تیموتھِی ۱ 1 - New Testament in Ladakhi Langageحضرت پولُسی چھوگسنے سلام جْوس ۔ 1 نگاتانگونّی کھوم چُوک کھن خُدے تانگ نگاتانگونلا ریوا سالکھانّی حضرت عیسیٰ مسیح گُونی، نگا حضرت پولُس حضرت عیسیٰ مسیح رسُول گُونلا سکوا زادس۔ 2 نگے ایمانی نانّگا لدینبے بُوژا اینکھانّی تِیمُتھیُس کھیورانّگا ڈِیاد۔ خُدے یاب تانگ نگاتانگونّی حضرت عیسیٰ مسیح ا گُونی کھیورانّگا شزدے، سنینگرجے تانگ، جیدے سالّا زادشیگ۔ 3 نگا مکدنیہ چھا زانے، نگے کھیورانّگا اِفسُس سی نانّگا دوگچیس تانگ خُدے سکورلا زُوسما لابجا تانگکھانگون گھاگچیسلا ماثانٹے سپوسپا تانگسپین۔ 4 یانگ زوسمے رومس تانگ کھورانگونّی اولاد ی تھورینگمو گُونی سکورلا ٹابس چوین توس گودلا میتانگچیسلا کا تونگ۔ تے لاسگونّی میگونلا خُدے پھیا ایمان چانّی میتشے جیگ پھودچیسّی نانّگا روگس چوا مانوگ، اِین نانگ تونمیدّی دزینگمو چھا چوگّانوگ۔ 5 نگے لابجے میگژیبو نی ایمان یودکھان تشانگما سنینگ زانگپو، سیمس لاگمو تانگ لدینبے ایمان گونّے یونگکھانّی یاشے گانگسچیسپو این۔ 6 اِین نانگ ای زوسمے لوبپونگونّی تے لابجا زانگپو تشانگمالا گیاب لوگستے تونمیدّی گورگیانگونّیکا ڈولدور چوروگ۔ 7 شریعتی عالِم لوبپون گُون گیورچیسّی دودپا نیامپو، کھونگونی تیگون تھےژومس میدپا شادنانگ، نگوسپوا کھونگونی شادکھانبو کھورانگّونلا ہاماگوا اینوگ۔ 8 کالتیس شریعت خُدے تھابس نانگجینلا کولنا، زانگپو اینکھانبو نگاتانگونلا گیوس اینّوگ۔ 9 چیازیرنا شریعت پو لاس ٹانگپو چوکھانگونّی پھیا ماچوا شریعت میدکھان، گیابگال چوکھان، خُدے جیگسّی نانّگا ماڈولکھان تانگ دِیگپاچانگون ماتشاد، چانگ ہلژخمہ ماسیکھان، ہلژخمہ گون سوگپو چوکھان، ابا یا اما سادکھان یانگ میسادکھانگونّی پھیا چوستے اینوگ۔ 10 شریعت پو لوسڈیل نگانپا چوکھان، بُوژا تانگ بوتشے پارلا یا بومو تانگ بوموے پارلا لوسڈیل چوکھانگون، تشییوگی پھیا میگون تسونگکھان، زونجان، ٹھیمسکھونگی نانّگا گواہ زون تانگکھان تانگ لابجا زانگپوے گیابلوگ چوکھانگونّی پھیا اینوگ۔ 11 تیگونّی گیابلوگ چوکھانّی لابجا زانگپوگون، شان چانّی گاموےناتسُولنے چونّگانوگ، کا بو برکت چانّی خُدے نگے لاگا ستادا زادتے این۔ خُدے سنینگرجے پھیا شُکر جْوس ۔ 12 حضرت عیسیٰ مسیح نگاتانگونّی مسیح کابوے نگا کھونگرانگی چھاگلاس گُون زادچیسلا ستوبس سالّا زادس، کھونّگا نگے شُکر جُواد۔ کھونگی نگا ایمان چانّی میجیگ سیا زادتے کھونگرانّگا جابستوگ چوچیسّی پھیا سکوا زادس۔ 13 جان نگا نلوق چھوکھانن، ایمان چانگونلا ناگسّتانتے نودسکیالکھان اینتیانگ، خُدا نگیکا سنینگرجے سکییا زادس، چیازیرنا تیگون نگے مسیحا ایمان ماچوکھان تانگ لدینبے لابجاگون ماشیسکھان ینّی توسلا چوستے اینپین۔ 14 نگاتانگونّی مسیح، تسامشیگی سنینگ پھیستے سالکھان تانگ شزدے چانجیگ جُوگستے میروگ۔ کھونگی، نگا حضرت عیسیٰ مسیح نا چونگکھانّی ایمان تانگ چیسپے سکانّگا زادس۔ 15 ای ژالتاگون ایمان چان اینپا، می تشانگمے تیگونّیکا ایمان چوگوسشیس اینوگ، ”حضرت عیسیٰ مسیح ای دُنیائی نانّگا دِیگپاچانگون سکیوبالا سکیودس۔“ تے دِیگپاچانگون ٹونے نگا تشانگمیسانگ تھوشوگپو اینپین۔ 16 اِین نانگ حضرت عیسیٰ مسیح کھونگرانگی زودسیمس چھینموے سپیجیگی تشولّا نگا، دِیگپاچان تھوشوگپو کولّا زادچیسّی پھیا خُدے نگیکا سنینگرجے سکییا زادس۔ تے سپیبوے حضرت عیسیٰ سی یکا ایمان چونا، تھامیدپے میتشے تھوبتھوبچیسپو جانماگونلا ہاگوتھوباین۔ 17 کھونگ نی تھامیدپے گیالپو، جال ماجالکھان، مانے میڈونگسکھان، یانگ کھونگرانگ چیگپو خُدے جُوگستے اینوگ۔ کھونّگا سیوا تانگ سپال گُون، تُوسگیُونّے گیُون تھوبشیگ۔ امین۔ تِیمُتھیُس کھاگّون۔ 18 نگے بُوژا تِیمُتھیُس، کھیرانگی سکورلا سنگونلا لونگستان شادکھان نانگجین، نگے ای لابجاگون کھیورانّگا تانّگاد۔ ای لابجاگونّی، کھیورانّگا مسیح ماگی نانّگا گیالکھا تھوبچیسلا روگس تھوبشیگ۔ 19 مسیح نانّگا کھیرانگی ایمان بو ستانپو تھامستے دوگ، یانگ کھیرانگی سیمس نونگسمید بور، چیازیرنا می کھاچیگی ای لابجابو پھانگس پاسانگ، کھونگونی ایمان بو ٹھیسّتور سونگتے اینوگ۔ 20 ہُمنیُس تانگ اسکندریہ نیسکو، تیبوے سپیجیگ اینوگ۔ کھونگونلا خُدا تتلوکمیچوچیسپو ہاگوچیسّی پھیا، نگے کھونگون عبادت خانہے ٹونے پھینگستے شیطانی لاگا ستادپین۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation