کورینتھیپའ ۱ 2 - New Testament in Ladakhi Langage

شیسرابسّی سکورلا حضرت پولُسی لابجا۔

¹ فونو گُون، کھیوجا خُدے سانگوے تھابسپو شادچیسلا نگا گومارانگ یونگ زانے، نگے ٹاگپو شیسرابس یا معجزہ تشیگس ماکولپین۔

² چیازیرنا نگا کھیوجا نیامپو یود زانے، نگے کھیوجاگونلا کیانگشینگیکا کیانگسکھانّی حضرت عیسیٰ مسیحاچیگپو ماستوگس جانیانگ چیجیگی سکورلا میشادچیس تھاگچادپین۔

³ کھیوجاگون نیامپو یودتوس، مسیح چھاگلاس چوچیسّی نانّگا نگا وتھوگس، ٹھیلکھان تانگ جیگسکھانجیگ تشورّا راگپین۔

⁴ نگے لابجا تانگ چھوسشادچیس گُون ہاگوالا لامو یانگ ٹھولچیس تانگ کھاسپا سپیراگونّیکا راگ مالاسّا، نگے ہلژخمہ رُوح تانگ کھیود گونی کھیوجاگونّی نانّگا چھاگلاس زادچیسپویکا ایمان چوستے لابجا تانگسپین۔

⁵ نگے تیبو کھیوجاگونّی، میی شیسرابسّیکا مانپا، خُدے کھیود ّی نانّگا ایمان چوچیسّی پھیا چوسپین۔

⁶ ایمانی نانّگا لدانکھانگونّی ٹوا یود زانے، نگے شیسرابسچانّی تشیگسگون نیامپو سپیرا تانّگاد۔ اِین نانگ تے شیسرابسگون، گیوگسپا میدکھان چھاچیسچانّی ای دُنیائی می یا ای دُنیائی وانگثولپا گُونی مانوگ۔

⁷ نگاجے سپیرا تانگکھانّی شیسرابسپو نی، خُدے سانگوے تھابسپو اینوگ، کا بو کھونگی باستے بورّا زادتے این۔ اِین نانگ نگاتانگونلا شان تھوبچیسّی پھیا دُنیا مالدانی سانگ سنگونلا، کھونگی ای تھابسپو چوا زادتے اینپین۔

⁸ ای دُنیائی وانگثولپاگونّی تے سانگوے تھابسپو، ہاماگوا اینوگ۔ کالتیس ہاگوپینّا، کھونگونی نگاتانگی شان چانّی مسیح کیانگشینگیکا کیانگستے میدڈو۔

⁹ تینّابویپھیا ہلژخمہ شوقبُو بوے نانّگا مولتے اینوگ ”سوجیگیانگ ماتھونگکھان یا ماتشورکھان یا سامبے نانّگا میدکھانجیگ خُدا چیسپا چوکھانگونّی پھیا ڈالڈیگ چوا زادتے یودتے اینوگ۔“

¹⁰ اِین نانگ تیگون خُدے کھونگرانگی رُوح بوے، نگاتانگونلا سنگون چوگّا زادتے اینوگ۔ ہلژخمہ رُوح لا چیتشانگما تھوگیوس اینوگ، خُدے سانگوا ٹاگپوگونّانگ۔

¹¹ میجیگی سامکھانگون تینّا می بوے سیمسنید ماستوگس جان سومیجیگّانگ گیُوس چھامانوگ۔ تینّا تسوگسلا خُدے تھوگسّامگون کھونگی رُوح چیگپو ماستوگس، جانسوجیگّانگ گیوسچھا مانوگ۔

¹² یانگ نگاتانگونلا دُنیائی می سیمسنید مانپا، خُدے رُوح تھوبستے اینچیسپوے، نگاتانگونلا خُدے معجزہ شزدے گون رین میدپا سالّا زادکھانبو ہاگو تھوبستے اینوگ۔

¹³ کھیوجاگونلا تے تشانگمے سکورلا شاد زانے، نگاجے میی شیسرابسنے چونگکھانّی تشیگسگون ماکولّا، رُوح بوے سالکھانّی تشیگسگون گیُودتے، سپیرا تانّگاد۔ رُوح بوے دینباگون لابچیسلا رُوح چانّی تشیگسگون کولّاد۔

¹⁴ اِین نانگ رُوح میدکھانّی می بوے، خُدے رُوح یونگسکھانّی دینباگونّیکا ایمان چوا مانوگ۔ تے میبوا یگون تونمید تشورّانوگ، یانگ کھوا ہاگوا مانوگ، چیازیرنا رُوح یودکھانگونلا ماستوگس، یانگ سوانگ تیگون ہاگو تھوبّا مانوگ۔

¹⁵ رُوح یودکھانگونّی چیتشانگمے سکورلا ستاگچاد چوستے ہاگونیانّانوگ، اِین نانگ رُوح میدکھانگونّی رُوح یودکھانگونّی چوزو تانگ سامزو گُون ہاگو تھوبّا مانوگ۔

¹⁶ چیازیرنا ”سُوا مسیح تھوگسّامگون گیُوس چھین؟ سوی لاگا، کھونّگا لابجا تانگچیسّی شیسرابس یود؟“ اِین نانگ نگاتانگونّی نانّگا مسیح تھوگسّامگون یود پاسانگ، نگاتانگونلا تیگون ہاگوتھوبّانوگ۔