگاجے دُنیائی می سامتشول نانگجین میجیگ زانگپو یا نگانپا اینوگ زیرتے تھاگچادّا مید۔ توسشیگّا نگاجا گونّیانگ مسیحا تینّا تسوگسلا سامّادپین، تا داگسا نگاجا گُونی تیبو چوامید۔ 17 تیبوے تونتاگپو نی، مسیح اینکھانگون می سوماجیگ گیورتے اینوگ۔ میتشے سنینگپابو میدکھان یانگ سوماجیگ گوزوگ سونگتے اینوگ۔ 18 تے تشانگما خُدے چھوگسنے سکییس اینوگ، کھونگی مسیحا گیُودتے، نگاتانگون کھونگرانگ یودسا لوگستے کھیونگا زادتے اینوگ۔ یانگ خُدے نگاجا، کھونگ تانگ میگونّی نانّگا تھونڈیل چوچیسّی کھاگپو کالا زادتے اینوگ۔ 19 مسیحا گیُودتے خُدے ای دُنیائی می گون کھونگرانگ نیامپو تھونڈیل چوا زادتے تیگونّی دِیگپاگون کھورانگونّی گیابگالّا سیا مازادس۔ یانگ کھونگی نگاجا گُونلا ای تھونڈیلّی لونبو جانما شادچیسلا سالّا زادس۔ 20 تیبویپھیا نگاجا گُون مسیح رسُول این، یانگ نگاجا گیُودتے خُدے، دُنیائی می گونلا جُووا جوا زادّانوگ، مسیح تشابس چوستے نگاجے جُووا پھولّاد ”جوجو، خُدے یودسا لوگستے یونگشیگ۔“ 21 خُدے دِیگپا مانے میدکھانّی مسیحا نگاتانگونّی دِیگپے پھیا چھودپے ژولّا سکوا زادس۔ نگاتانگون مسیحا گیُودتے، خُدے سکوندونلا ٹانگپو سیچیسلا تیبو چوا زادس۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation