པི༌ཏྲར༌ 1 4 - New Testament in Ladakhi Langage

میتشے ہلژخمہ جیگ پھود۔

¹ زوگسّی تھوگنے مسیح ناگس تانگ باردو نیوا زاد پاسانگ، کھیوجاگونّی سامتشولّانگ کھونگ ژوگس یونگچیسلا ڈالڈیگ چوشیگ، چیازیرنا مسیح پھیا زوگسّی تھوگنے ردوگنگال نیونگکھانگونّی دِیگپا چوچیسّی دودپا پھانگستے اینوگ۔

² تیبوے جاستے کھیوجاگونّی دُنیائی نانّگا لوسکھانّی میتشیبو، دُنیائی دودپا نانگجین ماپھودّا، خُدے تھوگستھاد نانگجین پھودّانوگ۔

³ کھیوجے رانگی میتشے ایمان میدکھان گُون تسوگسلا پھودچیسپو تا پھانگوس، سپیرنا تھامیدپے لوسڈیلّی دودپا، لوسڈیلّی دودپا ثانٹے چوسچیس، راروسروس چھانگ تھونگچیس، ڈونتانگین راروشیسّی زاسگون لینتے ٹانبا ستورچیس تانگ، سکونڈا گُونلا چولچیسّی کھاملوگ لاسگون۔

⁴ کھیوجا سنگونمے دزاوگونّی لوبس نگانپاگونّی ستینگرانگنے بالنگ میتانگچیسپوے کھونگون ہالاستے کھیوجاگونّی سکورلا سپیرا نگانپا زیرّانوگ۔

⁵ اِین نانگ شیکھان تانگ سونتے نیسکویکا شاگس زادّالا ڈالڈیگ یودکھانّی خُدے لدُونلا کھونگونلا سیروگ تانگوسین۔

⁶ تینّابویپھیا شیتے میدکھانگونلانگ، گاموےناتسُولبو شادتے اینپین، جان میی تشولّا تیگونلا شیچیسّی شریعت پھوگتے اِین نانگ ، رُوح بوے نانّگا کھونگون خُدے نیامپو سونتیا لوستے اینوگ۔

⁷ دُنیائی نانّگا یودکھان تشانگما میدکھان چھاچیسّی توس نیموا لیبتے اینپا، دُعا چوچیسلا سنانّگا ستانپو تانگستے رانگسیمس چونتے بورشیگ۔

⁸ تشانگمیسانگ کھاگچان سپیرابو نی، چیگ تانگ چیگی نانّگا چامسپا چوشیگ، چیازیرنا چامسپے دِیگپا مانگپوجیگ کابّانوگ۔

⁹ کھیوجے کھانگپے نانّگا یونگکھانگونلا سنینگ پھیستے گاسوس ژوشیگ۔

¹⁰ خُدے شزدے مانگپوے نانگنے، کھیوجا کھیود سالکھانبو کھیوجا ریرے گیالّا چوستے چیگ تانگ چیگّا جابستوگ چوچیسّی نانّگا کولشیگ۔

¹¹ چھوسشادچیسّی کھیود یودکھانگونّی، خُدے کھونگرانگیکا کھیوجا گیُودتے شادّا زادّا تسوگسلا شودشیگ۔ یانگ جابستوگ جونا، خُدے سالکھانّی ستوبسپو نیامپو ژوشیگ۔ تینے کھیوجے چوکھان تشانگمے خُدا حضرت عیسیٰ مسیحاگیُودتے ستودپا کھیونگین۔ کھونّگا سپال تانگ وانگ تشانگما تُوسگیُونّے گیُون تھوبشیگ، امین۔

مسیح پا اینچیسپوے ناگس تھونگچیس۔

¹² چیسپے دزاوگون، کھیوجاگونلا میے نانّگا بودکھان ژوگس ردوگنگالّی تشودلتا تھونگکھانبوا، یامتشان اینوگ سامستے کھیوجا ہا مالاسشیگ۔

¹³ اِین نانگ گامو چوشیگ، تے تشودلتے کھیوجاگون مسیح ردوگنگالّی نانّگا ڈیسچوگّانوگ، تیبوے جاستے کھونگی شان دُنیا گانگپوا سنگون چوگّا زاد زانے، کھیوجاگون معجزہ تھادپو چھین۔

¹⁴ کالتیس مسیح کا ایمان چوچیسپوے، سپیرا سوگپو زیرتے ٹھیلپا چونا، کھیوجا برکت چان این، چیازیرنا خُدے سپالچانّی رُوح بو کھیوجاگون نیامپو جُوگستے اینوگ۔

¹⁵ کھیوجاگونلا ردوگنگال چونگکھانبو، می سادتے، کونما کوستے، شریعت چاگستے، یا جانمے لاسّی نانّگا تھیسّتوگ تانگچیسپوے یونگ ماگوس۔

¹⁶ کالتیس کھیوجا مسیح پا اینچیسپوے ردوگنگال چونگنا، ٹھیلبا ماتشور، اِین نانگ می تشانگمے کھیوجا مسیح اینکھان شیسشیسپوا، خُدا ستودپا پھولشیگ۔

¹⁷ تا خُدے رانگی میگونّی کانے گوزوگ زادتے ٹھیمسچاد زادچیسّی جاگپو لیبتے اینوگ۔ کالتیس نگاتانگ مسیحا پا گونّے گوزوگنا، خُدے گاموےناتسُولّا کھا مانیانکھانگونّی ناسلوگپو کازوگشیگ یونگین؟

¹⁸ کازوگ ہلژخمہ شوقبُو بوے نانّگا مولّا زادتے دوگ۔ ”تا ڈانگپوگونلا ما کاگسپو نیامپو تھارپا تھوبنا، دِیگپاچان تانگ خُدا ماجیگسکھان گُونلا چی میچھا۔“

¹⁹ تینّابویپھیا خُدے تھوگّونگس نانگجین ردوگنگال تانگ باردو کھورکھانگونّی لاس زانگپو چوین رانگی ثوگپو ایمان چان دزامبولینگ زادکھان، خُدے چھاگّا ستادگوشیس اینوگ۔