کورینتھیپའ ۲ 12 - New Testament in Ladakhi Langageحضرت پولُسی ژالزیگس تانگ باردوگون۔ 1 ای پھوسو چوچیسپو پھانتھوگسچانجیگ مانّانگ، نگے تارُوانگ چوگوس۔ نگے مسیح چھوگسنے ژالزیگس تانگ سنگون چوگّا زادکھان گُون کھیوجاگونلا شادّاد۔ 2 نا لہ مسیح کا چھیس کھن چِک شیسید، لو 14 سنگونلا، نگا خُدے کھونگرانگ جوگسا زادکھانّی تشانگمیسانگ نامکھا تھوشوگپوے نانّگا کھیرّا زادس۔ تیبو نگا زوگسپوے نانّگا اینپینّا یا رُوحانی نانّگا، نگا چانگ گیوسمید، خُدا چیگپوے کھیینّا زادّانوگ۔ 3 اونا زوگسپوے نانّگا اینپینّا یا رُوحانی نانّگا، خُدے چیگپوے کھیینّا زادّانوگ۔ اِین نانگ نگا یگون تانتانلا گیوسیود، 4 نگا تشانگمیسانگ نامکھا تھوشوگپوے نانّگا کھیرّا زادس، یانگ تشیگس گیُودتے شاد مینیانچیسّی معجزہ جالتا ریگ تشور، کا بو می سوجیگّانگ شاد ماچوگّا اینوگ۔ 5 جان تینّا تھونّگومسپوا پھوسو چوچیس اوسپا اِین نانگ نگے تیبو ماچوا، نگارانگی اوتھوگسگون چیگپویکا پھوسو چوین۔ 6 کالتیس نگے تیگونّیکا پھوسو چوسپینّا، نگے نگارانگ سامبا میدکھانجیگ گیور ماچوگّا، نگے شادکھانگون زون مانپا ٹانگپواینڈو۔ اِین نانگ نگے تیزوگ میچو، چیازیرنا نگے میتشیے نانّگا تھونگکھان یا نگے لونگونّی نانّگا تشورکھانگون ماستوگ، جانیانگ ستودپے گھوسدوم میراگ۔ 7 نگا تے معجزہ ژالزیگس تھونگکھانگونّیکا، پھوسو چو میچوگچیسّی پھیا، تسیرمانگ شے نانّگا زوگستے یودکھان تسوگسلا، خُدے نگے زوگسپوے نانّگا شیطانی کالکھان یوگپوا ناگس تانگ باردو ستان چوگّا زادس۔ 8 لان سوم نگے مسیحا تے باردوگون جوجو کھیرّا زاد جوسپین۔ 9 اِین نانگ کھونگی مولس، ”کھیورانّگا نگے شزدے چیگپوے گھوسدوم یودتے اینوگ۔ ا وتھوگسّی نانّگا نگے کھیود پو ما ستوبسچان گیورّاد۔“ تیبویپھیا نگے نگارانگی اوتھوگسّی نانّگا تھادپو نیامپو مانّگا پھوسو چواد چیازیرنا نگا گیُودتے مسیح کھیود پوے چھاگلاس زادّانوگ۔ 10 تینّابویپھیا مسیح تونلا، نگا نگارانگی اوتھوگس، سچودلامّی سکورلا نگانپا زیرکھان، کاگسپو تانگ باردوے نانّگا سکیدپو تشورّاراگ، چیازیرنا اُتھوکس یودتوس نگا ستوبسچان این۔ کرِنتُھس عبادت خانہ گونّی پھیا حضرت پولُسی تھوگستشیر۔ 11 کھیوجا کرِنتُھس پاگونّی نگا پھوسو چوچوگستے سامبا میدکھانجیگ ژوگس گیورچوگس۔ جان کھیوجاگونّی نگے پھیا گیابشیدچانّی ایگیگون ڈیگوشیس یودپین۔ نگا چانگ مانّانگ تے ٹاگپو رسُول این زیرکھانگونّی سانگ تھوا مان۔ 12 نگا کھیوجاگون نیامپو یود زانے، زودپا نیامپو نگے ستاگس، ستاس تانگ معجزہ مانگپو چوستے، نگے تانتانلا نگا مسیح رسُول اینکھانبو، ستانتے تانگسپین۔ 13 نگے کھیوجاگونلا جان عبادت خانہ گونّی سانگ تھوا کازوگی سیستوگ؟ تیبو کھیوجاگونلا پینے روگسّی نانّگا لچید میکالچیسپوے اینّا؟ شزدے زادتے نگے ای نورٹھولبوا گونگسپا تونگشیگ۔ 14 نگا کھیوجاگون یودسا لان سومپا یونّگاد، یانگ نگا کھیوجاگونّیکا لچیدجیگ میگیور۔ کھیوجاگونّی گیونور مانپا، نگا کھیوجاگون گوسّاد چیازیرنا ٹھوگوگونّی پھاماگونلا گھوسدومگون ماریگّا، پھاماگونّی ٹھوگوگونلا گھوسدومگون ریگستے تانّگانوگ۔ 15 کھیوجاگونّی پھیا نگے نگارانگ تانگ نگا یودکھان تشانگما، ما تھادپو نیامپو سکیاگین۔ کالتیس نگے کھیوجاگونلا چیسپا مانّگا چونا، کھیوجے نگا چیسپا نیونگون چوینّا؟ 16 نگا کھیوجاگونّی پھیا باردو مانکھانبو کھیوجاگونلا گیوسیودتے اینوگ۔ اِین نانگ کھاچیگی نگا سکیونجان این پاسانگ، کھیوجاگونّی کانے سکیون چوستے پھانتھوگس لینتے اینوگ سامدوگ۔ 17 اِین نانگ کازوگی؟ چی کھیوجیکا لامچوگسکھانّی تے میگون گیُودتے نگے کھیوجے کانے پھانتھوگس لینسا؟ 18 کھیوجا تھوگّالا چھاچیسّی پھیا نگے فونو طِطُسلا سپوسپا تانگستے کھو نیامپو جانیانگ فونو جیگ لامچوگ زانے، چی فونو تیتوسّی کھیوجاگونّی کانے پھانتھوگس لینسا؟ مانے مالینس۔ لام چیگ چیگیکا ڈولین، سیمسنید چیگ چیگ نیامپو نگاجا گُونی لاسگون ژوگس چوین مانوگا؟ 19 کھیوجاگونّی نگاجے تیگون نگاجا رانگ سکیوبچیسّی پھیا زیرتے اینوگ سامّادا؟ مسیح جابستوگپا اینچیسپوے نگاجے تیگون کھیوجاگونلا شادّاد، تیبوے گواہ خُدے سالّا زادّانوگ۔ چیسپے دزاوگون، کھیوجا ایمانی نانّگا شیدچان گیورچیسّی پھیا نگاجے تے تشانگما چوسپین۔ 20 نگا جیگسّاراگ نگا یونگ زانے، کھیوجاگونّی میتشے پھودزو تھونگتے، نگا تھادپو میچھا۔ یانگ نگے چوکھانبویکا کھیوجاگون تھاد میتھاد، چیازیرنا کھیوجاگونّی نانّگا دزینگمو، تشیگچیس، ثو، رانگدودچان، سچودلامّی سکورلا نگانپا زیرچیس، کھا بادچیس، رانگستود تانگچیس تانگ، لاس چوچیسلا تشیرکا میدکھان، تیگون تھونگچیسلا نگا جیگسّاراگ۔ 21 اونا نگا جیگسّاراگ، نگا کھیوجاگون یودسا یونگ زانے خُدے نگا یانگسکیار ٹھیلبا تشور چوگّا زادِین، چیازیرنا کھیوجا مانگپوجیگی تارُوانگ سنگونّی دِیگپاگون ماپھانّگا، یانگنا تشیتو، لوسڈیل نگانپا تانگ، اوسپے لوسڈیلّی تشادنے تھالتے چوکھان گونّیکا گیودپا ماچوا اینکھانبو تھونگستے نگا ردوگپو چوگوسین۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation