کورینتھیپའ ۱ 7 - New Testament in Ladakhi Langageناما چوچیسّی سکورلا لابجا۔ 1 تا کھیوجاگونّی ایگیی نانّگا ٹیوا ٹیستے یودکھانّی لانلا، اونا، بُوژا یا بومو گُونی ناما ماچونا گیالّا اینوگ۔ 2 اِین نانگ دُنیائی نانّگا لوسڈیل نگانپا مانگستیانگ یود پاسانگ، بُوژا ریریا ناما چیگیانگ بومو ریریا ماگپا چیگ یونگّوشیس اینوگ۔ 3 ماگپے کھورانگی نامے لوسڈیلّی گھوسدومگون ڈوبچوگوس، یانگ نامے کھورانگی ماگپے لوسڈیلّی گھوسدومگون ڈوبچوگوس۔ 4 تیبو نی نامے کھورانگی زوگسپویکا کھورانگی ماگپا وانگچھا یانگ ماگپے کھورانگی زوگسپویکا کھورانگی ناما وانگچھا تانّگانوگ۔ 5 کھیوجارانگ مانّگا دُعا گونی نانّگا تانگ نیانچیسّی پھیا کھیوجا نیسکوے کھاچھامستے، توس نیونگونجیگ لوسڈیل میچو سامنا ماستوگس، کھیوجا نیسکوے پارلا زوگسپوے گھوسدومگون ماچوا مادوگشیگ۔ تے توسپوے ستینگنے، نیسکو یانگسکیار نیامپو دزومگوس، چیازیرنا کھیوجا رانگسیمس چونچیسّی نانّگا شیدمید یود پاسانگ، شیطانی دِیگپے نانّگا گیل چوگثیدچیس اینوگ۔ 6 نگے تیبو چوچیسلا کا تانگستے زیرّامید، اِین نانگ گونگسپا تانّگاد۔ 7 نگا تسوگسلا تشانگما ناما ماچوا دُوگستے یودچیسپو، نگے دودپا چواد۔ اِین نانگ خُدے چھوگسنے می ریریا میگسالّی کھیودریگ سالتے یودتے اینوگ، می چیگّا کھیودی ریگ چیگیانگ میجیگّا یانگ کھیودی ریگجیگ۔ 8 تا نگے ناما ماچوکھان تانگ انے مارانگمو یا ناما ڈونگکھانّی ماگپا گُونلا زیرّاد۔ ناما ماچوا دوگنا، گیالّا اینوگ کازوگی نگا دُوگستے یود۔ 9 اِین نانگ کالتیس کھونگونی رانگدانگرانّگا چون ماتھوبنا، ناما چوگوشیس اینوگ۔ لوسڈیل چوچیسّی دودپے نانّگا میے بارّی سانگ ناما چونا گیال۔ 10 تا ناما چوکھانگونلا نگے کاتانّگاد، کا بو نگارانگی مانپا حضرت عیسیٰ مسیح چھوگسنے این۔ نامے رانگی ماگپا پھانگ ماگوس۔ 11 اِین نانگ کالتیس کھوے کھورانگی ماگپا پھانگنا، تے بوموبو چیگپو دُوگوس یا کھورانگی ماگپا نیامپو یانگسکیار دزومگوس۔ تینّا تسوگسلا ماگپے کھورانگی ناما چاد ماگوس۔ 12 تا جان نگا مسیح چھوگسنے کھاڈانّگا کاجیگ میدنانگ، نگے ایبو کھیوجا لوستے یودکھانگونلا زیرّاد، کالتیس مسیح پا بُوژا جیگّا ایمان میدکھانّی ناماجیگ یودنا یانگ تے بوموبو کھو نیامپو دوگچیسلا تھادّادنا، تے بوتشے کھو چاد ماگوس۔ 13 یانگ کالتیس مسیح پا بوموجیگّا ایمان میدکھانّی ماگپاجیگ یودنا، یانگ کھو تے بومو نیامپو دوگچیسلا تھادّادنا، تے بوموبوے کھو پھانگ ماگوس۔ 14 تے مسیحاپے نامے، کھورانگی ایمان میدکھانّی ماگپابو ژانگما چوانوگ۔ یانگ تے مسیحاپے ماگپے، کھورانگی ایمان میدکھانّی نامابو ژانگما چوانوگ۔ کالتیس تیزوگ مانپینّا خُدے سکوندونلا کھونگی ٹھوگوگون ہلژخمہ جیگ میدڈو۔ اِین نانگ کھونگون خُدے سکوندونلا ہلژخمہ ریگ اینوگ۔ 15 کالتیس ایمان میدکھانّی ماگپا یا ناماگون رانگی جیدماد نیامپو دوگّالا تھادّا میدنا، تینے چھاچوگشیگ۔ تیتسوگسی ناسلوگی نانّگا مسیح پا ماگپا یا ناما گُونی نیامپو دوگچیسّی پھیا، نا کھورکھانگونلا ستینتے دُوگوس میدپا اینوگ۔ خُدے کھیوجاگون جیدیے نانّگا دوگچیسّی پھیا، بودّا زادتے اینوگ۔ 16 ناماگون، کھیوجے جاستے کھیوجے ماگپاگون ایمانی نانّگا یونگثیدچیسپو گیوسچھا میراگّا؟ یانگ ماگپاگون کھیوجے جاستے، کھیوجے ناماگون ایمانی نانّگا یونگثیدچیسپو گیوسچھا میراگّا؟ 17 مسیح کھیوجاگون کازوگ ناسلوگ شیگی نانّگا بورّا زادتے یودنانگ، کھیوجا ریرے تینانّگا دوگوشیس اینوگ۔ یانگ کازوگ ناسلوگی نانّگا کھیوجا، خُدے گومارانگ ایمانی نانّگا بودّا زاد زانے یودپین، تینّا ناسلوگ تسوگسّی نانّگا دُوگوس۔ ایبو عبادت خانہ تشانگمے پھیا نگے شریعت پو این۔ 18 سپیرنا یہُودی پاجیگی ایمان چان گیورّی سانگ سنگونلا، کھورانّگا لقپہ ہلژخمہ چوستے یودنا، تیبو گیورچیسّی سونڈوس ماچوشیگ۔ یانگ لقپہ ہلژخمہ ماچوکھانّی میجیگ ایمان چان گیورنا، کھوے کھورانّگا لقپہ ہلژخمہ چوگوس میدپا اینوگ۔ 19 چیازیرنا خُدے سکوندونلا لقپہ ہلژخمہ چوکھان یا ماچوکھانبوے نانّگا چانگ کھیاد میدتے اینوگ۔ کھاگچانبو نی خُدے حُکم گیاگون ثونگچیسپو اینوگ۔ 20 اونا خُدے کھیوجاگونلا بودّا زاد زانے یودکھانّی ناسلوگپوے نانّگا کھیوجا ریرے دوگوشیس اینوگ۔ 21 خُدے بودّا زاد زانے، کھیوجا تشیوگ اینپینّا؟ کالتیس اینّا تشیرکھا ماچوشیگ، اِین نانگ کالتیس کھیوجاگونلا تشییوگنے تھارچیسّی سکابس تھوبنا، تے سکابسپو لینشیگ۔ 22 یانگ کالتیس کھیوجا مسیح بودّا زاد زانے تشیوگ اینّا، تا کھیوجاگون مسیح نانّگا دِیگپے تشییوگنے تھارتے اینوگ۔ یانگ کالتیس کھیوجاگون مسیح بودّا زاد زانے تشیوگ مانپینّا تا کھیوجاگون مسیح تشیوگ گیورتے اینوگ۔ 23 خُدے رین چھینموجیگ شالّا زادتے نیوا زادپا، کھیوجا زوسمے لوبپونگونّی تشیوگ گیور ماچوگشیگ۔ 24 فونو گُون، کھیوجا ریرے تینّا ژوگس لوسگوس نام کھیوجاگون خُدے بودّا زاد زانے یودپین۔ 25 تا کھیوجے ناما ماچوکھانگونّی سکورلا ٹیوا ٹیکھانبوا، تیگونلا تانگچیسلا مسیح نگا کاجیگ سالّا مازادس، اِین نانگ مسیح کھونگرانگی سنینگرجے نانّگا ایمان چونیانچیسّی نگا شیسرابس سالّا زادس، یانگ نگے تیبو کھیوجاگون نیامپو گواد۔ 26 داگسا نگاتانگون توس سکیوموے نانّگا یودچیسپوے، نگے سامّاراگ کھیوجاگون کازوگ ناسلوگ شیگی نانّگا یودنانگ، تینے نانّگا دوگوشیس اینوگ۔ 27 کالتیس کھیوجاگونلا ناما یودنا، ناما چادچیس یانگ کالتیس ناما میدنا، ناما چوچیسّی سونڈوس ماچوشیگ۔ 28 اِین نانگ کالتیس کھیوجاگونّی ناما چونا، تیبو دِیگپاجیگ مانوگ۔ یانگ کالتیس بومو ناچھونگجیگی ناما چونا، تیبوانگ دِیگپاجیگ مانوگ۔ چیاینّانگ ای سکیوموی توسلا، ناما چوکھانگونلا مانّگا ناگس تھونگین، یانگ نگے کھیوجاگون ا ای ناگسگونّے تھارچوگچیسّی سونڈوس چواد۔ 29 نگے فونو گُون، نگے زیرچیسّی دُونبو نی، مسیحا لوگستے پھیبچیسّی توسپو نیونگونجیگ مانے لوستے مید پاسانگ، داگسانے پھارلا ناما چوکھانگونّی خُدے جابستوگی نانّگا ناما چوے سانگ سنگونلا تانگکھانّی تینّا توسپو داگسانگ تانگوس۔ 30-31 سکیومو یودکھان یا سکیدپو یودکھان یا نور نیواین دُوگکھان یا نور مانگپو یودکھان گُونی تیگونّی سکورلا توسگیون سامین مادوگشیگ، چیازیرنا ای دُنیائی نانّگا یودکھان تشانگما گیوگسپا میدکھان چھاچیس اینوگ۔ 32 کھیوجاگون تے میتشیے تشیرکھاگونّے تھارگوشیسپو نگے دودپا این۔ سپیرنا، ناما ماچوکھانّی بُوژا جیگی کھورانگی توسپو مسیحا جابستوگ چوچیسّی نانّگا پھودنیانّانوگ یانگ کھونگ تھوگنییسشوگچیسّی سکورلا سامبا تانّگانوگ۔ 33 اِین نانگ ناما چوکھانّی بوتشے کھورانگی دُنیائی کھاگ تانگ رانگی ناما تھادچوگچیسّی سکورلا سامّانوگ، 34 یانگ کھوے رُوح بو کھاگنییسّی نانّگا گوگوسّانوگ۔ تینّا تسوگسلا ماگپا شیکھان یا ناما مانے ماچوا دوگکھانّی بومو گُونی، زوگسپو تانگ سیمسنید نیسکو نیامپو توس گانگپو مسیحا جابستوگ ژونیانّانوگ۔ اِین نانگ ناما چوکھانّی بوموجیگی کھورانگی دُنیائی کھاگّون تانگ کھورانگی ماگپا تھادچوگچیسّی سکورلا سامّانوگ۔ 35 نگے ایبو گھاگسکیل تانگچیسّی پھیا مانپا، کھیوجاگونّی پھانتھوگسّی پھیا، زیرّاد۔ نگے دودپابو نی، چیساتھوگنے کھیوجاگونّی رُوح بو نیان مایانّا مسیحا جابستوگ گیالّا چوستے جوچوگچیسپو این۔ 36 اِین نانگ کالتیس بُوژا جیگی کھورانگی ناما چوچیسچانبو نیامپو میوسپْا چوستے اینوگ سامچیس، ماتشاد کھوا لوسڈیلّی دودپا ثانٹے یودنا، تے بوتشے کھورانگی دودپا نانگجین تے بومو نیامپو ناما چوگوس۔ کھوے دِیگپا چوستے مانوگ۔ 37 اِین نانگ جانمے وانگ تانگستے مانپا کالتیس کھوے کھورانگی دودپابو چونّیانتے تے بومو نیامپو ناما میچوچیس تانتان تھاگچادنا، گیالّا اینوگ۔ 38 تینے ناما چوکھانبوے گیالّا چوستے اینوگ، یانگ ناما ماچوکھانبوے تیسانگ گیالّا چوستے اینوگ۔ 39 ماگپا سونتیا یودتوس ناما کھورانگی ماگپا نیامپو دُوگوس۔ کالتیس کھوے ماگپا ڈونگسنا، تے بوموبوے کھورانگ تھادکھانّی بُوژا نیامپو ناما چونانگ، ڈیگستے اینوگ، اِین نانگ تے بُوژا بُو مسیح کا ایمان چوکھانجیگ یونگّوس۔ 40 نگے سامبے نانّگا، تے بوموبوا چیگپو دوگنا مانّگا برکت تھوبین۔ یانگ نگے سامّاراگ، نگیانگ خُدے رُوح بوے گیُودتے کھادا تانگستے این۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation