کورینتھیپའ ۱ 9 - New Testament in Ladakhi Langage

مسیح رسُول گُونی تھوبتانگ۔

¹ چی نگانگ جانگون تسوگسلا رانگوانگ میدکیاگّا؟ چی نگا مسیح رسُول مانوگا؟ چی نگے نگارانگی میگنے حضرت عیسیٰ سی نگاتانگونّی مسیح ماجالتوگّا؟ چی نگے مسیح پھیا لاسگونّی جاستے کھیوجاگون مسیح گیورتے مانّا؟

² جانماگونّی نگا مسیح رسُول مانوگ سامنانگ، تانتانلا کھیوجاگونّی پھیا نگا این۔ کھیوجے میتشے پھودتشولبوے نگا مسیح رسُول اینکھانبو ستانّانوگ۔

³ ایبو نگے وانگچھے سکورلا ٹیوا ٹیکھانگونّی پھیا لانبو این۔

⁴ چی نگاجا گُونلا کھیوجے زاچیس تانگ تھونگچیس گُون گوستے زاچیس تانگ تھونگچیسّی تھوبتانگ میدپا اینّوگا؟

⁵ جانیانگ رسُول، مسیح نوگون تانگ کیفاسی چوکھان تسوگسلا، چی نگاجا گُونلا نگاجا رانگی ایمان چانّی ناماگون نیامپو ٹھیدتے کھیرچیسّی تھوبتانگ میدپا اینّوگا؟

⁶ یا رانگی گھوسدومگون ریگچیسّی پھیا لاس چوگوسکھانگون برنباس تانگ نگارانگ چیگپو اینّوگا؟

⁷ چی ماگمیجیگّا کھورانگی بودگوگون شالگوسّانوگّا؟ چی رگونتشاس تابکھانجیگّا کھونگرانگی بادکھانّی کھازاس زاچیسّی تھوبتانگ میدپا اینّوگا؟ چی لوگکھیوا، ستاستوگ چوکھانّی میبوا تیگونّی اوما تھونگچھوگّا مانوگا؟

⁸ چی نگے میی سامتشولّی نانّگا شادّوگّا؟ خُدے ٹھیمسّیانگ اینّا ژوگس مولتے میروگّا؟

⁹ ستوسّانگ پیغمبر حضرت مُوسیٰؔ سی شریعتی نانّگا ”کھیوجاگونّی کھویوس سکور زانے لانگتوے کھا لدامستے مابورشیگ“ مولتے یودتے اینوگ۔ خُدے تیبو مول زانے، چی کھونگی لانگتو چیگپوے سکورلا تھوگسّام سالّا زادتے اینّوگا؟

¹⁰ چی نگوسپوا، کھونگی نگاتانگونّی پھانتھوگسّی پھیا مولتے مانوگا؟ اونا نگاتانگونّی پھانتھوگسّی پھیا، ڈِیازادتے اینوگ، چیازیرنا ستونتھوگی کانے گوستے تھوبچیسّی ریواے نانّگا، رنگاکھان تانگ کھویوس سکورکھان نیسکوے لاسگون چوانوگ۔

¹¹ تا نگاجا گُونی رُوحانی ساون، کھیوجاگونّی نانّگا تابس پاسانگ، چی کھیوجے ستونتھوگپو نگاجا نیامپو گوچیسلا کاگسپو چھاراگّا؟

¹² کالتیس کھیوجاگونّی جانیانگ چھوسشادکھانگونلا روگس چوادنا، چی کھیوجے نگاجا گُونلا تے میگونّی سانگ مانّگا روگس چوگوشیس مانوگا؟ اِین نانگ نگاجا گُونی ای تھوبتانگبو مانے ماکولپین، چیازیرنا مسیح گاموےناتسُولّی نانّگا گھاگسکیل کھیونگی سانگ نگاجا ناگھسباردو کھورچیسلا تھادپو این۔

¹³ چی بیت المقدِس سی نانّگا لاس چوکھانگونلا زان، بیت المقدِس سی نانّگا چھودپا پھولکھانگونّی کانے تھوبچیسپو، کھیوجاگونلا ہاگو تھوبّا میراگّا؟ یانگ قُربان تانگسایکا لاس چوکھانگونلا، قُربان پھولکھانگونّی کانے گوستے تھوبّا میروگّا؟

¹⁴ اینّا تسوگسلا مسیح کا سالّا زادتے اینوگ، گاموےناتسُول شادکھانگونلا تیکانے پھانتھوگس تھوبکھانگونّی روگس چوگوس۔

¹⁵ تینیانگ نگے ای تھوبتانگ تشانگمے نانگنے چیگّانگ ماکولپین، یانگ نگے پھیا کھیوجاگونّی ایتسوگسّی لاسگون چوچیسّی ریوا چوستے ڈیامید۔ نگے کھیوجاگونلا رین میدپا چھوسشادچیسپویکا پھوسو چونیانچیسّی تھوبتانگبو میدکھان چھاچوگی سانگ نگا شینا گیال۔

¹⁶ چیاینّانگ گاموےناتسُول شادچیسپویکا نگے پھوسو چو مینیان، چیازیرنا ہلژخمہ رُوح بوے نگا ای لاسپو چوچوگدوگ۔ کالتیس نگے گاموےناتسُولبو ماشادنا، نگا تسامشیگی جیگسپا مانوگ۔

¹⁷ کالتیس نگے نگارانگ تھادتے ای لاسپو چونا، نگا شزدے تھوبین۔ اِین نانگ نگا لدامچیسّی وانگ مید، چیازیرنا خُدے نگا ای کھاگپو سالّا زادتے اینوگ۔

¹⁸ تینے نگا کازوگ شزدے شیگ تھوبین؟ تیبو نی رین میدپا گاموےناتسُول شادچیسّی سکابسپو اینوگ۔ تینّابویپھیا گاموےناتسُول شاد زانے، نگے نگارانگی تھوبتانگی سکورلا سامبا تانّگامید۔

¹⁹ جان نگا مالِک میدکھانّی رانگوانگچانجیگ اِین نانگ ، می مانگپو مسیح نانّگا کھیونگچیسلا نگے نگارانگ تشانگمے تشیوگ گیورچوگسپین۔

²⁰ نگا یہُودی پاگون نیامپو یود زانے، نگے یہُودی پاگون مسیح نانّگا کھیونگچیسّی پھیا، یہُودی پاگون تسوگسلا میتشے پھودّاد۔ نگا یہُودی پے شریعتی نانّگا ڈولکھانگون نیامپو یود زانے، نگا تے شریعتی نانگجین دوگّاد۔ جان نگا تے شریعتی یوگا میدنانگ، تے شریعتی یوگا دُوگکھان گُون مسیح نانّگا کھیونگچیسّی پھیا نگے تیبو چواد۔

²¹ نگا یہُودی پے ٹھیمسگونّیکا ما ڈولکھانگون نیامپو یود زانے، کھونگون مسیح نانّگا کھیونگچیسّی پھیا نگانگ تے شریعتی یوگا دوگّا مید۔ اِین نانگ نگے خُدے ٹھیمسگونلا سنانگمید چوامید، نگے مسیح ٹھیمسگونلا کھانیانّاد۔

²² نگا ایمانی نانّگا اُتھوکس یودکھانگون نیامپو یود زانے، اوتھوگسگون مسیح نانّگا کھیونگچیسّی پھیا، نگا کھونگونی اوتھوگسّی نانّگا ڈیسّاد۔ میگون سکیوبچیسّی پھیا، نگا می کازوگشیگ یودنانگ تینّا ژوگس گیورّاد۔

²³ نگے تے تشانگما گاموےناتسُول پھیلچوگچیس تانگ تیبوے برکت دی نانّگا ڈیسشیسّی پھیا چواد۔

²⁴ بانگیوگسّی نانّگا تشانگما بانگتانّگانوگ، اِین نانگ چیگّا شزدے تھوبچیسپو چی کھیوجاگونلا ہاگو تھوبّا میراگّا؟ تینے گیالکھا تھوبچیسّی میگژی نیامپو بانگتونگشیگ۔

²⁵ میدکھان چھاچیسّی شزدے تھوبچیسلا بانگیوگس تانگکھان تشانگمے کھورانگّون لوبجونگی سچودلامّی نانّگا ستانپو بورّانوگ، اِین نانگ نگاجا گُونی ایبو تھامیدپے شزدے تھوبچیسّی پھیا چواد۔

²⁶ تیبویپھیا نگے بانگتانگ زانے، میگژی نیامپو کومپا ریریے گیابّاد۔ نگا تونتاگ میدپا لونگسپوے نانّگا مولٹھوگ تانگکھانّی می ژوگس مان۔

²⁷ نگے نگارانگی زوگسپو نگارانگی وانگی یوگا لوسشیسّی پھیا سالیانگس سیکھانگون تسوگسلا لوبجونگ تانّگاد۔ تے مانّا نگے جانماگونلا خُدے گاموےناتسُولبو شادتے ستینگنے، نگا تھامیدپے شزدے تھوبچیسّی اوسپا میدوگ مولثیدچیسلا جیگسّاراگ۔