تیموتھِی ۱ 4 - New Testament in Ladakhi Langage

زوسمے لوبپونگونّی گیابگالّا سپانگ پھودس۔

¹ ہلژخمہ رُوح بوے سالپو چوستے مولتے دوگ، تھامے توسلا ایمان چوکھان کھاچیگی کھورانگونّی ایمان سپانگستے گوبسکور تانگکھانّی سیمسنید تانگ ردودّی لابجاگونّی گیابنے ڈانگستے چھین۔

² تے لابجاگون کھاچھوس چوکھان تانگ زونجان گُونی کانے یونّگانوگ، کاگونّی رُوح بو شیتے این پاسانگ، کھونگونی دِیگپاگونلا سکیون رجود چوا مانوگ۔

³ تیگونّی ایمان چانگونلا باگستون چوچیس تانگ کھارجی ریگس کھاچیگ زا میچھوگس زیرّانوگ۔ اِین نانگ خُدے لدینبا شیستے ایمان چوکھانگونلا کھونگی زاچیسّی ریگس تشانگما شُکر نیامپو، زالا چوا زادتے اینوگ۔

⁴ خُدے چوا زادکھان تشانگما زانگپو این پاسانگ، نگاتانگونّی تیگون چیگّانگ پھانگ ماپھانّگا شُکر نیامپو لینگوس۔

⁵ چیازیرنا خُدے حُکم تانگ نگاتانگونّی کھونّگا تھوگرجیچھیے دُعا گونی جاستے تیگون ژانگما چوا زادتے اینوگ۔

حضرت عیسیٰ مسیح جابستوگپا زانگپوجیگ گیورچیس۔

⁶ تِیمُتھیُس کالتیس کھیرانگی فونو گُونلا تیگونّی سکورلا ہاگوچوگنا، کھیرانگ حضرت عیسیٰ مسیح جابستوگپا اوسپاچانجیگ گیورین، کا بو کھیرانگی میتشیے نانّگا ایمانی دینباگون لوبستے، لابجا زانگپوے گیابنے ڈولچیسپوے، شیدچان گیورتے این۔

⁷ رین میدکھان تانگ لدینبا مانکھانّی چوسمی رونگسگونّی سکورلا دزینگمو تانگین، کھیرانگی توس تساپیگّانگ گودلا ماتانّگا، خُدے سچودلامّی نانّگا رانگی میتشیبو مانّگا یارگیاس چھاچوگاین پھود۔

⁸ کھیورانّگا ای زیرلوبو گیوسیودتے اینوگ۔ ”سالیانگس سیستے زوگسپوا یارگیاس چوچیسپوے، پھانتھوگس ژاپیگ یودتے اینوگ۔ اِین نانگ تیسانگ مانّگا پھانتھوگس نی، خُدے سچودلامّی نانّگا یارگیاس چوچیسپو اینوگ۔ چیازیرنا تیبوے نگاتانگونلا ای میتشے تانگ شیتے ستینگنے تھوبچیسچانّی میتشے نیسکوے پھیا پھانتھوگس چوانوگ۔“

⁹ تے زیرلوبو ایمان چان اینوگ، یانگ تشانگمے تھےژومس میدّا، ایمان چوگوشیس اینوگ۔

¹⁰ تینّابویپھیا نگاتانگونّی سونڈوس چوستے باردو کھورّانوگ، چیازیرنا نگاتانگونّی ریوابو نی، سونپو خُدے نانّگا یودتے اینوگ، کا لام بو میتشانگما تانگ میگسالّی ایمان چانگون کھوم چُوک کھن بو جُوگستے این۔

¹¹ کھونگونلا ای لابجاگون لوب، یانگ تیگونّیکا لاگلین چوچیسّی کا تونگ۔

¹² کھیرانگ، ایمان چانگونّی پھیا سپیرا تانگچیس، میتشے پھودچیس، چامسپا چوچیس، ایمان یانگ سانگمے تھوگنے سپیجیگّا گیور۔ کالتیس تیزوگ چونا کھیرانگ ژونّو اینچیسپوے سیوا میچو سامکھانگون گھاگاین۔

¹³ نگا یونگیونگ تشوگپا، کھیرانگی توس مانگچھیا عبادت خانہے لدُونلا ہلژخمہ شوقبُو سیلچیس یانگ چھوسشادچیس تانگ خُدے لدینبے سکورلا لابچیسّی نانّگا پھود۔

¹⁴ کھیورانّگا خُدے سالکھانّی کھیود پو گودلا چھا ماچوگ، کا بو کھیورانّگا شریعتی لابکھان گون ی کھیرانگی کا کھونگرانگونّی چھاگّون بورتے، کھیرانگی سکورلا لونگستانگون سال زانے تھوب۔

¹⁵ نگے لابجاگونلا سنانّگا بورتے، سنینگ گانگپو نیامپو لاگلین چوس، تینے می تشانگمے کھیرانگ رُوحانی تھوگنے یارگیاس چھاکھانبو، تھونگ تھوبین۔

¹⁶ کھیرانگی میتشے پھودچیس یانگ کھیرانگی لابجاگونلا ستاگچاد چوس، توسگیون تیتسوگس چوین دوگشیگ۔ کالتیس تیزوگ چونا، رانگی میتشے تانگ کھیرانگی لابجا نیانکھانگونّی میتشیانگ سکیوبین۔