کورینتھیپའ ۱ 16 - New Testament in Ladakhi Langageتادپاچانگونلا گیونورّی روگس۔ 1 تا یروشالیمّی نانّگا خُدے میگونّی پھیا لدواین یودکھانّی پینے سکورلا کھیوجے ٹیوا ٹیکھانّی لانلا، گلَتیہ پے عبادت خانہ گونلا نگے تانگکھانّی لابجے نانّگا کھیوجاگونّانگ ڈولگوشیس اینوگ۔ 2 زانییما ریمسّی کھیوجاگونّی رانگرانگی لاس چوستے تھوبکھانّی پینیی نانگنے کھاگجیگ تھینتے، بورگوشیس اینوگ۔ نگا تیرو یونگیونگ تشوگپا ثونگستے مادوگا، تیبو داگسانے پھارلا چوشیگ۔ 3 نگا تیرو لیبستے سکیسگون یروشالیمّی نانّگا کھیرچیسّی پھیا کھیوجاگونّی لدامکھانّی لونکھیرکھانگونلا، نگے گیابشیدّی ایگے ریگ ڈیاین۔ 4 یانگ کالتیس کھیوجاگونّی نگا کھونگون نیامپو چھاچیسپو پھانتھوگسچان دوگ سامنا، کھونگون نگا نیامپو یونگنانگ ڈیگستے اینوگ۔ حضرت پولُسی ستینگجوگی لابجاگون۔ 5 نگا مکدنیہ یولّا سونگتے ستینگنے، کھیوجاگون یودسا تھوگّالا یونگین، چیازیرنا نگے مکدنیہ گیُودتے بیسلا چھاچیسّی تھابسلدینگستے این۔ 6 چیگیوس نگا کھیوجاگون نیامپو بانشیگ دوگین یا گُون گانگپوانگ، تینے کھیوجاگونّی نگا کایولّا چھانانگ، تیرو نگا گھوسدومگون تانگستے لامچوگ نیانچیس اینوگ۔ 7 ای لان نگا تساپیگجیگ تُھوگا یونگستے چھاچیسّی دودپا میراگ، کالتیس مسیح نگا گونگسپا سالّا زادنا، نگا یونگستے توسبانشیگ دوگنیینراگ۔ 8 اِین نانگ پینتیکوسّی گاستون لیب لیب تشوگپالا، نگاا یرو اِفسُس سی گیالسے نانّگا دوگین۔ 9 جان یرو مانگپوجیگی نگے گیابگال چونانگ، نگا ڈاسبو زانگپو سمینثیدچیسچانّی لاس گیالّا چوچیسّی سکابس زانگپو ریگ تھوبستے یود۔ 10 نگے فونو تِیمُتھیُس لیب زانے، کھیوجے ٹوا کھوا جیگسنانگ یونگ ماچوگشیگ چیازیرنا نگے چوکھان تسوگسلا کھوینگ مسیح لاسگون چوین اینوگ۔ 11 سوجیگّانگ کھوا رینمید چو ماچوگشیگ۔ کھو نگا یودسا لوگستے یونگ زانے کھیوجاگونّی، کھامزانگ نیامپو کھو لامچوگشیگ۔ کھو جانیانگ ایمان چانگون نیامپو یونگچیسّی نگے ریوا چواد۔ 12 تا نگاتانگونّی فونو اُپلّوؔس ّی سکورلا جونا، نگے کھوا کھیوجاگونّیکا جانیانگ ایمان چانگون نیامپو چھاچیسلا سپوسپا تانگین جُووا پھولپین، اِین نانگ کھوا داگسا چھاچیسّی دودپا میروگ۔ یانگ سکابس تھوب زانے کھو کھیوجاگونلا تُھوگا یونگین۔ 13 شانگ چوشیگ؛ ایمانی نانّگا ستانپو دوگشیگ؛ سیمسشوگسچان یانگ ایمانی نانّگا شیدچان گیورتے دوگشیگ۔ 14 چیتشانگما چیسپا نیامپو چوشیگ۔ 15-16 کھیوجاگونلا گیوس اینّوگ، حضرت ستِفنُس لا زیرکھان تانگ کھوے نانگمی تشانگما اخیہ نانّگا ایمان چان تانگپورانگ اینپین۔ یانگ کھونگونی خُدے میگونّی پھیا جابستوگ چوچیسّی نانّگا توسگون پھودین اینوگ۔ فونو گُونلا نگے سپوسپا تانگین جُووا این، کھیوجارانگون کھونگون تانگ جانیانگ یتسوگسّی دودپا چیگپو نیامپو جابستوگ جوکھانگونّی وانگی یوگا بورشیگ۔ 17 نگاتانگی فونو حضرت ستِفنُس لا، پھورچونّاتوس تانگ، اخیکُس گُون ایرو لیبچیسپوے نگا ما تھادپو راگ، چیازیرنا کھونگونی کھیوجے تشابس چوستے نگا روگس چوروگ۔ 18 کھیوجاگونلا یہُوداؔہ تسوگسلا کھونگون نگے پھیانگ ہالاسّی سپوسپا ریگ گیورتے این۔ کھونگ تسوگسّی می، گیالّا چوستے جابستوگ جوکھانگونلا کھیوجاگونّی ستودپا پھولگوس۔ حضرت پولُسی ستینگجوگی سلام جوس۔ 19 آسیہ گیالکھاگی نانّگا یودکھانّی عبادت خانہ گونّی مسیح مِنتخسی نانّگا سلام کالدوگ۔ فونو اکوِلہ تانگ کھوے ناما پرِسکِلہ یانگ کھونگی کھانگپے نانّگا تشوگسکھانّی عبادت خانہے نانگا سلام کالدوگ۔ 20 یرو یودکھانّی فونو تشانگمے کھیوجاگونلا سلام کالدوگ۔ چیگ تانگ چیگّا چامسپا نیامپو سلام جوس۔ 21 تا نگا حضرت پولُسی ایگے ڈیکھانبوے کانے نیگو کھیونگستے نگارانگی لاگڈیسّی نانّگا سلام کالّاد۔ 22 کالتیس سوجیگی مسیحا چیسپا چوا میدنا، تے میبوا نگان پھوگانوگ۔ نگاتانگونّی مسیح گیوگسپا سکیودشیگ۔ 23 حضرت عیسیٰ مسیح شزدے کھیوجاگون نیامپو لوسشیگ۔ 24 حضرت عیسیٰ مسیح اینکھان تشانگمالا نگے چیسپا کالّاد۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation