པི༌ཏྲར༌ 1 2 - New Testament in Ladakhi Langage

¹ تینّابویپھیا زون تانگچیس، کھاچھوس چوچیس، تشیگچیس، میی سچودپے سکورلا سپیرا سوگپو زیرچیسّی سچودپا نگانپا تشانگما پھانگوس۔

² تھارپے برکت گانگپو تھوبچیسّی پھیا ٹھوگو چھونگون سکییسکھان تسوگسلا رُوح بوے اوما لاگمو تھونگچیسلا ثانٹے دودپا چوشیگ۔

³ تا مسیح زانگپو اینکھانّی ٹوت پو کھیوجے نیانگستے اینوگ۔

ردوا سونپو تانگ می لدامّا زادکھان گُون۔

⁴ کھیوجاگون سونپو ردوا، تسوبویکا یونگشیگ، کا بو میگونّی پھانّگا نانگ خُدے لدامّا زادتے کھونگی پھیا رینچان این۔

⁵ کھیوجا ردوا سونپو خُدے رُوح بوے بیت المقدِس سیگچیسلا کولّا زادکھان گُون اینوگ، یانگ کھیوجا کھونگی اِمام ہلژخمہ، کاگونّی حضرت عیسیٰ مسیحاگیُودتے خُدے سکوندونلا اوسپا اینکھانّی رُوحانی چھودپا پھولّانوگ۔

⁶ ہلژخمہ شوقبُو بوے نانّگا خُدے مولّا زادتے دوگ۔ ”ستوسشیگ یروشالیمّی گیالسے نانّگا نگے لدامسکھانّی ڈوردو رینچانجیگ بورّاد۔ سوجیگی کھونگی کا ایمان چوین تے می بو مانے ٹھیلبا میچھا۔“

⁷ تا کھیوجا ایمان چوکھانگونّی پھیا تے ردوابو، ما رینچانجیگ این۔ اِین نانگ ایمان ماچوکھانگونّی پھیا، ”کا ردوابو سیگسپونگونّی رینمید سامستے پھانگستانگس، تے ردوابو ڈوردوا رینچانبو گیور۔“

⁸ یانگ ”کھونگ نی میگون گھاگیابس چوگکھانّی ردوا تانگ تیگون گیلچوگکھانّی پھولونگس ژوگس اینوگ۔“ تیگونّی خُدے کا کھا مینیانچیسپوے، غاگ گیابّانوگ، تینّابو، کھونگونی پھیا خُدے تھوگّونگس اینپین۔

⁹ اِین نانگ کھیوجاگون نی خُدے لدامّا زادکھانّی میگون، گیالریگسّی اِمام ، گیالکھاب ہلژخمہ تانگ خُدے کھونگرانگی میگون اینوگ، تینّابوے جاستے کھیوجاگونلا مونڈیگنے کھونگی معجزہ اودّی نانّگا بودّا زادکھانّی خُدے چھاگلاس زانگپوگونلا کھیوجے ستودپا پھول نیانین۔

¹⁰ سنگونلا کھیوجاگون میریگسشیگ مانپین، تا خُدے میگون گیورتے اینوگ۔ سنگونلا کھیوجاگونلا سنینگرجے ماتھوبّا اینپین، تا سنینگرجے تھوبتے اینوگ۔

¹¹ چیسپے فونو گون، کھیوجارانگون رُوحانی گیابگالّا نولین دوگکھانّی دِیگپے دودپاگونّے تھاگرینّگا بورتے ای دُنیائی نانّگا ڈونپو تانگ بیسپا گُون تسوگسلا میتشے پھودچیسلا سپوسپا تانّگاد۔

¹² ایمان میدکھانّی کھییمتشیسپاگونّی ٹوا، کھیوجاگونّی میتشے زانگپوجیگ پھودشیگ، جان کھونگونی کھیوجاگونلا نگانپا چوستے اینوگ زیرتے نیادگال تانگنانگ، کھونگونی کھیوجاگونّی لاس زانگپوگون تھونگچیسپوے، خُدا ستودپا پھولین، نام کھونگ دُنیائیکا ٹھیمسچاد زادّالا سکیودین ۔

وانگثولپاگونّی کھانیانچیس۔

¹³ خُدے سیوے پھیا کھیوجاگون ای دُنیائیکا وانگ یودکھانگونّی یوگا دوگشیگ۔ تشانگمیسانگ وانگ چھیشوگ یودکھان گیالپو،

¹⁴ یا گیالپوے کالون، کاگون میوسپْا چوکھانگونلا چھادپا چادچیس تانگ، اوسپا چوکھانگونلا ستودپا تانگچیسّی پھیا کھیوجا یودسا کالتے این۔

¹⁵ خُدے تھوگّونگسپو کھیوجاگونّی لاس زانگپو چوستے، سامبا میدکھانگونّی تونتاگ میدکھانّی سپیراگون گھاگچیسپو اینوگ۔

¹⁶ کھیوجے رانگوانگچانّی میگون تسوگسلا میتشے پھودشیگ، اِین نانگ خُدے جابستوگپا این پاسانگ، کھیوجاگونّی رانگوانگبو نگانپا چوچیسّی نانّگا ماکولشیگ۔

¹⁷ تشانگمالا کُوسپا، فونو گُونلا یاشا، خُدا جیگسشیس تانگ گیالپوا سیوا چوسشیگ۔

¹⁸ خُدے جیگس تانگ سیوے نانّگا کھیوجا تشییوگّونّی مالِک زانگپو تانگ بولمو یودکھان چیگپو مانپا نگانپا سپونبوگونّی وانگی یوگا نگ دوگشیگ۔

¹⁹ کالتیس اوسپا مانکھانّی ناگس تانگ باردوگون زودپا نیامپو کھورین کھیوجاگونّی اوسپے لاسپو چوادنا، خُدے تھوگستھادّا زادّانوگ۔

²⁰ اِین نانگ کالتیس کھیوجے نگانپا چوستے کھیوجا ردونگسکھانبو زودپا نیامپو کھورنا، تینے کھیوجا ستودپا چیا تھوبین؟ تا زانگپو چوستے ناگس کھورتے زودپا بورّادنا، تیبوا خُدے ستودپا سالّا زادِین۔

²¹ کھیوجاگون تینّا تسوگسّی میتشے پھودچیسلا خُدے بودّا زادتے اینوگ، چیاجونا کھیوجاگونّی پھیا مسیح ردوگنگال نامس۔ کھونگ، کھیوجاگونّی پھیا سپیجیگ این، کابویکا کھیوجا ڈولگوشیس اینوگ۔

²² ”کھونگی چانگ دِیگپا مازادس، یانگ کھونگی سوجیگّانگ گوبسکورّا مازادس۔“

²³ کھونّگا نگانپا زیرکھانگونّی لانلا، کھونگی تینّا ژوگس چوا مازادس۔ یانگ کھونگی ردوگنگال تھونگ زانے سوجیگّانگ سدامجاگ تانّگا مازادس۔ اِین نانگ کھونگی کھونگرانگ خُدے چھاگّا ستادا زادس، کابوے اوسپے ٹھیمسچاد زادّانوگ۔

²⁴ نگاتانگونّی دِیگپے دودپاگون میدکھان تانگ میتشے ٹانگپوجیگ پھودچیسّی پھیا، کھونگی کھونگرانگی سکوزوگسّیکا نگاتانگونّی دِیگپے کھوروبو نامستے، کیانگشینگیکا ڈونگس۔ یانگ مسیح سماکھا گیُودتے نگاتانگون پھانچوگا زادس۔

²⁵ توسشیگّا کھیوجاگون لام ستورکھانّی لُوگ ژوگس اینپین۔ اِین نانگ داگسا کھیوجاگونّی سروک سرونکان تانگ لُوگ زی حضرت عیسیٰ مسیح لدُونلا لوگستے یونگستے این۔