کورینتھیپའ ۲ 11 - New Testament in Ladakhi Langageحضرت پولُس تانگ زوسمے رسُول گُون۔ 1 تارُوانگ نگے سامبا ماتانّگا پھوسو چوکھانبوا، کھیوجاگون ژاپیگشیگ سنانّگا ماتشیرّا نیانچیسّی ریوا چواد۔ شزدے زادتے نگا نیامپو زودپا بورّا زاد۔ 2 خُدے کھیوجا کھونگرانگ چیگپوے اینچیسّی تھوگسدود یودا تسوگسلا، نگے نانّگانگ کھیوجاگونّی پھیا تینّا ژوگس دودپا راگ۔ ابے کھونگرانگی بوموبو کھوے ماگپے لاگا ستاد زانے، ژانگماجیگ یونگو سامّاد، تینّا تسوگسلا مسیح گیورچیسّی پھیا نگے کھیوجاگون کھونگی چھاگّا ستاد زانے، رُوحانی تھوگنے کھیوجاگون ژانگما یونگچیسّی کھاچھاد چوسپین۔ 3 اِین نانگ شیطان رُول لّا زوستے حضرت حوّا زیرکھانّی بوموبوا گوبسکور تانّگا تسوگسلا، کھوے چی چوستیانگ کھیوجاگونّی سیمس لاگمو تانگ سنینگی تھیلنے مسیحا چیگپوے اینچیسّی دودپے لامنے تھاگرینّگا کھیرّانوگ سامستے نگا جیگسّاراگ۔ 4 سوجیگ کھیوجاگون یودسا یونگستے نگاجے لابکھانّی حضرت عیسیٰ سی سکورلا مانپا یانگ حضرت عیسیٰ سی سوسوجیگی سکورلا لابنا، یا کھیوجاگونلا تھوبستے یودکھانّی رُوح بو مانپا یانگ سیمسنید سوسوجیگ تھوبنا، یا نگاجے شادکھانّی گاموےناتسُول کھیوجے ایمان چوکھانبو مانپا یانگ گاموےناتسُول سوسوجیگ شادنا، کھیوجاگونّی تھادپو نیامپو تیگون لیندوگ۔ 5 اِین نانگ چیساتھوگنے نگا تے مسیح رسُول ٹاگپو ریگ این زیرکھانگونّی سانگ اُتھوکس مید۔ 6 سپیرا تانگچیسّی نانّگا نگا کھونگون تسوگسلا کھاسپا میدڈو، اِین نانگ نگیکا یونتان میدپا مان۔ نگاجے چوکھان تانگ لابکھان تشانگمے نانّگا تیبو سالپو چوستے ستانپین۔ 7 چی نگے نگارانگ پاسمو تانگ کھیوجاگونلا سیوا چوستے خُدے گاموےناتسُولبو رین میدپا شاد زانے، دِیگپا چوستے اینّوگا؟ 8 نگے جانما عبادت خانہ گونّی کانے پینے روگسگون لینتے کھیوجاگونلا رین میدپا جابستوگ جُو زانے، چی نگے کھونگون چومستوگّا؟ 9 یانگ نگا کھیوجاگون نیامپو یودی توس نگے گھوسدومگون ڈانڈا ماچھا زانے، نگے سوجیگّانگ روگس چوچیسلا باردو ماستانپین، چیازیرنا مکدنیہ یونگکھانّی فونو گونّی نگا گھوسدوم یودکھان تشانگما کھیونگس۔ نگا کھیوجاگونّیکا باردوجیگ مانے ماگیورپین، یانگ نگا گیوراینّانگ میراگ۔ 10 کازوگ مسیح لدینبا نگیکا یودکھانبو تانتان این، اخیہ یولّی نانّگا سوجیگیانگ تیگونّی سکورلا پھوسو چوچیسنے نگا گاگستے بور مینیان۔ 11 نگے کھیوجاگونّی کانے نگارانگی گھوسدومی پھیا گیونورّی روگسگون مالین پاسانگ، چی نگے کھیوجاگونلا چیسپا ماچوا اینّوگا؟ مانے مان۔ نگے کھیوجاگونلا چیسپا چوکھانبو خُدے کھیینّا زادّانوگ۔ 12 اونا نگے تارُوانگ تینّابو چوین دوگین۔ تیبوے ٹاگپو رسُول گُونلا کھونگونی لاسپوانگ نگاجے لاس ژوگس این زیرتے پھوسو چوچیسّی سکابس تھوبچیسنے گاگستے بورین۔ 13 کھونگون مسیح زُوسما رسُول گُون اینوگ۔ کھونگونی سکیونجانّی لاسگون چوین، مسیح رسُول اینزون تانّگانوگ۔ 14 اِین نانگ نگا ہالاسّا میراگ، شیطانیانگ کھورانگ خُدے کالا زادکھان اودّی فرشتا اینزون تانّگانوگ۔ 15 تینے شیطانی یوگپوگونّیانگ کھورانگّون ٹانگپو جابستوگپا اینزون تانگکھانبویکا نگاتانگون ہالاسگوشیس مانوگ۔ ستینگجوگا کھونگونلا کھورانگونّی لاس نگانپا چوسکھانگونلا اوسپے چھادپا پھوگانوگ۔ حضرت پولُسی میتشیے نانّگا باردوگون۔ 16 نگے یانگسکیار زیرّاد، ایزوگ سپیرا تانگچیسپوے نگا سامبا میدکھانجیگ اینوگ ماسامشیگ۔ کالتیس کھیوجاگونّی تیزوگ سامنانگ، نگے نگارانگی سکورلا ژاپیگ مانّگا پھوسو چو زانے، نگانگ نیونشیگ کازوگی کھیوجاگونّی می سامبا میدکھانجیگّا نیانّاد۔ 17 جان یتسوگسّی پھوسوگون مسیح چھوگسنے یونّگا مانوگ، اِین نانگ نگے سامبا میدکھانجیگ تسوگسلا سپیرا تانّگاد۔ 18 تیگونّی کھورانگونّی دُنیائیکا ڈاسبو تھوبکھانگونّی سکورلا پھوسو چوس پاسانگ نگیانگ چوین۔ 19 کھیوجا کرِنتُھس مسیحا پا گُون ما شیسرابسچان این پاسانگ کھیوجاگونّی تے سامبا میدکھانّی لوبپون گُون تھادپو نیامپو ثانتے اینّا؟ 20 کھیوجاگون وانگی یوگا ثولکھان، یا یودکھان تشانگما کوگستے کھیرکھان، یا پھانتھوگس لینکھان، یا ٹاگپو ستانکھان، یا ڈاملچاگ تانگکھان تشانگمانگ کھیوجاگونّی ثانتے دوگدوگ۔ 21 یتسوگسّی لاسگون چوچیسّی نانّگا نگاجا گُون مانگستیانگ اُتھوکس اینکھانبو شادچیسلا نگارانگ ٹھیلّا راگ۔ اِین نانگ کالتیس تیگونّی کھورانگونّی سکورلا پھوسو چوچیسّی ہامپا چونا، نگے نگارانگی سامبا میدکھان تسوگسلا سپیرا تانگکھانبویکانگ، پھوسو چوچیسّی ہامپا چوین۔ 22 کھونگون عِبرانی پا اینّوگا؟ نگانگ این۔ کھونگون بنی اِسرائیل پا اینّوگا؟ نگانگ این۔ کھونگون حضرت اِبراہیم اولاد اینّوگا؟ نگانگ این۔ 23 کھونگون مسیح جابستوگ جوکھان اینّوگا؟ (تا نگے زیرکھان تانگ زیرچیس تشانگما میسنیونپے زیرکھان ژوگس تشورچین) اِین نانگ نگے مسیحا تیگونّی سانگ مانّگا جابستوگ جْوس تے این۔ نگے کھونگونی سانگ لاس مانّگا ثانٹے چوسپین، لان مانگپو تسونکھانگی نانّگا کاگس، سی مینیانچیسّی ستالچاگ گیابس، لان مانگپو شیچیسّی نیموا لیب۔ 24 لان ثنا توسّکابس سوسوے نانّگا یہُودی پے سپونبوگونّی چھوگسنے نگا ستالچاگ 39 گیابچیسّی چھادپانگ پھوگ۔ 25 لانپھوگ سوم نگا بیرگا رومپو نیامپو ردونگس، لانچیگ نگا ردوا گیابستے سادچیس چوس، لان سوم نگا یودکھانّی ٹُھوزینگبو چھاگستے چھوی نانّگا نوب، یانگ نگا نییما تانگ تشانجیگ گیاتشوے چھوی نانّگا لوس۔ 26 مسیح پھیا نگے ای باردوگون کھورپین، لان مانگپو ما تھاگرینگی یولگونلا بیسلا سونگپین، نگا لژانگسپو تانگ چاگپا گُونی جیگسپا جونگ، نگا نگارانگی می یہُودی پا ماتشاد یہُودی مانکھان گُونی کانیانگ جیگسپا جونگ۔ گیالسا، تھانگستونگ، یانگ تشوگونّی نانّگانگ نگا جیگسپا مانگپو جونگ، یانگ زونما ایمان چانگونّی کانیانگ نگا جیگسپا جونگ۔ 27 نگے توس رینگمو لاس ثانٹے چوسپین، تشان مانگپوجیگ نییدمیدپا لوس، لان مانگپو ستوگری تانگ سکومسریا لوستے زاگیو میدپین، یانگ گونگیو مانگپو میدپا ڈانگموانگ یونگس۔ 28 تیگونّیکا نانما عبادت خانہ تشانگما ایمانی نانّگا کازوگشیگ یودڈو سامستے، نگا جاگدانگ تشیرکھا یونگس۔ 29 کھیوجاگونّی ٹوا ایمانی نانّگا شیدمید اینکھانگون، نگا ہاگواراگ۔ ایمان چانگون ٹانگپو مانکھانّی لامیکا ٹھیدکھانگونّیکا نگا ماثانٹے ثو راگ۔ 30 کالتیس نگا پھوسو چوگوسنا، تینے نگے تانتانلا نگارانگ اُتھوکس ستانکھانبویکا پھوسو چوین۔ 31 نگاتانگونّی حضرت عیسیٰ مسیح یاب خُدے، توسگیون ستودپے اوسپا تھوبچیس اینکھانبوے نگے تیگون زون ماتانگکھانبو کھیینّا زادّانوگ۔ 32 نگا دمِشق گی گیالسے نانّگا یود زانے، گیالپو اریتاسّی کالون نی، گیالسے گھوگونّیکا نگا زومچیسّی پھیا ثونگسکھانگون بورتے دوگپین۔ 33 اِین نانگ کھو تانگ کھوے ثونگکھانگونّی کانے شورچیسلا، نگا تسیپوجیگی نانّگا گیالسے سیگپے نانّگا یودکھانّی کارکھونگ گیُودتے، تُھورلا پھابس۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation