པི༌ཏྲར༌ 1 1 - New Testament in Ladakhi Langageحضرت پطرؔس سی سلام جْوس ۔ 1 حضرت عیسیٰ مسیح رسُول نگا حضرت پطرؔس سی کھیوجا خُدے لدامّا زادکھان پُنطُس، گلَتیہ، کپَّدُکیہ، آسیہ تانگ بتُھنیہ یولگونّی نانّگا کھیابستے یودکھانگونّی پھیا ڈِیاد۔ 2 دُنیا زادّی سانگ سنگونلا، خُدے یابّی کھیوجاگون شیستے لدامّا زادتے، ہلژخمہ رُوح گیُودتے ہلژخمہ چوا زادس۔ تیبوے جاستے کھیوجاگونّی حضرت عیسیٰ سی کھانیانس، یانگ مسیح سکو ٹھاقپھوا زادچیسپوے کھیوجاگون ژانگما چوا زادس۔ کھیوجاگونلا شزدے تانگ جیدے مانگنے مانّگا تھوبشیگ۔ تھارپے ریوے پھیا خُدا شُکر ۔ 3 نگاتانگی حضرت عیسیٰ مسیح یاب تانگ خُدا ستودپا پھولشیگ۔ نگاتانگونلا کھونگی سنینگرجے چھینمو زادتے، میتشے سوماجیگ سالّا زادس، چیازیرنا خُدے حضرت عیسیٰ مسیحاشیکھانگونّی ٹونے سونتیا لانّگا زادس۔ تا نگادانگونّیانگ ریوا چھینمو نیامپو میتشے پھودّانوگ۔ 4 تیبو نی نورسکال مانے میرولکھان، مانے تشیتو میچھاکھان تانگ لدانگس مانے مییولکھان کا بو نگاتانگونّی پھیا نامکھے نانّگا بورّا زادتے یود۔ 5 کھیوجاگونّی ایمان گیُودتے خُدے ستوبسپوے کھیوجاگونلا تے تھارپا تھوبتھوب تشوگپا ثونگسکیوب زادّوگ، کا بو ستینگجوگی توسلا، سنگون چوگّا زادچیسلا ڈالڈیگ یود۔ 6 تینّابویپھیا گامو چوشیگ۔ جان داگسا توس نیونگونجیگ، کھیوجاگونلا تشودلتا سوسوے نانّگا ردوگنگال تھونگنانگ، یونگچیسچانّی توسّی نانّگا معجزہ تھادپو نگاتی پھیا ثونگستے یود۔ 7 تے تشودلتاگونّی کھیوجے ایمان لدینبا اینکھانبو ستانّانوگ، کازوگی سیرلا ستاگچاد میے گیُودتے چوستے لاگمو چوانوگ، اِین نانگ کھیوجے ایمان گون سیرّی سانگ مانّگا رینچان اینوگ۔ کالتیس کھیوجاگونّی ایمان بو، تشودلتاگونّی نانّگا ستانپو لوسنا، حضرت عیسیٰ مسیح ا لوگستے سکیود زانے، کھیوجاگونلا ستودپا، سپال تانگ سیوا تھوبین۔ 8 کھیوجاگونّی حضرت عیسیٰ سی ماجالنانگ کھونّگا چامسپا چوانوگ، یانگ داگسا رانگی میگنے ماتھونگنانگ، کھونّگا ایمان چوستے ہالاسشیس تانگ شاد مینیانچیسّی تھادپو چوانوگ۔ 9 حضرت عیسیٰ مسیح کا ایمان چوچیسّی شزدے پو نی، کھیوجاگونلا تھارپا تھوبچیسپو این۔ 10 کھیوجاگونّیکا سنگونچوگچیسّی شزدے تھارپے سکورلا لونگستان زادکھانّی پیغمبر گونّی، گیالّا چوستے سارچود چوا زادس۔ 11 تیگونلا مسیحا ردوگنگال جُونگستے سپال تھوبچیسّی توس تانگ ناسلوگس گُونی سکورلا ہاگوچیسّی دودپا یودپین، کا بو کھونگونی نانّگا یودکھانّی مسیح رُوح بوے کھونگونلا، تیگون چونگی سانگ سنگونلا سنگون چوگّا زادتے اینپین۔ 12 تے پیغمبر گونّی جابستوگپو، کھونگرانگونّی پھیا مانپا، کھیوجاگونّی پھیا اینکھانبو کھونگونلا سنگون چوگّا زادتے اینپین۔ تا کھیوجاگونلا گاموےناتسُول شادکھانگونّی، نامکھانے بابسکھانّی ہلژخمہ رُوح بوے روگس نیامپو شادّانوگ، یانگ فرشتاگونلانگ، ایگونّی سکورلا ہاگوچیسّی دودپا چھینمو یودپین۔ میتشے ہلژخمہ جیگ پھود۔ 13 تینّابویپھیا دُنیائی نانّگا یودکھانگونّی چھوگسلا سامبا ماتانّگا، رانگسیمس چونتے حضرت عیسیٰ مسیحاسنگونّی توسلا تھوبچیسچانّی شزدے تھارپابویکا ستانپو ریوا بورشیگ۔ 14 کھیوجے نانّگا خُدے ماشیسّی سانگ سنگونلا یودکھانّی دودپا نگانپاگونّی گیابنے ماڈولّا، خُدے کھا نیانکھانّی ٹھوگوگون ژوگس گیورشیگ۔ 15 ماتشاد کھیوجاگون بودّا زادکھان خُدے کھونگرانگ ہلژخمہ اینکھان تسوگسلا چیساتھوگنے کھیوجارانگی میتشے ہلژخمہ جیگ پودشیگ۔ 16 چیازیرنا ہلژخمہ شوقبُو بوے نانّگا خُدے، ”نگا ہلژخمہ اینپا کھیوجاگونّانگ ہلژخمہ گیورگوس“ مولتے دوگ۔ 17 یانگ یگون ایدتو بورشیگ، کھیوجاگونّی دُعا پھولکھان، نامکھے یابّی چھوگسریس زادّا مانوگ۔ کھیوجاگونّی چوکھان نانگجینلا کھونگی ٹھیمسچاد یا شزدے سالچیس این پاسانگ، دُنیائیکا میتشیبو بیسپاجیگ تسوگسلا خُدا سیوا تانگ کھونگی جیگسّی نانّگا پھودشیگ۔ 18-19 کھیوجاگونلا گیوس اینّوگ، کھیوجاگون کھیوجے اتا اپو گونّے تھوبکھانّی پھانمیتھوگسّی میتشینے تھارتے این، اِین نانگ تیبو میدکھان چھانیانچیسّی سیر یا مول گُون گیُودتے مانپا، دِیگپا یا سکیونمیدکھانّی لوگو، مسیح سکو ٹھاق رینچان شالتے، نیوا زادتے اینوگ۔ 20 کھونگ دُنیا مالدانی سانگ سنگونلا خُدے لدامّا زادتے اینپین۔ اِین نانگ کھیوجاگونّی پھانتھوگسّی پھیا ای ستینگجوگی جاگّونّی نانّگا کھونگ سنگون چوگّا زادتے این۔ 21 حضرت عیسیٰ مسیح گیُودتے، کھیوجاگونّی خُدے نانّگا ایمان چوانوگ۔ خُدے نانّگا کھیوجاگونّی ایمان تانگ ریوا بورّانوگ، چیازیرنا کھونگی شیکھانگونّی ٹونے، حضرت عیسیٰ سونتیا لانّگا زادتے سپال سالّا زادس۔ 22 تا کھیوجاگونّی لدینبابوا کھانیانچیسپوے، کھیوجا ژانگما گیورتے اینوگ۔ تیبویپھیا مینگثینگ تسوگسلا کھیوجا چیگ تانگ چیگی نانّگا لدینبے چامسپا یونگّوس۔ تا سنینگی تھیلنے چیگ تانگ چیگّا چامسپا چوشیگ۔ 23 کھیوجاگون رولچیسچانّی ساونّے ماسکییا، سونپو تانگ توسگیون جُوگسکھان خُدے حُکم گیُودتے مانے میرولچیسچانّی ساونّے یانگسکیار سکیستے این۔ 24 ہلژخمہ شوقبُو بوے مولدوگ، ”میتشانگما نی سا ژوگس این۔ کھونگونی سپال تشانگما سے مینتوگ ژوگس این۔ سا سکامستے مینتوگ یولّانوگ۔“ 25 اِین نانگ خُدے کا توسگیون لوسین۔ تے کا بو نی، کھیوجاگونلا شادکھانّی گاموےناتسُولبو اینوگ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation