کورینتھیپའ ۲ 3 - New Testament in Ladakhi Langage

¹ نگاجے یانگسکیار نگاجا رانگیکا پھوسو چوچیس گوزوگ چوستے اینّوگا؟ یا نگاجا جانگون تسوگسلا کھیوجا ستانچیسلا یا کھیوجاگونّی کانے گیابشیدّی ایگے گھوسدوم یودتے اینّوگا؟ تانتان میگوس۔

² تے ایگیبو نی نگاجے سنینگی کا ڈیکھان کھیوجارانگون این، کا بو تشانگمے سیلتے نگاجے کھیوجے ٹوا چوسکھانّی لاس زانگپوگون ہاگوین۔

³ مسیح چھوگسنے نگاجے لاسگونّی ڈاسبو ستانکھانّی ایگے، کھیوجا اینوگ۔ تے ایگے نییگو نیامپو مانپا، سونتے خُدے رُوح نیامپو ڈِیستے اینوگ۔ تیبو حُکم رچُو تسوگسلا ردویکا سکوستے میدپا، میگونّی سیمسّی نانّگا یودتے اینوگ۔

⁴ تے تشانگما زیرچیسّی نانّگا نگاجا گُونلا لوکھیل راگ، چیازیرنا مسیحا گیُودتے، خُدے نانّگا نگاجا گُونی ایمان ستانپو این۔

⁵ نگاجے زیرّامید، نگاجا رانگی لاگا جابستوگ چوچیسّی کھیودگون یود، اِین نانگ خُدے چھوگسنے سالّا زادتے این۔

⁶ کھونگی نگاجا گُونلا کھونگرانگی وعدہ سومے جابستوگ چوچیسّی کھیود سالّا زادتے اینوگ۔ ای وعدہ سومابو نی، ڈیسکھانّی شریعت گون کھانیانچیسپو مانپا، خُدے کھونگرانگی رُوح سالّا زادچیسپو اینوگ۔ ڈِیستے یودکھانّی شریعت سنیینگپابوے، شیچیس کھیونّگانوگ، اِین نانگ رُوح بوے، میتشے سوما سالّانوگ۔

وعدہ سومے زیرّجید۔

⁷ جان تیزوگ ناسلوگ شان چان نیامپو گوزوگستیانگ، ردویکا سکوسکھان حُکم رچوبوے، شیچیسّی چھوگسلا ٹھیدس، کا بو بنی اِسرائیل پاگونّی پیغمبر حضرت مُوسیٰؔ سی لدونّگا ستا مانیان، چیازیرنا کھونگی لدونگنے خُدے شان لدانگشان بینّگادپین، اِین نانگ لدانگسپو کولے کولیا یولین سونگ۔

⁸ تا ہلژخمہ رُوح بوے میتشے سالچیسپوے چی نگاتانگونّی ای وعدہ سومے نانّگا مانگستیانگ شان مانگپوے ریوا چو ماگوسّا؟

⁹ ٹھیمسچاد کھیونگکھانّی حُکم رچوبو شان چانجیگ یودنا، تینے خُدے سکوندونلا نگاتانگ ٹانگپو زادکھانّی وعدہ سومابوا، تسامشیگی شان میدڈو۔

¹⁰ نگوسپوا، گومے شان پو وعدہ سومے معجزہ شان پو نیامپو لدورنا، شان مانے میدکھان ژوگس اینوگ۔

¹¹ یانگ کالتیس تے یولین چھاکھانبو شان نیامپو جونگستے اینّا، تینے توسگیون لوسشیسّی وعدہ سوما، تسامشیگی شان مانّگا میدڈو۔

¹² تے وعدہ سومابوے نگاجا گُونلا تیزام لوکھیل تانگس پاسانگ، نگاجا گُون چھوسشادچیسّی نانّگا مانّگا ہامپاچان گیور۔

¹³ نگاجا گُون حضرت مُوسیٰؔ ژوگس مان، کھوے بنی اِسرائیل پاگونّی کھورانگی لدونگی کانے کولیا یولتے چھین یودکھانّی شان پوا میستاچیسّی پھیا، کھورانگی لدونگبو راس نیامپو کابس۔

¹⁴ اِین نانگ تیگونّی سنینگّون سکیونگپو گیور۔ تانتانلا داگسانگ نام وعدہ سنینگپابو سیلّاچیگ، کھونگونلا ہاگو تھوبّا مانوگ کازوگ حضرت مُوسیٰؔ سی لدونّگا کابکھانبو ژوگس۔ مسیحا چیگپوے نانّگا ایمان چوچیسپوے، تے کابکھانبو تھینّا زادِین۔

¹⁵ اونا، دیرینّگانگ حضرت مُوسیٰؔ سی شریعت گون سیل زانے، کھونگونی سنینگّون کابستے کھونگونلا ہاگو تھوبّا مانوگ۔

¹⁶ اِین نانگ سوجیگی مسیح نانّگا ایمان کھیونّگاچیگ، کابستے یودکھانبو تھینّا زادّانوگ۔

¹⁷ تا مسیح نی رُوح جُوگستے اینوگ، یانگ ہلژخمہ رُوح یودکھانگونلا تے ٹھیمسگونّی کانے رانگوانگ یودتے اینوگ۔

¹⁸ نگاتانگ تشانگمے کانے کابستے یودکھانبو تھین پاسانگ، نگاتانگونّی تھونگتے مسیح شان پو پھیل چوگّانوگ، کازوگی میلونگی لدانگس کھیابسشوگّاد۔ یانگ رُوح اینکھانّی مسیح، نگاتانگون مانگنے مانّگا کھونگرانگ ژوگس چوا زادتے، نگاتانگون کھونگی شان چانّی زوبستے نانّگا گیورین چھانوگ۔