तीतुस 2 - लाहौली बाइबिल

व्यवहारो थल्जी शिक्षा

¹ पर तीतुस काह विशवासी तिंङ सिर्फ दुह ए गप्पा कंड्रु अंऊ सच्चाई ओ शिक्षा तोह।

² कलीसिया ओ सेंहणा बि एनोह टोहकठे काबू लहच़ी जूंशी तोह, दंङ झांह ठ्रोह व्यवहार लेह जूंशी तोह ताकि मीहच़ी दोऊ आदर लोहर, दंङ समझदार शुहबी जूंस। दोतिंङ परमेश्वरो टोहकठे पक्‍का रंङ विशवास लेह जूंशी तोह, दंङ ऊई मीहतंङ साते सच्चाई रंङ साते दाह लेह जूंशी तोह दंङ सहन लहज़ार शुहबी जूंस।

³ झांह ए ठ्रोह यंङषी मेच़िमीरे ला झांह ठ्रोह व्यवहार लंहि अतु वहज़ा ज़ि परमेश्वराबि आदर खोकसोतो। दंङ ऊईतु पाहठी मदम कुट्रा ठ्रोह शुहबी मेस, माह सरा तुंङज़ाड़, पर ऊईतिंङ रूठे गप्पारे सिखाएच़ा शुहबी जूंस

⁴ ताकि दोरे जवान मेच़िमीतु थल्जी रूठे उदाहरण बणेक्पि जूंस दंङ सलाह रंड्रा शुहबी जूंस कि एनातु गगसा ए कटुतंङ छना ठ्रोह दाह लेह जूंशी तोह।

⁵ जवान मेच़िमी तिंङ एनोह टोहकठे काबू लहज़ी जूंशी तोह, दंङ एनोह गगसो थल्जी वफादार शुहबी जूंस, दंङ एनोह चुंङ देखभाल लहज़ा शुहबी जूंस, दंङ ऊईतु थल्जी दयावन्त शुहबी जूंस, एनातु-एनातु गगसो गप्पा मनेक्च़ा शुहबी जूंस, ताकि अरिला परमेश्वरो रूठे बचनो पाहठी मदम कुट्री मेस।

⁶ ध्वांए जवान गंङमीतिंङ ला समझाए कि च़रतुंई, कि दोरे एनोह टोईच़ी काबू लहज़ा जूंशी तोह।

⁷ केतिंङ भत्ते धिरा रिंङ हमेशा रूठे कम लहज़ी जूंशी तोह, अंऊ ऊईतु थल्जी इच्च़ा उदाहरण बणेक्पोतो अतु ऊईज़ि हमेशा पालन लोहर। अपेहल काह विशवासी तिंङ परमेश्वरो पाहठी सिखाएच़ातंई, दंङ दोबि रूठे मकसद रंङ साते सिखातु, झांह लेह मीहच़ी कांह आदर लोहर।

⁸ कांह शिक्षा हमेशा सच्चाई ओ शुहबी जूंस, अतु अच़िया बुराई लेह माह जूंस, ताकि दोरे अंऊ यीशु मसीहू वहज़ा ज़ि कांह विरोध लहज़ातोर, शर्मिन्दा शोर। छना कुचे दोरे हेंदु पाहठी छल्ले मदम कुट्री मरपोर।

⁹ विशवासी अंऊ दास तोह, दोतिंङ सिखातु कि दोच़ी दुह भत्ते धिर लोहर अंऊ दोतु मालिक दोतिंङ लहज़िमी थल्जी कुट्रा। दोतिंङ कंड्रु कि दोरे इच्च़ा गप्पा रिंङ एनातु मालिका बि खुश लहज़िमी कोशिश लोहवा लंहि दंङ दोतंङ साते बहस लोहवा थालंही।

¹⁰ चोरी चालाकी थालंही; पर साबित लंहि कि दू हमेशा ईमानदार तोह, ताकि मीहरे दोऊ रूठे व्यवहारा रिंङ ध्यान रमोर दंङ छिल्ल धिर दोच़ी लहज़ातोर दू मीहतु दोरच़ी हेंदु उद्धारकर्ता परमेश्वरो पाहठी रूठे खबर रेड्रीमी वहज़ा बणेक्तेंई।

¹¹ परमेश्वरे भत्ते मीहतिंङ बचाएच़िमी थल्जी इच्च़ा अम बणाएच़िमी ज़रिया ज़ि एनोह मोह्ड़े दाह कंड्रिरी। अंऊ भत्ते मीहतु उद्धारो कारण तोत,

¹² दि मोह्ड़े दाह ओ दोरच़ी परमेश्वर हेंदिंङ हुकुम रंड्रा, कि हेनर ध्वांए ठ्रोह व्यवहार लेह बन्द लेह च़रपोंई, अंऊ दोबि खुश माह लहज़ा, दंङ दुह चीज़ा तु लालच लेह बंद लंहि अतु हिटी अविशवासी ज़ि तहच़ातेर, दंङ अपेहल हेनर हेंतेग दि धरतीऊ टोहकठे ए तोतोंई दंङ बुद्धिमानी ए धर्मिकता रंङ दि तरीका रंङ साते कम लंहि कि अंऊ परमेश्वराबि खुश लहज़ा।

¹³ हेनर झांह ठ्रोह व्यवहार लोंहि कि अपेहल हेनर उम्मीदा रंङ साते दुह अद्धभुत ध्याड़ा बि रुमज़ा तोंई, अपेहल यीशु मसीह अंऊ हेंदु मोह्ड़े परमेश्वर ए उद्धारकर्ता शुह, एनोह भत्ते महिमा रंङ साते धरती ऊ टोहकठे प्रगट शोतो।

¹⁴ यीशु मसीह हेंदु थल्जी सिए इलि ताकि हेंदिंङ भत्ते पाहठी पापो दोरच़ी आज़ाद लोहतो दंङ हेंदिंङ शुद्ध लेह तरपोतो ताकि हेनर दोऊ खास मीहरे बणेंके योंई। अंऊ रूठे कम लहज़िमी थल्जी भत्ते तरफे समर्पित शोतो

¹⁵ झांह लेह तीतुस गेह जुंज़ातग कि कांह क्रेते टापू अविशवासी तिंङ दि गप्पा सिखातु अंऊ गेह कनिंङ कांहषी तातग। केनोह मीहतिंङ दि लहज़िमी थल्जी उत्साहित लोह, अंऊर ज़रूरत शोतो, दोर्तिंङ दोतिंङ सुधार लोह। कनिंङ झांह लहच़िमी भत्ते अधिकार तोह, अच़िया कांह अपमान लेह माह जूंस।