کورینتھیپའ ۱ 14 - New Testament in Ladakhi Langage

ماشیسکھانّی سکاد تانگ لونگستان شادچیس۔

¹ چیسپے لامی نانّگا ڈولین جیگ، رُوح بوے سالّا زادکھانّی کھیودگونّیانگ دودپا بورگوشیس اینوگ، میگسال چوستے لونگستان شادچیسّی کھیود۔

² ماشیسکھانّی سکادّی نانّگا سپیرا تانگچیسّی کھیود یودکھانگونّی، خُدے چیگپوا سپیرا تانگستے اینوگ۔ یانگ رُوح گیُودتے سانگوے نانّگا واستے یودکھانگون شاد پاسانگ، میگونّی کھونگونی زیرکھانگون ہاگوا مانوگ۔

³ اِین نانگ لونگستان شادکھانگونّی جانما ایمان چانگونلا شیدچان، سپوسپا تانگ سیمسّی نانّگا جیدے گُون کھیونّگانوگ۔

⁴ ماشیسکھانّی سکادّی نانّگا سپیرا تانگکھانبوے کھورانگ چیگپوے رُوح بو شیدچان چوانوگ، اِین نانگ لونگستان شادکھانبوے عبادت خانہ گانگپو شیدچان چھا چوگّانوگ۔

⁵ کھیوجا تشانگمے ماشیسکھانّی سکادّی نانّگا سپیرا تانگ نیانچیس اِین نانگ تیسانگ مانّگا لونگستان شادنیانچیسلا نگے ریوا چواد۔ عبادت خانہ گانگپو شیدچان چوچیسّی پھیا لونگستان شادکھانبو ماشیسکھانّی سکادّی نانّگا سپیرا تانگکھانبوے سانگ مانّگا ٹاگپو اینوگ، نامتشوگپا ماشیسکھانّی سکادبو سوجیگی سکادگیور چوستے میشاد۔

⁶ فونو گُون، کالتیس نگا یونگستے کھیوجا ماشیسکھانّی سکادّی نانّگا سپیرا تانگنا، کھیوجاگونلا چی پھانتھوگس تھوبین۔ اِین نانگ کالتیس نگے کھیوجاگونلا خُدے نگا سنگون چوگّا زادکھان گُون یا میگسالّی یونتان یا لونگستان یا لابجا شادنا، تیبو کھیوجاگونّی ایمانی پھیا پھانتھوگسچانجیگ اینوگ۔

⁷ تینّا تسوگسلا سروک میدکھانّی رولمو، لینگبو یا ہاربا زیرکھانگون سالپو چوستے ماثوگنا، سوجیگیانگ تیبوے یانگسپو ہاگو میتھوب۔

⁸ یانگ کالتیس تونگبو سالپو چوستے ماپھونا تینے ماگمیگونلا ماگی پھیا بودکھانبو کازوگی ہاگوین؟

⁹ تینّا تسوگسلا، کالتیس کھیوجاگونّی میگونلا ہامیگوچیسّی تشیگسگونّی نانّگا سپرا تانگنا تینے کھیوجاگونّی زیرکھانبو کھونگونی کازوگی ہاگو تھوبین؟ تیبو کھیوجاگونّی لونگسپے نانّگا سپیرا تانگکھان ژوگس اینوگ۔

¹⁰ دُنیائی نانّگا سکاد سناتشوگس مانگپو یودتے اینوگ، یانگ سکاد تشانگمالا تونتاگ یودتے اینوگ۔

¹¹ اِین نانگ کالتیس نگا سکادجیگ ہاگوا میدنا، تیبوے نانّگا سپیرا تانگکھانبوے لدُونلا نگا جانیولّی میجیگ ژوگس، یانگ تے سپیرا تانگکھانبو نگے لدُونلا ژانیولّی میجیگ ژوگس اینوگ۔

¹² یانگ کھیوجاگونّی پھیانگ تیبو ژوگس اینوگ۔ کھیوجاگونلا رُوح بوے سالکھانّی کھیود گوسنیین یود پاسانگ، عبادت خانہ گانگپو شیدچان چوکھانّی کھیودریگ تسولشیگ۔

¹³ تیبویپھیا ماشیسکھانّی سکادّی نانّگا سپیرا تانگکھانگونّی، تے زیرکھانگون سکادگیور چوچیسّی کھیودی پھیانگ دُعا پھولگوشیس اینوگ۔

¹⁴ کالتیس نگے ماشیسکھانّی سکادّی نانّگا دُعا پھولنا، دُعا نگے رُوحانی پھولتے اینوگ، اِین نانگ نگے زیرکھانبو نگا ہاگوا مانوگ۔

¹⁵ تا تینے نگے چی چو؟ نگے سیمسنید تانگ نگا ہاگوکھانّی تشیگس نیسکو نیامپو دُعا پھولین۔ نگے سیمسنید نیامپو ماتشاد نگا ہاگوکھانّی تشیگسگونّی نانّگانگ خُدا ستودپے لو تانگین۔

¹⁶ کالتیس کھیرانگی خُدا سیمسنید چیگپونے ستودپا پھولنا، تینے کھیرانگی سکاد ہاماگوکھانگون تینانّگا کازوگی ڈیسین، چیازیرنا کھونگونلا کھیرانگی زیرکھانگون ہاگوا مانوگ۔

¹⁷ تانتانلا کھیرانگی شُکر پھولّانوگ، اِین نانگ تیبوے، نیانکھانگونّی رُوح بو شیدچان چوا مانوگ۔

¹⁸ نگا کھیوجاگونّی سانگ مانّگا ماشیسکھانّی سکادّی نانّگا سپیرا تانگ نیانچیسّی پھیا نگے خُدا شُکر پھولّاد۔

¹⁹ اِین نانگ عبادت خانہے نانّگا، جانماگونلا لابجا تانگچیسّی پھیا نگے ماشیسکھانّی سکادّی نانّگا تشیگس ستونگچو شادّی سانگ ہاگوچیسچانّی تشیگس ثنا شادچیسراگ۔

²⁰ فونو گُون، تیگون ہاگوچیسّی نانّگا کھیوجے سامبا ٹھوگو ژوگس یونگ ماگوس۔ کھیوجا نگانپا چوچیسّی نانّگا سکیونمیدکھانّی ٹھوگو چھونگون، اِین نانگ تے لابجاگون ہاگوچیسّی نانّگا لدانکھان ژوگس گیورشیگ۔

²¹ خُدے ہلژخمہ شوقبُونانّگا مولتے دوگ، ”نگے نگارانگی میگونلا سکادریگ سوسو تانگ جانیولّی میگون گیُودتے سپیرا تانگین، تینانگ کھونگونی نگے کھامینان۔“

²² ماشیسکھانّی سکادّی نانّگا سپیرا تانگچیسپو نی، ایمان چان مانپا، ایمان میدکھان گُونی پھیا ستاگس شیگ اینوگ۔ اِین نانگ لونگستان نی، ایمان میدکھان مانپا، ایمان چان گُونی پھانتھوگسّی پھیا اینوگ۔

²³ کالتیس عبادت خانہ گانگپو دزومستے یودتوس، ایمان میدکھان یا، تیتسوگس کھیودی سکورلا ہاماگوکھان ریگ یونگستے کھیوجا تشانگمے ماشیسکھانّی سکادّی نانّگا سپیرا تانگین تشورنا کھونگونی کھیوجاگون سنیوستے اینوگ زیرّا مانوگا؟

²⁴ اِین نانگ کالتیس کھیوجا تشانگمے دزومستے لونگستان شادین یودتوس، ایمان میدکھان یا، تیتسوگس کھیودی سکورلا ہاماگوکھانّی میریگ یونگنا، کھیوجے شادکھانگون گیُودتے کھونگون دِیگپاچان اینکھان یانگ خُدے ٹھیمسچاد زادچیسپو ہاگوتھوبّانوگ۔

²⁵ کھونگونی نیان زانے، کھونگونی سانگوے دِیگپے سامتشول گُون بیتے، کھونگونی پِیکدونگ ژُوگستے خُدا چولین، ”خُدے کھیوجاگونّی ٹوا لدینبا جُوگستے دوگ“ زیرین۔

تشیر نانگجین چھوس چوچیسّی کا۔

²⁶ اونا نگے فونو گُون، دورلدوسنا، کھیوجاگون نیامپو زوم زانے تشیر نانگجینلا، چیگی چھوسلو تانگچیس، چیگی لابجا تانگچیس، چیگی کھیوجاگونلا خُدے سنگون چوگّا زادکھانگونّی سکورلا شادچیس، چیگی ماشیسکھانّی سکادّی نانّگا سپیرا تانگچیس، یانگچیگی کھوے زیرکھانگون سکادگیور چوگوشیس اینوگ۔ ای تشانگما کھیوجاگون شیدچان چوچیسّی پھیا چوستے اینوگ۔

²⁷ می نیس یا سومی مانے، ماشیسکھانّی سکادّی نانّگا سپیرا تانگ ماگوس۔ کھونگونی چیگی ستینگنے چیگ تشیرکا چوستے سپیرا تانگوس، یانگچیگی کھونگونی زیرکھانگون سکادگیور چوگوس۔

²⁸ اِین نانگ کالتیس سکادگیورکھان سوجیگّانگ میدنا، تینے ماشیسکھانّی سکادّی نانّگا سپیرا تانگکھانبوے، عبادت خانہے نانّگا چوبچادتے دُوگستے سانگوے تھوگنے کھورانگ تانگ خُدا سپیرا تانگوس۔

²⁹ می نیس یا سومجیگّا لونگستان شادچوگشیگ، یانگ جانماگونلا تیگونّی زیرکھانبو لدینبا خُدے چھوگسنے اینّوگا یا مانوگ، تھاگچاد چوگشیگ۔

³⁰ اِین نانگ کالتیس سوجیگی لونگستان شادّی توسلا، جان میجیگّا مسیح چھوگسنے لون سوماجیگ تھوبنا، تینے لونگستان تانگین یودکھانّی می بوے لونگستان شادچیسپو گھاگّوس۔

³¹ تیزوگ چوچیسپوے پیغمبر تشانگمالا لونگستان شادچیسّی سکابس تھوبستے عبادت خانہ گانگپوا لوبشیس تانگ سپوسپا سکیییین۔

³² ایدتو بورشیگ، لونگستان شادکھانگونلا کھونگرانگونّی سیمسنید گُون چونتے بور نیانّانوگ۔

³³ چیازیرنا خُدے نی، تشیرکا میدکھان مانپا، جیدیے خُدے جُوگستے اینوگ، کازوگ جان عبادت خانہ تشانگما زوم زانے یودتے اینوگ۔

³⁴ عبادت خانہے نانّگا زوم زانے، بوموگونّی سپیرا ماتانّگا دوگوشیس اینوگ۔ کھونگونی سپیرا تانگچیسپو اوسپا مانوگ، کازوگ پیغمبر حضرت مُوسیٰؔ سی شریعتی نانّگا مولکھان نانگجین، کھونگون رانگی ماگپاگونّی وانگی یوگا دوگوشیس اینوگ۔

³⁵ کالتیس کھونگونلا ٹیوا ریگ یودنا، کھانگپا کھورانگونّی ماگپاگونلا ٹیگوشیس اینوگ، چیازیرنا عبادت خانہ دزومستے یودسا بوموگونّی سپیرا تانگچیسپو ٹھیلباجیگ اینوگ۔

³⁶ چی خُدے کا بو ، کھیوجا کرِنتُھس پاگونّی کانے گومارانگ جونگستے اینوگ سامّا راگا؟ چی کھیوجارانگ چیگپوا، تیبو سالّا زادسّا؟

³⁷ کالتیس سوجیگی کھورانگ پیغمبر یا رُوحانی کھیود یودکھانجیگ این سامّادنا، تینے نگے زیرکھانگون مسیح حُکم سالتے اینکھانبو کھیورانّگا ہاگوگوس۔

³⁸ اِین نانگ کالتیس کھیوجاگونّی تیبوا سنانگمید چونا، تینے خُدے کھیوجاگونلا سنانگمید چوا زادِین۔

³⁹ تیبویپھیا نگے فونو گُون، لونگستان شادچیسلا رینگسشیگ، یانگ جانما ماشیسکھانّی سکادّی نانّگا سپیرا تانگ ماگوس مازیرشیگ۔

⁴⁰ اِین نانگ چیتشانگما تشیرکا نانگجینلا چوچیسّی نانّگا تانتان چوشیگ۔