کورینتھیپའ ۱ 12 - New Testament in Ladakhi Langage

رُوحانی کھیود۔

¹ تا نگے فونو گُون، ہلژخمہ رُوح بوے نگاتانگونلا سالّا زادکھانّی کھیودگونّی سکورلا، کھیوجے ہاگوبو نورٹھولچانجیگ مییونگچیسّی دودپا چواد۔

² ایمان میدکھان این زانے، کھیوجاگون سپیرا تانگ مانیانکھانّی سکونڈاگونّی لام نورکھانّیکا ٹھیدکھانبو کھیوجاگونلا گیوس اینّوگ۔

³ تیبویپھیا سوجیگیانگ خُدے رُوح بوے نانّگا حضرت عیسیٰ سی نگان تاب مینیان یانگ ہلژخمہ رُوح چیگپو گیُودتے ماستوگس، سوجیگیانگ حضرت عیسیٰ سی تشانگمے مسیح جُوگستے اینوگ زیر مینیانچیسپو نگے کھیوجاگونلا گیُوس چھاچوگنیینراگ۔

⁴ رُوح بوے کھیود سناتشوگس مانگپوجیگ یودتے اینوگ، اِین نانگ تے تشانگمے چونگسابو رُوح کھورانگ اینوگ۔

⁵ جابستوگ سناتشوگسشیگ یودتے اینوگ، اِین نانگ نگاتانگونّی مسیح چیگی جابستوگ جوانوگ۔

⁶ خُدے پھیا نگاتانگی لاس سناتشوگسّی چوانوگ، اِین نانگ نگاتانگی چوکھانّی لاس تشانگمے نانّگا تینّا خُداپوے چھاگلاس زادّانوگ۔

⁷ چیگ تانگ چیگّا روگس چونیانچیسلا، رُوح بوے کھیود نگاتانگ ریریا خُدے سالّا زادّانوگ۔

⁸ تینّا رُوح بو گیُودتے، میجیگّا کھادا شیسرابسچان تانگ نیانچیسّی کھیود، یانگجیگّا تینّا رُوح بو گیُودتے، میگسالّی یونتانّی لونبو سالّا زادّانوگ۔

⁹ تینّا رُوح بوے چیگّا، ایمان چھینمو تانگ ژانجیگّا، پھانچوگچیسّی کھیودگون سالّانوگ۔

¹⁰ کھونگی میجیگّا معجزہ ستاگس گُون ستانچیسّی کھیود، ژانجیگّا لونگستان شادچیسّی کھیود، ژانجیگّا لونبو خُدے رُوح بوے چھوگسنے اینّوگا مانوگ ستانیانچیسّی کھیود پو، جانجیگّا ماشیسکھانّی سکادّی نانّگا سپیرا تانگچیسّی کھیود تانگ ژانجیگّا تے سکادگون گیورچیسّی کھیودگون سالّا زادّانوگ۔

¹¹ اِین نانگ تے کھیودگون تینّا رُوح چیگ چیگپوے سالّا زادّانوگ۔ می ریریا کازوگ کھیودریگ تھوبین، تیبو کھونگ چیگپوے تھاگچادّا زادّانوگ۔

زوگسپو چیگّا یانلاگ مانگپو۔

¹² جان میی زوگسپوا یانلاگ مانگپوجیگ یودنانگ، یانلاگ تشانگمے زوگسپو چھاتشانگجیگ ڈوبّانوگ۔ تینّا تسوگسلا عبادت خانہ گون مسیح سکوزوگس اینوگ۔

¹³ نگاتانگ کھاچیگ یہُودی پا یانگ کھاچیگ یہُودی پا مانوگ۔ کھاچیگ تشیوگ یانگ کھاچیگ رانگوانگچان اینوگ۔ اِین نانگ ہلژخمہ رُوح بوے نانّگا نگاتانگ ریریا غوتا سالّا زادچیسپوے نگاتانگون زوگسپو چیگ اینوگ۔ تا نگاتانگ ریریے تینّا رُوح چیگپوے کانے تھونگین اینوگ۔

¹⁴ اونا، زوگسپوبوا یانلاگ چیگ مانپا مانگپو، سوسو ریگ یودتے اینوگ۔

¹⁵ کالتیس کانگپے زیرنا، ”نگا زوگسپوے یانلاگ مان چیازیرنا نگا لاگپا مان۔“ چی تیبوے کانگپا زوگسپوے یانلاگشیگ لوسّا مانوگا؟

¹⁶ یانگ کالتیس نامچھوگی زیرنا، ”نگا زوگسپوے یانلاگشیگ مان چیازیرنا نگا میگ مان“، چی تیبوے نامچھوگپو زوگسپوے یانلاگشیگ لوسّا مانوگا؟

¹⁷ کالتیس زوگسپو گانگما میگ اینپینّا، کازوگی کھیوجاگونّی تشورین۔ یا کالتیس کھیوجاگونّی زوگسپو گانگما نامچھوگ اینپینّا، تینے کازوگی کھیوجاگونّی ٹیما تشورین۔

¹⁸ اِین نانگ نگاتانگونّی زوگسپوبوا تانتانلا یانلاگ مانگپوجیگ یودتے اینوگ۔ یانگ خُدے تے یانلاگّون کھونگی تھوگّونگس نانگجینلا، رانگرانگی ناسّیکا بورّا زادتے اینوگ۔

¹⁹ کالتیس زوگسپوبوا یانلاگ چیگ مانے میدپینّا، تینے کازوگ یامتشانجیگ میدڈو۔

²⁰ اونا، یانلاگ مانگپوجیگ یودتے اینوگ، اِین نانگ زوگسپو چیگ۔

²¹ میگی لاگپا مانے میزیر، ”نگا کھیرانگ گوشیس میراگ۔“ گوی کانگپا مانے میزیر، ”نگا کھیرانگی گھوسدوم مید۔“

²² نگوسپوبو نی اُتھوکس تھونگکھان تانگ کھاگچان مانکھانّی زوگسپوے یانلاگّون تشانگمیسانگ گھوسدومچانبو اینوگ۔

²³ یانگ سیوا نیونگونچان تانگ ستان میگوشیسچانّی زوگسپوے کھاگّونلا نگاتانگونّی سنانگستاگ چھینمو نیامپو کوسلاگ سکونتے گیالّا سنانگستاگ چوستے سکیوبستے بورّانوگ۔

²⁴ ستانّانگ ڈیگچیسچانّی جان یانلاگّونلا، تیتسوگسی میگسالّی سنانگستاگ گوسّا مانوگ۔ تینے خُدے سیوا نیونگونچانّی یانلاگّونلا مانّگا سیوا تانگ ستاستوگ تانگچوگستے زوگسپو گانگما نیامپو ڈانگسپو بورّا زادتے اینوگ۔

²⁵ تیبو چیگ تانگ چیگّا ستاستوگ چوچیس ماتشاد، تھوسمی تشانگمے نانّگا تھونڈیل یونگچیسلا چوا زادتے اینوگ۔

²⁶ کالتیس یانلاگ چیگّا زُومو یونگنا، جان یانلاگ تشانگمانگ تیبو نیامپو ردوگنگال تھونّگانوگ، یانگ کالتیس یانلاگ چیگّا سیوا تھوبنا، تیبو نیامپو جان یانلاگ تشانگمیانگ تھادپو چوانوگ۔

²⁷ تا کھیوجا تشانگما دزومستے، مسیح سکوزوگسپو اینوگ، یانگ کھیوجا ریرے تیبوے یانلاگّون اینوگ۔

²⁸ خُدے عبادت خانہے پھیا، لدامّا زادکھانّی یانلاگ کھاچیگ یگون اینوگ۔ دانگپوبو، مسیح رسُول گُون، نیسپابو، پیغمبر گون، سومپابو، لوبپون گُون، تینے ہالاسّی ستاس ستانکھان گُون، تینے پھانچوگ نیانچیسّی کھیود یودکھانگون، تینے چیگ تانگ چیگّا روگس چوکھانگون، تینے عبادت خانہ گاُسکیونگ چیسّی کھیود یودکھانگون، تینے ماشیسکھانّی سکادگونّی نانّگا سپیرا تانگ نیانچیسّی کھیود یودکھانگون۔

²⁹ چی نگاتانگ تشانگما حضرت عیسیٰ مسیح رسُول گُون اینّا؟ چی نگاتانگ تشانگما پیغمبر گون اینّا؟ چی نگاتانگ تشانگما لوبپون گُون اینّا؟ چی نگاتانگ تشانگمالا معجزہ ستاس چوچیسّی وانگ یودا؟

³⁰ چی نگاتانگ تشانگمالا پھانچوگ نیانچیسّی کھیود یودا؟ چی نگاتانگ تشانگمالا ماشیسکھانّی سکادگونّی نانّگا سپیرا تانگ نیانچیسّی کھیود یودا؟ چی نگاتانگ تشانگمالا ماشیسکھانّی سکادّی سکادگیور چوتھوبچیسّی کھیود یودا؟

³¹ عبادت خانہ لا تشانگمیسانگ پھانتھوگس مانّگا تانگ نیانچیسّی کھیودگون کھیوجا تھوبچیسّی دودپا بورگوشیس اینوگ۔ اِین نانگ تا نگے کھیوجاگونلا میتشے پھودتشول تشانگمے نانگنے گیالشوگ اینکھانبو ستانین۔