པི༌ཏྲར༌ 1 3 - New Testament in Ladakhi Langage

ماگپا تانگ ناما گُونی پھیا لابجا۔

¹ تینّا تسوگسلا ناماگون رانگی ماگپے وانگی یوگا دوگشیگ۔ کالتیس کھاچیگی گاموےناتسُولّا ایمان ماچونانگ، کھیوجاگونّی میتشے پھودتشولبوے جاستے کھیوجا شادگوس میدپا کھونگونی سنینگی نانّگا گیورجا یونگستے ایمان چوین۔

² کھیوجاگونّی سیمس لاگمو تانگ رانگی ماگپا سیوا چوچیسپو تھونگتے، کھونگونی مسیح کا ایمان کھیونگین۔

³ پھیلوگی لوسّی تھوگنے دزیسمو چوچیسّی سونڈوس ماچوشیگ، سپیرنا ثاگون جیلجیلّا پھودچیس، سیرّی گیانچھا تاگچیس یانگ کوس رینچان گونچیسگون۔

⁴ اِین نانگ سیمس پاسمو تانگ بولمو چوستے کھیوجارانگ سیمسّی نانّگا دزیسمو چوشیگ، یتسوگسّی سچودلامگون خُدے سکوندونلا ما رینچان اینوگ۔

⁵ چیازیرنا سنگونمے توسلانگ، خُدایکا ایمان بورکھانّی بومو ہلژخمہ گونّی، تینّا تسوگسلا زابادپین، یانگ کھونگرانگّون رانگی ماگپے وانگی یوگا بورّادپین۔

⁶ سپیرنا حضرت سارہ زیرکھانّی بوموے رانگی ماگپا حضرت اِبراہیم کھانیانتے کھونّگا رانگی مالِک تھیادپین۔ کالتیس کھیوجے ماگپاگونّی چی چوس تانگین سامستے جیگس ماجیگسّا اوسپا اینکھانبو چونا، کھیوجاگونّانگ سارے بوموگون تھیا زادِین۔

⁷ تینّا تسوگسلا کھیوجا ماگپاگونّی رانگی ناما نیامپو میتشے پھود زانے، بوموگون کھیوجے سانگ شیدمید این پاسانگ، کھونگون نیامپو بولمو یانگ خُدے میتشے سومے شزدے ّی نانّگا، کھونگونانگ ڈانڈا کھاگ یودچیسپوے کُوسپا چوشیگ۔ تیزوگ چونا خُدے کھیوجے دُعا گُون سانّا زادِین۔

زانگپو چوچیسّی پھیا ردوگنگال تھونگین ۔

⁸ ستینگجوگا، کھیوجا تشانگما سیمس چیگ سونگتے دوگشیگ، چیگ تانگ چیگّا سنانّگا بور، چامسپا، سنینگرجے، تانگ سیمس پاسمو چوشیگ۔

⁹ نگانپے لانلا نگانپا ماچوشیگ، یانگ سوجیگی کھیوجے سکورلا سپیرا سوگپو زیرنا تیبوے لانلا کھیوجیانگ تیتسوگس ماچوا، تیبوے تشابسلا تیگونلا برکت تونگشیگ۔ چیاجونا خُدے کھیوجاگون تینّابوے پھیا بودّا زادتے اینوگ، یانگ تیزوگ چونا کھونگی کھیوجاگونلا برکت سالّا زادِین۔

¹⁰ ہلژخمہ شوقبُو بوے نانّگا مولتے دوگ۔ ”کالتیس کھیوجا میتشے نانّگا سکیدپو یانگ جاگ زانگپو مانگپو تھونگچیسّی دودپا یودنا، کھیوجاگونّی لچیا سپیرا نگانپا یانگ کھالپاگّا زون تانگ ماچوگشیگ۔

¹¹ نگانپا گیاب لوگستے زانگپو چوسشیگ۔ سنینگنے جیدے ژالتے تیبوے گیابنے بانگتونگشیگ۔

¹² چیاجونا خُدے می ڈانگپوگونلا زیگستے تیگونّی دُعا گُون سانّا زادّانوگ۔ اِین نانگ نگانپا چوکھانگونّے، کھونگی ژال گیورّا زادّوگ۔“

¹³ تا کالتیس زانگپو چوالا رینگسّادنا، سوی کھیوجاگونلا نودپا سکیالین۔

¹⁴ کالتیس کھیوجا لاس زانگپو چوچیسپوے ردوگنگال تھونگنانگ، خُدے برکت سالّا زادِین۔ تے جیگسنانگ ستانکھانگونلا ماجیگ شیگ یانگ ماتشیرشیگ۔

¹⁵ رانگی سیمسّی نانّگا مسیحا نی، مسیح اینکھانبو سیگوس۔ یانگ کالتیس سوجیگی کھیوجے مسیح نانّگا ریوا یودکھانّی سکورلا ہاگوچیسلا سارچود تانگنا، تیگونلا لانتانگچیسلا توسگیون ڈالڈیگ دوگشیگ۔

¹⁶ اِین نانگ تیگون سیمس پاسمو تانگ کُوسپا نیامپو چوشیگ۔ مسیح نانّگا کھیوجے زانگپو سچودپے سکورلا سپیرا سوگپو زیرکھانگون، کھونگرانگونّی زیرکھانّیکا ٹھیلبا چھاچیسّی پھیا سیمس نونگسمید بورشیگ۔

¹⁷ کالتیس خُدے تھوگّونگس اینّابو اینّا، کھیوجاگونلا نگانپا چوے سانگتا زانگپو چوستے ردوگنگال تھونگنا گیال۔

¹⁸ مسیحا نگاتانگونّی دِیگپے تونلا ردوگنگال نامستے توسگیونّی پھیا لانچیگ ڈونگسّا زادس۔ مسیحا ٹانگپو جُوگستے اِین نانگ کھونگ دِیگپاچانگون پھیا ڈونگسّا زادتے نگاتانگون خُدے تانگ نیمو کھیونگا زادس۔ زوگسّی تھوگنے کھونگ ڈونگستے اینپین، اِین نانگ رُوح گیُودتے سونتیا لانّگا زادتے این۔

¹⁹ تیستینگنے کھونگ سکیودتے تسونکھانگی نانّگا یودکھانّی تے سیمسنییدگونلا چھوسشادّا زادس۔

²⁰ تیگون توس مانگپوجیگی سنگونلا حضرت نُوح ٹُھوزینگ چھینمو سیگی توس، خُدے تھوگسزود نیامپو ثونّگا زاد زانے کھونگی کھا مانیانکھانگون اینپین۔ می کھاچیگ یانگنا مینگّو گیادتسا جیگسنانگچانّی چھولوگنے تھارتے اینپین۔

²¹ تے چھولوگپو نی، نگاتانگونلا غوتا لینچیسّی سپیجیگ اینوگ، کابوے داگسا کھیوجاگونلا تھارپا تھوبستے اینوگ۔ غوتا لینچیسپوے زوگسپوے ٹیما ٹھوچیس مانپا، سیمس لاگمو نیامپو خُدا وعدہ چوچُوگّانوگ، تے تھارپابو حضرت عیسیٰ مسیحاسکو سونتیا جانگشیس گیُودتے تھوبتے اینوگ۔

²² حضرت عیسیٰ سی کھونگرانگ نامکھا سکیودتے خُدے چھاگ یاسپا چھوگسلا تخت پیکھہ جوگسا زادتے فرشتا تانگ ستوبس تانگ وانگ یودکھان تشانگمیکا کھونگی وانگثولّا زادّانوگ۔