تیموتھِی ۱ 5 - New Testament in Ladakhi Langage

انے مارانگمو، رگادمی تانگ، تشیوگ گُونی سکورلا لابجا۔

¹ رانگی سانگ چھیمیجیگّا کھاسکییستے سپیرا ماتانّگا، کھوا رانگی ابا ژوگس سامستے لدینبے لامیکا ڈولچیسلا سپوسپا تونگ، یانگ ژونّوگونلا رانگی نو ژوگس سوم۔

² تینّا تسوگسلا بومو چھیمیگونلا کھیرانگی اما یانگ بومو ناچھونگّونلا سیمس ژانگما نیامپو رانگی سترِنگمو ژوگس سوم۔

³ انے مارانگمو ستاستوگ چوکھان میدکھانگونلا، ستاستوگ چوستے سیوا تونگ۔

⁴ اِین نانگ کالتیس تے انے مارانگموبوا ٹھوگو، یا تشاو، تشامو یودنا، تیگونّی رانگی نانگمیگونلا ستاستوگ چوستے گوما کھورانگونّی ایمان بو لاگلینّی نانّگا کھیونگ گوشیس اینوگ۔ پھاما، ابی تانگ میمے گُونلا ستاستوگ چوستے کھونگونی ٹینلان لوگکھانگونّی لاسپوا خُدے تھوگسدادّا زادّانوگ۔

⁵ تا نانگتشانگس میدپا چیگپو لوسکھانّی بومو، کھورانگی ریوا خُدے نانّگا بورتے، تشاننین میدپا روگس چوا زاد زیرتے دُعا ژوکھانبو نی نگوسمے انے مارانگمو اینوگ۔

⁶ اِین نانگ رانگدود ڈوبچوگچیسّی نانّگا میتشے پھودکھانّی انے مارانگمو گُون سونتیا یودتیانگ، رُوحانی تھوگنے شیتے اینوگ۔

⁷ سوجیگیانگ ایمان چانگونّی گیابگالّا سکیون کال مینیانچیسّی پھیا، تے لابجاگون تونگ۔

⁸ اِین نانگ رانگی نیینڈونگّونلا، میگسالّی کھورانگونّی نانگمیگونلا ستاستوگ ماچوکھانگونّی کھورانگی ایمان پھانگستے اینوگ۔ یتسوگسّی میگون، ایمان میدکھانّی سانگ تھوا اینوگ۔

⁹ روگس چوگوشیسّی تھوے نانّگا مینگ چوگستے یودکھانّی انے مارانگموبو۔ کھورانگی ماگپا نیامپو ایمان چان، کھوے لو ڈوگچو یا مانّگا،

¹⁰ لاس زانگپوگونّی جاستے مینگچان، سپیرنا ٹھوگوگون گیالّا چوستے لدانچوگکھان، بیسپاگونلا گاسوس جوکھان، ایمان چانگونلا پاسمو نیامپو جابستوگ جوکھان، ردوگنگالّی نانّگا یودکھانگونلا روگس چوکھان، یانگ لاس زانگپوے ریگس تشانگما چوچیسلا ڈالڈیگ دُوگکھان۔ تے سچودپا تشانگما کھوے نانّگا یونگّوس۔

¹¹ اِین نانگ مینگتھوے نانّگا انے مارانگمو ناچھونگّون یونگ ماگوس، چیازیرنا کھونگونی زوگسپوے دودپے یانگسکیار باگستون چونیینڈوس پاسانگ مسیحا جابستوگ چوچیسّی کھاچھادّی نانّگا گھاگسکیل کھیونّگانوگ۔

¹² تینے کھونگونی سنگونلا کھاچھاد چوسکھانبو چاگسپا کھورانگّونّیکا ٹھیمسچاد کھیونّگانوگ۔

¹³ یانگ کالتیس کھونگون مینگتھوے نانّگا یودنا، کھونگون لاسمیلام گیورتے کھانگپا چیگنے چیگی نانّگا سپیرمین تانگین، کھورانگونّی توسگون پھودین، جانما میگونّی لاسّی نانّگا تھیسّتوگ، یانگ تانگوس میدکھانّی سپیرا ریگّانگ تانگین۔

¹⁴ سونگپاسانگ تے انے مارانگمو ناچھونگّونلا یانگسکیار باگما چوستے ٹھوگو جورچوگچیس، یانگ کھورانگونّی کھانگپے ستاستوگ چوچیسلا نگے کھادا تانّگاد۔ تینے ڈاو ، کھونگونی گیابگالّا چیجیگّانگ زیر مینیان۔

¹⁵ چیازیرنا انے مارانگمو ناچھونگ کھاچیگ خُدا گیاب گیور تشارتے شیطانی گیابنے ڈولدوگ۔

¹⁶ کالتیس بومو ایمان چانجیگّا، انے مارانگمو نینڈونگ ریگ یودنا، کھوے تیگونلا ستاستوگ چوگوس، یانگ تے کھاگپو عبادت خانہ سیکا کال ماگوس۔ تینے عبادت خانہے نگوسپوا ستاکھان میدکھانّی انے مارانگموگونلا ستاستوگ چونیانین۔

شریعتی لابکھان گون ی سکورلا۔

¹⁷ عبادت خانہے لاس چوکھانّی اُسکیونگونلا سیوا تانگ روگس چوگوشیس اینوگ، میگسالّی چھوسشادچیس تانگ لابجا تانگچیسّی نانّگا سونڈوس ثانٹے چوکھانگونلا۔

¹⁸ چیازیرنا شوقبُو بوے نانّگا ” کھیرانگونّی یولتھاگّا سکورکھانّی لانگتوا زاچیسنے کھا کاگ ماگوس“ یانگ ”لاس چوکھانگونلا پھوگسّی اوسپا اینوگ“ مولتے دوگ۔

¹⁹ اُسکیونگ جیگی گیابگالّا سکیون رجود چوادنا، تیگونلا تےتےتشوگپا مانیان، نامتشوگپا گواہ نیس یا سومی تیبوے سکورلا تانتان میچو۔

²⁰ دِیگپا چوکھانّی اُسکیونگونلا عبادت خانہ گانگپوے لدُونلا کھاسکییگوس؛ ایبو جانماگونلانگ لدامجاگ چھینموجیگ گیورین۔

²¹ نگا حضرت پولُسی تِیمُتھیُس کھیورانّگا خُدے، حضرت عیسیٰ مسیح تانگ خُدے لدامّا زادکھانّی فرشتاگونّی لدُونلا ای لابجاگونلا کھانیانتے سوجیگّانگ چھوگریس ماچوا، لاگلین چوچیسلا کاتانّگاد۔

²² شریعتی اُسکیونگ لدامچیسّی نانّگا بانگیوگس ماتانگ، کالتیس تانگنا تینے کھوے دِیگپے نانّگا کھیورانّگانگ ڈیساین۔ کھیرانگ رانگ رانگ ژانگما بور۔

²³ چھو کیانگ تھونگین مادوگ، کھیرانگی ٹودپے پھانتھوگسّی پھیا چھانگ نیونگون ریگّانگ تھونگ، چیازیرنا کھیورانّگا زُومو یونگین دوگدوگ۔

²⁴ می کھاچیگی دِیگپاگون سالپو تھونّگانوگ، تیگونّی دِیگپاگون خُدے ٹھیمسچاد زادسے ناسّا کھونگونی سانگ سنگونلا لیباین۔ اِین نانگ جانگونّی دِیگپاگون ستینگنے مانے میسنگون۔

²⁵ تینّا تسوگسلا می کھاچیگی لاس زانگپوگون سالپو چوستے تھونگدوگ۔ اِین نانگ کالتیس سانگوے نانّگا لاس زانگپو چونا، یگون توسگیونّی پھیا واستے بور مینیان۔