کورینتھیپའ ۱ 6 - New Testament in Ladakhi Langage

ایمان چانگون ٹھیمسکھونّگا کھیر ماچوگ۔

¹ کالتیس کھیوجا سوجیگّا جانیانگ ایمان چانجیگ نیامپو زینگمو چھانا، کازوگی کھیوجے تے میبو جانیانگ ایمان چانگونّی لدُونلا ماکھیرّا، ژونگی ٹھیمسکھونّگا کھیرچیسّی ہامپا چواد؟

² چی نگاتانگ ایمان چانگونّی دُنیائی می گونلا ٹھیمسچاد تانگچیسپو کھیوجاگونلا گیوسمیدّا؟ یانگ کالتیس کھیوجاگونّی دُنیائی می گونلا ٹھیمسچادّادنا، چی کھیوجاگونّی ٹوا ای ناسلوگ چھونگونبوا ٹھیمسچاد تانگچیسّی کھیود میدّا؟

³ نگاتانگونّی فرشتا نگانپا گونلا ٹھیمسچاد تانگچیسپو، کھیوجاگونلا گیوسمیدّا؟ تینّابویپھیا میتشیے نانّگا چونگکھانّی زینگموگون تانتانلا کھیوجاگونّی سیل نیانگوس۔

⁴ کالتیس کھیوجاگونّی نانّگا زینگمو ریگ جونگنا، تینے چیا عبادت خانہ نے پھیلوگا عبادت خانہے نانّگا چانگ کھاگ میدکھانّی شخ چوکان گونّیکا چھاد۔

⁵ نگے ایبو کھیوجاگون ٹھیلچوگچیسلا زیرّاد، چی عبادت خانہے نانّگا ای ناسلوگّونلا ٹھیمسچاد نیانچیسّی پھیا، می شیسرابسچان چیگّانگ میروگّا؟

⁶ چیا کھیوجے ٹونے چیگی جانیانگ میجیگ ٹھیمسکھونّگا ایمان میدکھانگونّی لاگا شاگس چوالا کھیرّاد؟

⁷ کھیوجاگونّی ای زینگموگون ٹھیمسکھونّگا کھیرّاچیگ، کھیوجا پھامس تشارتے اینوگ۔ تیسانگتا میوسپْا چھاچوگنا میگیالّا؟ گوبسکورچوگنا میگیالّا؟

⁸ اِین نانگ کھیوجاگونّیانگ نورٹھول تانگ گوبسکور تانگدوگ، رانگی ایمان چانّی فونو گونلانگ۔

⁹ چی، لاسنگان چوکھانگون خُدے گیالثیدّی نانّگا ژوگس مینیانچیسپو کھیوجاگونلا گیوسمیدّا؟ رانگدانگرانّگا گوبماسکورشیگ۔ لوسڈیل نگانپا، سکونڈا چولکھان، رانگی جیدماد مانپا ژانیانگجیگ نیامپو لوسڈیل چوکھان، بُوژا زوگستسونگکھان، بُوژا تانگ بُوژا گُونی پارلا یا بومو تانگ بومو گُونی پارلا لوسڈیل چوکھان،

¹⁰ کونما کوکھان، نورنابسچان، راروسکھان، جانمے سکورلا سوگپو زیرکھان تانگ میگونلا گوبسکورکھان گُون خُدے گیالثیدّی نانّگا چھا مینیان۔

¹¹ توسشیگّا کھیوجا کھاچیگّانگ تے میگون ژوگس یودپین۔ اِین نانگ حضرت عیسیٰ مسیح کا ایمان کھیونگچیس یانگ نگاتانگی خُدے رُوح بوے کھیوجاگون ژانگما تانگ ہلژخمہ چوا زادتے خُدے سکوندونلا می ٹانگپو ریگ تھیازادتے اینوگ۔

لوسڈیل نگانپاگونّے تھاگرینّگا دوگچیس۔

¹² کھیوجاگونّی ٹونے کھاچیگی زیرّانوگ ”نگا چیتشانگما چوچھوگاین۔“ اِین نانگ نگے زیرّاد ”چیتشانگما کھیوجاگونّی پھیا گیالّاجیگ مان۔“ نگیانگ زیرنیانچیس اینوگ ”نگا چیجیگ چونانگ چوچھوگاین“ اِین نانگ نگے نگارانگ چیجیگیانگ یوگپو مانے گیور میچوگ۔

¹³ کھیوجاگونّی ٹونے کھاچیگی زیرّانوگ ”زانبو ٹودپے پھیا چوستے اینوگ یانگ ڈودپابو زانّی پھیا۔“ اِین نانگ جاگشیگ خُدے تے نیسکو میدکھان چوا زادچیسپو ٹانگپو مانوگا؟ نگاتانگونّی زوگسپوبو لوسڈیل نگانپا مانپا، مسیحا جابستوگ چوچیسّی پھیا زادتے اینوگ، یانگ مسیح نگاتانگونّی زوگسپوا ستاستوگ زادّانوگ۔

¹⁴ چیازیرنا خُدے نگاتانگون کھونگرانگی شید گیُودتے، شیکھانگونّی ٹونے سونتیا لانّگا زادِین، کازوگی کھونگی نگاتانگونّی حضرت عیسیٰ مسیح شیکھانگونّی ٹونے سونتیا لانّگا زادس۔

¹⁵ چی نگوسپوا کھیوجے زوگسپو مسیح کھاگچیگ اینکھانبو، کھیوجاگونلا گیوسمیدّا؟ تینے میجیگی مسیح کھاگ اینکھانّی تے زوگسپوبو، زوگستسونگماجیگ نیامپو ڈیسّالا کھیرگوسّا؟ مانے ماگوس۔

¹⁶ زوگستسونگما نیامپو ڈیسکھانّی میبو تے بومو نیامپو زوگسپو چیگ گیورکھانبو، کھیوجاگونلا گیوسمیدّا؟ چیازیرنا ہلژخمہ شوقبُو بوے نانّگا مولتے اینوگ ”بُوژا تانگ بومو نیسکو ڈیلتے زوگسپو چیگ گیورین۔“

¹⁷ اِین نانگ کالتیس میجیگ حضرت عیسیٰ مسیح نیامپو ڈیلنا، کھو کھونگ نیامپو رُوح بوے نانّگا چیگ گیورین۔

¹⁸ لوسڈیل نگانپے کانے شورتے سونگشیگ۔ ای دِیگپے زوگسپوا نودسکیالکھان ژوگس، جانیانگ دِیگپاجیگی نودسکیال مینیان، چیازیرنا لوسڈیل نگانپے دِیگپابو رانگی زوگسپوے گیابگالّا اینوگ۔

¹⁹ کھیوجاگونّی زوگسپو ہلژخمہ رُوح بوے بیت المقدِس اینکھانبو، چی کھیوجاگونلا گیوسچھا میراگّا؟ کا بو کھیوجاگونّی نانّگا جوگسّاد یانگ کھیوجاگونلا خُدے سالّا زادتے این۔ تا کھیوجا کھیوجارانگی مانوگ۔

²⁰ چیازیرنا خُدے کھیوجاگون رین چھینموجیگ شالّا زادتے نیوا زادتے این۔ تینّابویپھیا کھیوجاگونّی کھیوجارانگی زوگسپو نیامپو خُدا سیوا چوگوس۔