तीतुस 3 - लाहौली बाइबिल

मसीही चाल चलन

¹ विशवासी मीहतिंङ हिद दिलाएच़ा लोह, कि हाकिम ए अधिकारी तु अधीन बंङज़ु, दंङ दोतु हुकुम मनेक्तु, दंङ ऊईतु थल्जी हर इच्च़ा रूठे कमो थल्जी तेयार बंङज़ुंई,

² दोच़ी अरिया बदनाम लेह मेस; लड़ाई-झगड़ा लहज़ा शुहबी मेस, पर ऊई मीहतु थल्जी नम्र स्वभाव शुहबी जूंस, दंङ भत्ते मीहतंङ साते नम्रतारंङ साते बंङज़ी जूंशी तोह।

³ छना कुचे हेनर ला तुहई, मुर्ख ए परमेश्वरो हुकुम माह मनेक्च़ा मीहरे, मीहतु दोरच़ी धोखा खोकसिमी तातंई, दंङ हेनर मदम हिटी ए संसारो चीज़ा तु गुलाम तोईरे, छना बैर-भाव, दंङ जलन तहच़ि रिंङ एनोह जीवन श्रींङज़ातेर, दंङ मीहतंङ साते नफरत लहज़ातेर, दंङ इदि-अई दिरंङ साते बैर तहच़ातेर।

⁴ तांला यह्च़ा हेंदु उद्धारकर्ता परमेश्वरे एनोह दया ए दाह हेंदु मीहतु टोहकठे कंङातो।

⁵ दोई हेंदिंङ पापो सज़ा ओ दोरच़ी बचाएति दंङ दि धर्मिकता ओ कमो थल्जी मशत, अंऊ हेंज़ी लाहतंई, पर दोई एनोह दाह ओ हिसाबे लहरी, दोई हेंदु पाप शुल्ज़े शत्‌ह लेह च़रति, दंङ पवित्र आत्माओ दोरच़ी हेंदिंङ खरकोई जीवन रें च़रति।

⁶ हेंदु उद्धारकर्ता यीशु मसीह छि लहसी ततो दोऊ दोरच़ी परमेश्वरे हेंदिंङ पवित्र आत्मा रांहषी ततो, ताकि दुह हेंदिंङ सामर्थो कम लेह तरपोतो।

⁷ अंऊ दिरिंङ हेनर दुह अनंत जीवन खोकसिमी उम्मीद लेह तरपोंई अंऊ परमेश्वरे हेंदिंङ एनोह कटुरे शुहबिमी वाईदा लाहते। दंङ दि पाहठी ञेंहच़ी ञेंहच़ातोंई छना कुचे परमेश्वरे एनोह मोह्ड़े दाह ओ दोरच़ी हेंदिंङ एनारंङ साते सही ठहराच़ा।

⁸ दि गप्पा हेले तोह, अंऊ गेह हेंतेग-हेंतेग कंङातेग दंङ गेह जुंज़ातग कि कांह विशवासी तिंङ दि गप्पातु पाहठी पक्‍का रंङ साते सिखातु। झांह लेह कि अच़ि परमेश्वरो टोहकठे विशवास लहरिर, दोरे रूठे कमो थल्जी एनोह टेम रंड्रीमी थल्जी ध्यान रांई दि भत्ते तु थल्जी दि गप्पा रूठे ए फायदेमंद तोह।

⁹ पर मुर्ख गप्पो बहसो दोरच़ी शत्‌ह बंङज़ु, बाह-मेमेतु लम्हें सुचि थल्जी टेम बरबाद थालंही, बैर विरोध ए दुह झगड़ो दोरच़ी, अंऊ मूसा ओ नियम कानूनो पाहठी शोतो, दोतंङ बचेके तोंई, छना कुचे दुह गप्पो छल्ले फायदा माह दंङ माह ए अतुआ मदत लहज़ी।

¹⁰ अंऊ मीहच़ी कलीसिया रिंङ फूट केट्रातोर, कनिंङ दुह मीहतिंङ कम से कम झुह्ट फेरे खबरदार लहज़ी जूंशी तोह कि दोई झांह लेहई बंद लेह च़रतु। दोऊ थल, दोतिंङ छोड़ेके च़रतु।

¹¹ केहच़ी दि ञेंए कि धिंङघा मीह अरि ञेंए तंङे मदम अमरिंङ इबि लेहकी तोह, दंङ दोऊ थल दोऊ मदम कम ज़ि दि साबित लोहतो कि दुह दोषी शुह।

निज़ी निर्देश ए अभिवादन

¹² अपेहल गेह कांह कछंङ क्रेते टापूरिंङ अतिगा अरतिमास ए तुखिकुस बि च़रपोग, दंङ गिऊ कछंङ तो गेरंङ साते निकुपुलिस शहरंङ अपिमी कोशिश लोह, छना कुचे गेह दोर्तिंङ ए सोई ओ ध्याड़ा बिताच़िमी फेंसला लाहतग।

¹³ अपेहल जेनास वकील ए अपुल्लोस एनोह यात्राओ थल्जी हुंच़िरी, दंङ दोतु मदतो थल्जी छिल्ला केई लेह तरपोन, दोतु थल्जी लोह। दि ध्यान तोह कि दोतिंङ छिल्ला चीज़ो कमी शुहबी मेस।

¹⁴ सिर्फ धोंण ए मशत, कनिंङ विशवासी तिंङ सिखासी जूंशी तोह कि रूठे कम लहज़िमी थल्जी लगातार मेहनत लोहवा लंहि ताकि दुह मीहतु ज़रूरत पूरा लहज़िमी थल्जी रूठे कम लहज़िमी दोतिंङ महस मेहनत लेह जुंशी तोह। झांह लेह विशवासी तिंङ इच्च़ा मकसद रंङ साते जीवन श्रींङमी मदत खोकसोतो।

¹⁵ गेरंङ साते देर भत्ते विशवासी ज़ि कनिंङ नमस्कार लहज़ातोर। दोर क्रेते टापू रिंङ हेंदु साथी विशवासी तिंङ अंऊ हेंदंङ साते दाह तहचातोरे, दोतिंङ ला गिऊ तरफे नमस्कार लोह। गेह प्रार्थना लहज़ातग कि प्रभु केहतु भत्ते तु टोईच़ी मोह्ड़े दाह लोहतो।