کورینتھیپའ ۲ 13 - New Testament in Ladakhi Langageحضرت پولُسی ستینگجوگی کھاداگون۔ 1 ہلژخمہ شوقبُو بوے نانّگا ”سکیون رجود چیجیگ یودنانگ گواہ نیس یا سوم یودتے مانے ٹھیمسچاد تانگ مینیان“ مولتے یودکھان تسوگسلا نگانگ لان سومپا کھیوجاگون تھوگّالا یونگین۔ 2 نگا کھیوجاگون نیامپو لان نیسپا یود زانے، نگے تے دِیگپا چوکھانگونلا سپانگپودتے اینپین، کازوگ نگے سنگونلا چوا تسوگسلا، تا داگسا یانگسکیار نگے کھونگون تانگ جانیانگ تشانگمالا سپانگپودّاد، ستینگما نگا یونگ زانے دِیگپا چوکھان سوجیگّانگ نگے چھادپے کانے میتھار۔ 3 مسیح نگا گیُودتے جالتا سالّا زادکھانبوے گواہ کھیوجاگونلا گوس پاسانگ، نگے تیگون ستانین۔ مسیح کھیوجا سکیونگچیس یا روگس زاد زانے، کھونگ اُتھوکس ماجوگسّا، ما شیدچان جوگسا زادّانوگ۔ 4 جان اوتھوگسّی نانّگا کھونگ کیانگشینگیکا کیانگستے ڈونگسنانگ، تا داگسا خُدے کھیود ّی نانّگا، کھونگ سونتیا جُوگستے اینوگ۔ تینّا تسوگسلا مسیح نانّگا نگاجا گُونانگ اُتھوکس این، اِین نانگ خُدے وانگ تانگ مسیحا نگاجا نیامپو یودچیسپوے نگاجے کھیوجاگونلا سکیونگین یا روگس چوین۔ 5 کھیوجارانگی ایمان ٹانگپو اینّا مان، تیبو ستاگچاد چوشیگ۔ رانگدانگرانّگا ستاگچاد چوشیگ۔ حضرت عیسیٰ مسیحاکھیوجاگونّی نانّگا جُوگستے اینکھانبو گیوسمیدّا؟ تے مانّا ایمان ٹانگپوے ستاگچادّی نانّگا کھیوجاگون تھارکھییل ماچھا اینوگ۔ 6 یانگ نگاجا مسیح لدینبے رسُول اینکھانّی ستاگچادّی نانّگا ٹھانگسپو اینکھانبو کھیوجاگونّی ہاگوچیسلا نگے ریوا چواد۔ 7 کھیوجاگونّی دِیگپا میچوچیسلا نگاجے خُدا دُعا پھولّاد۔ نگے ریوا چواد نگاجا یونگ زانے، کھیوجاگونّیکا نگاجے وانگبو ستانگوس مییونگ۔ نگاجا یونگی سانگ سنگونلا ٹانگپوے لاسگون چوشیگ۔ جان نگاجا گُون نگاجے وانگبو ستانچیسّی نانّگا تھارکھییل مالوسکھان ژوگس تھونگثیدچیس اینوگ۔ 8 نگاجا گُونی ٹانگپوے لابجا گیابگال چو مینیان، اِین نانگ ٹانگپو چیگپوے پھیا لاس چواد۔ 9 کالتیس کھیوجے ایمان شیدچان چوادنا نگاجا گُون اُتھوکس تھونگچیسلا تھادپو راگ۔ کھیوجاگون ایمانی نانّگا گانگپو لدانچیسلا نگاجے دُعا جُواد۔ 10 نگا یونگ زانے، نگے کھیوجاگونلا چھادپا ثانٹے تانگ میگوشیسّی پھیا، نگا یونگی سانگ سنگونلا، ای ایگیبو کھیوجاگونلا ڈِیاد، چیازیرنا مسیح نگا سالّا زادکھانّی وانگچھابو کھیوجاگونّی ایمان میدکھان چھاچوگچیس مانپا، ستانپو چوچیسلا کولنیینراگ۔ حضرت پولُسی ستینگجوگی سلام تانگ برکت۔ 11 فونو گُون، ای ستینگجوگی تشیگسپو نیامپو نگے ایگے ڈیچیسپو تشارچوگّاد۔ سکیدپو چوشیگ، ایمانی نانّگا گانگپو لدانچوگشیگ، چیگ تانگ چیگّا سپوسپا تونگشیگ، چیگ تانگ چیگی پارلا تھونڈیل تانگ جیدے نیامپو دوگشیگ، تینے چیسپا تانگ جیدیے خُدے کھیوجاگون نیامپو جوگسا زادِین۔ 12 چیگ تانگ چیگّا چامسپا نیامپو سلام جوس۔ 13 ایرو یودکھانّی خُدے می ہلژخمہ گونّی، کھیوجاگونلا سلام کالدوگ۔ 14 حضرت عیسیٰ مسیح شزدے، خُدے چیسپا تانگ ہلژخمہ رُوح بوے ڈیل کھیوجاگون نیامپو لوسشیگ ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation