तीतुस 1 - लाहौली बाइबिल

अभिवादन

¹ गेह पोलुस अंऊ परमेश्वरो दास ए यीशु मसीहू प्रेरित शुगाह, केतिंङ दि डाक चेहच़ातग। गेह परमेश्वरो अंङषी मीहतिंङ पक्‍का लहज़ी ए दुह सच्चाईऊ शिक्षा समझेक्सिमी थल्जी अंङषी शुई, ताकि दोरे झांह ठ्रोह जीवन श्रींङमोंई अंऊ परमेश्वराबि खुश लहज़ा।

² दिऊ नतीज़ा दि तोह कि, दोरे परमेश्वरारंङ साते अनंत जीवनो ओ थल्जी बंङज़िमी उम्मीद तहच़ातेर, छना कुचे परमेश्वर, अंऊ अपेहल ला हप्सी माह कुट्रा, संसारो रचना लहज़िमी तुहई वाईदा लाहते कि दोऊ मीहरे हमेशा ओ थल्जी श्रींङी बंङज़ोर।

³ दंङ हेंतेग ठीक टेमारिंङ, परमेश्वरे दि रूठे खबर हेंदु तुईज़ी प्रगट लहरी, दंङ हेनर दिऊ प्रचार भत्ते तु बिचंङ लहज़ातंई हेंदु उद्धारकर्ता परमेश्वरे दि हुकुम रंड्रा गिह्बी ज़िम्मेवारी रंदे कि दोऊ थल्जी दि कम लोहग।

⁴ गेह दि डाक तीतुस बि चेहच़ातग। अंऊ गिऊ थल्जी इच्च़ा योह ठ्रोह तोह छना कुचे कांह ला मसीहू टोहकठे विशवास लहज़ा छना गेह लहज़ातग गेह प्रार्थना लहज़ातग कि बाह परमेश्वर ए हेंदु उद्धार लहज़ा प्रभु यीशु मसीह केतिंङ मोह्ड़े दाह ए शांति रम्मा लोहतो।

क्रेते रिंङ तीतुसो कम

⁵ गेह झांह लेह कनिंङ क्रेते टापूरिंङ (मतलब समुंद्रो बिचंङ अंऊ ज़मीन शुहबी दोबि टापू कुट्री) केट्रा अतिगा, ताकि कांह दोर्तिंङ हेंदु कम पूरा लेह तरपोन दंङ क्रेते टापू ओ हर शहर रिंङ कलीसिया ओ सेंहणा अंङे च़रतु, ध्वांए छना लहज़िमी गेह हुकुम रांहषी तातग।

⁶ इच्च़ा कलीसिया ओ मुख्या बि बेकसूर ए इच्च़ा मेच़ो गगसा शुहबी जूंस, अतु कटुरे विशवासी शुहबी जूंस, दंङ अच़िला ला दोतु टोहकठे दि दोष लगासी माह जूंस कि दोरे बेकाबू ए हुकुमो भाषे माह लहज़ातोर।

⁷ छना कुचे कलीसिया ओ मुख्या बि परमेश्वरो खज़ान्च़ीज़ि शुहबीरंङ साते बेकसूर शुहबी जूंस; माह ज़िद्दी, माह रोहष, माह पियक्कड़, माह मारपीठ लहज़ा, माह ढबाहो लालची शुहबी जूंस।

⁸ पर पौहना तु आदर लहज़ा ए ऊईतिंङ साते भलाई लहज़ा, समझदार, धर्मी, दंङ पवित्र जीवन श्रींङज़ाड़, दंङ एनोह हिटीतिंङ काबू लहज़ा शुहबी जूंस।

⁹ दोबि यीशु मसीहू विशवासो जोगे खबरो टोहकठे पक्‍का रंङ विशवास लेह जूंशी तोह अंऊ हेंज़ी सिखाएसी तातंई ताकि दुह ऊईतिंङ हेले ऊ शिक्षा मनेक्च़िमी थल्जी उत्साहित लेह तरपोतो दंङ दोतु गलती माफ लेह तरपोतो।

¹⁰ गेह दि दिऊ थल्जी कुट्रतग, छना कुचे महसे मीहरे हेले शिक्षाओ विरोध लहज़ातोर, अंऊ दोच़ी बकवास लहज़ातोर ए ऊईतिंङ धोखा रंड्रातोर। खासकर दि यहुदी मीहरे अंऊ विशवासी बणेंके इलजी तोतोर अंऊ उद्धारो थल्जी खतना रिंङ जोर रंड्रातोर।

¹¹ झांह ठ्रोह मीहतिंङ शिक्षा रंड्रीमी इजाज़त थारांई, छना कुचे अपेहल दोरे दि गप्पा सिखाएच़ातोर अंऊ दोतिंङ सिखाएसी माह जूंस, दंङ दोरे भत्ते टबरातु विशवास नाश लेह च़रच़ा। दोरे झांह लेह ढबाह कमाच़ी जुंज़ातोर।

¹² क्रेते टापू इच्च़ा मीह, अतिंङ दोरे मसीह इच्च़ा बुद्धिमान मीह ञेंहच़ातोर, कुहषी ततोर, कि क्रेते टापू मीहरे हमेशा हप्सी कुट्रातोर। दोरे बंणो घ्वंणा तु ठ्रोह व्यवहार लहज़ातोर दोरे सुस्त तोतोर दंङ महस बगत ज़ाह्जाढ़ तोतोरे।

¹³ दि मीहतु पाहठी दि गप्पा हेंतेग ला हेले तोह। झांह लेह दोतिंङ पक्‍का खबरदार लोहवा लोह, कि दोरे विशवासरिंङ पक्‍का शुहबी जूंस।

¹⁴ यहुदी तु बनावटी कथा ए सच्चाई ओ दोरच़ी शत्‌ह शुहचे मीहतु हुकुमो हखा ध्यान थारांई।

¹⁵ दुह मीहतु थल्जी अतु सेहमरिंङ पापो विचार माह, भत्ते चीज़ारे शुद्ध तोतोर, पर दुह मदम मीहतु थल्जी दंङ यीशु मसीहू टोहकठे विशवास माह लहज़ातोर, छिल्ला धिर दोच़ी लहज़ातोर दुह अशुद्ध तोह।

¹⁶ दोरे हप्सी शिक्षा रंड्रा कुट्रातोरे कि हेनर परमेश्वरा बि ञेंच़ातंई, पर दोतु कम दिबी गलत सबित लहच़ी केट्रा। छना कुचे दोरे महस झखंजी (घिनौने) ए हुकुम माह मनेक्च़ा तोतोर, दंङ दोरे अंऊ ला रूठे कम लहज़िमी जोगे माह तोहर।