रोमियो 8 - लाहौली बाइबिल

पवित्र आत्माओ दोरच़ी जीवन

¹ झांह लेह, एंतेग अंऊ यीशु मसीह रिंङ तोतोर, दोतु टोईच़ी सज़ाओ हुकुम माह। (छना कुचे दोरे फुको हिसाबे माह पर आत्माओ हिसाबे जोज़ातोर।)

² छना कुचे पवित्र आत्माज़ि केतिंङ दू जीवन रांहषी ततो अंऊ यीशु मसीहू दोरच़ी खोकसिरी दंङ दोई केतिंङ पाप ए मौतो दोरच़ी आज़ाद लहरी।

³ छना कुचे अंऊ कम, मुसाओ कानून पापो स्वाभावो दोरच़ी कमज़ोर शुहचे लेह मरति, दोबि परमेश्वरे लहरी। दोई पापो प्रायश्चितो थल्जी एनोह योह बि ए पापी मीहू ठ्रोह पापो बलि ऊ थल्जी च़चे च़रति, झांह ठ्रोह परमेश्वरे पाप मय फुकारिंङ ए पापो सामर्थ थाक्शे च़रति।

⁴ झांह लेह कि कानूनो विधि हेंदिंङ अंऊ पापमय स्वाभावो हिसाबे माह पर पवित्र आत्माओ हिसाबे जोज़ातंई, पूरे लेह जूंस।

⁵ छना कुचे अंऊ मीहरे पापो स्वाभावो दोरच़ी वशारिंङ शवाहतोर दोरे पापो गप्पो पाहठी सोचेक्च़ातोर, पर अंऊ दोरे पवित्र आत्माओ वशारिंङ शवाहतोर दोरे दू गप्पो पाहठी सोचेक्च़ातोर अंऊ आत्माबि खुश लहज़ा।

⁶ फुका रंङ साते दाह लहज़ी ता मौत ए तोह, पर आत्मो टोईच़ी सेहम लगाएच़ी जीवन ए शांति तोह।

⁷ पापमय स्वाभावो टोईच़ी सेहम लगाईचि ता परमेश्वरारंङ साते बैर लहज़ी शुह, छना कुचे पापमय स्वाभाव माह ता परमेश्वरो कानूनो अधीन तोह, दंङ माह मुसाओ कानून भाषे लेह तरपोतो;

⁸ दंङ अंऊ पापमय स्वाभावो वशारिंङ तोतोर, दोरे परमेश्वरा बि खुश लेह मरपोर।

⁹ पर अपेहल पवित्र आत्मा केहतु अंदरेग वास लहज़ा, दंङ केरे पापमय स्वाभावो वशारिंङ माह तोहनि, पर आत्माओ वशारिंङ तोतोंई अगर अतिंङ पवित्र आत्मा माह दंङ दू मसीहू मीह माह शुह।

¹⁰ एंतेग दिऊ थल्जी कि केहतु अंदरेग मसीह वास लहज़ा, पापो थल्जी फुको सिला धर्मिकताओ वहज़ा ज़ि केहतु आत्मा श्रींङे तोह।

¹¹ दंङ अगर परमेश्वरो आत्मा अच़ि यीशु मसीह बि सिऊ दोरच़ी श्रींङमी लहरी, दोई केहतु सिए फुक ला एनोह आत्मा दोरच़ी अंऊ केहतु अंदरेग बसेगी तोह श्रींङमी लोहतो।

¹² दंङ हे गिऊ प्यारे साथी विशवासी रे, हेंदिंङ हुकुम भाषे लेह जूंशी तोह, पर हेंदु पापमय स्वाभाव माह जुंज़ा कि हेनर झांह लोंहई।

¹³ छना कुचे अगर केरे पापमय स्वाभावो ठ्रोह ध्याड़ा च़रपोंई, दंङ हेले सिए योंई, अगर पवित्र आत्माओ सामर्थे पापमय कम सच़ी च़रपोंई, दंङ केरे श्रींङे बंङज़ोंई।

¹⁴ झांह लेह कि अंयों मीहरे परमेश्वरो आत्मारिंङ जोज़ातोर, दोरे ए परमेश्वरो कटु शुरे।

¹⁵ छना कुचे केतिंङ गुलामी आत्मा खोकसी माह, कि यह्च़ा बेवा योंई पर पवित्र आत्मा हेंदिंङ परमेश्वरो कटुरे बणाएशा, अतिंङ हेनर हे बाह, हे पिता कुचे हाऊष रंड्रा तंई।

¹⁶ पवित्र आत्मा एनेह ए केहतु आत्मा रंङ साते गवाही रंड्रा, कि हेनर परमेश्वरो कटुरे शुई।

¹⁷ अगर हेनर परमेश्वरो कटुरे शुई ता दोऊ वारिस ला शुई, पर परमेश्वरो वारिस ए मसीह रंङ साते वारिस तोईनी। अगर हेनर यीशु रंङ साते दुख उठाएपोंई, दंङ हेनर दोऊ महिमा रिंङ ला सहभागी शुहचे योंई।

भविष्यरिङ प्रगट शुहच़ा महिमा

¹⁸ गिह्बी पक्‍का पता तोह, कि अंऊ महिमा हेंदिंङ थले खोकसोतो, दू दि दुख बे महस मोह्ड़े तोह अंऊ हेंज़ी एंतेग सहन लहज़ी लेहकी तोतोंई।

¹⁹ छना कुचे भत्ते संसार मोह्ड़े उम्मीदा रंङ साते दू टेमाबि रूमज़ा तोह, अपेहल परमेश्वरे एनोह कटुरे प्रगट लोहतो।

²⁰ छना कुचे छिल्ल दिर परमेश्वरे सृष्टि लहरी, दुह सृष्टि एनोह कीमत योह्च़े च़रति, दिऊ थल्जी मशत कि दोई एनेह दि जुंज़ाते, पर दिऊ थल्जी कि परमेश्वरे झांह लहरी। तांला यह्च़ा उम्मीद तोह।

²¹ भत्ते संसार दू ध्याड़ा बि रूमज़ा तोह अपेहल दि मौत ए विनाशो दोरच़ी छुटकारा खोकशी, परमेश्वरो ओलाद रंङ साते महिमाऊ आज़ादी रिंङ शामिल शुहचे योतो।

²² छना कुचे ञेंहच़ी ञेंच़ातंई कि अपेहल बे आदमे पाप लहरी, दोहपल बेहच़ी हेंतेग तचेक भत्ते संसार इच्च़ा मेच़िमी ठ्रोह टेहषी सहन लहज़ी लेहकी तोह, छना दोई कटु लिहक्पी मुक्का सहन लहज़ी।

²³ सिर्फ धोंण ए मशत, पर हेनरे ला, अतिंङ शुहबिमी महिमा बे तुहई स्वादो रूपारिंङ पवित्र आत्मा बसेक्पा। एनोह अंदरेग ए अंदरेग क्रिम्बातोर। हेंतेग ञेंरे दू ध्याड़ा बि रुमज़ा तोतोंई अपेहल परमेश्वर हेंदिंङ एनोह गोद लेहपसी कटुतु रूपारिंङ भत्ते अधिकार रें च़रपोतो। मतलब हेंदिंङ खरकोई फुक रें हेंदु फुक आज़ाद लेह च़रपोतो।

²⁴ हेंतेग अंऊ परमेश्वरे हेनर बचाएकतो, दंङ हेंदु कछंङ दि उम्मीद तोह। पर अगर हेनर छा खोकसिमी उम्मीद लहज़ातंई अंऊ हेंदु कछंङ तुहई ए तोह, दंङ दू उम्मीद माह शुह। अरिला दू चीज़ खोकसिमी उम्मीद माह लहज़ा अंऊ दोऊ कछंङ तुहई ए तोह।

²⁵ पर हेंदिंङ झांह ठ्रोह खोकसिमी उम्मीद तोह अंऊ हेंदु कछंङ हेंतेग तचेक माह, झांह लेह हेनर धीरज़ रंङ साते दू मुक्का तचेक रुमज़ा बंङज़ोंई अपेहल तचेक कि हेनर दोबि खोक्शे माह केओनि।

²⁶ दि रीतिरंङ साते पवित्र आत्मा ला हेंदु मदत लहज़ा अपेहल परमेश्वरा रिंङ हेंदु विशवास कम शवाह, छना कुचे ञेंहच़ी ञेंहच़ातंई, कि प्रार्थना छना ठ्रोह लेह जूंस; पर पवित्र आत्मा एनेह ए झांह ठ्रोह उशकारा रें, रें अंऊ समझ बे धकते तोह, हेंदु थल्जी बिनती लहज़ा।

²⁷ दंङ सेहम परखेखच़ा परमेश्वर दि ञेंहच़ा कि पवित्र आत्माओ मकसद छि तोह। छना कुचे पवित्र आत्मा परमेश्वरो हिटी ओ हिसाबे दोऊ मीहतु थल्जी प्रार्थना लहज़ा।

²⁸ दंङ ञेंहच़ी ञेंहच़ातोंई, कि अंऊ मीहरे परमेश्वर रंङ साते दाह लहज़ातोर, दोतु थल्जी भत्ते गप्पा ठ्रोहका शुहचे भलाई बि पैदा लहज़ा; मतलब दोतु ए थल्जी अंऊ परमेश्वरो हिटी हिसाबे अंङषी तोतोर।

²⁹ छना कुचे अंऊ दोतिंङ दोई तुहई ए अंङषी चरच़तो दोतु थल्जी दि इरादा लेह चरच़तो कि दोरे दोऊ योह यीशु ठ्रोह शोर ताकि दू न्वारेतु बिचंङ जेठे शोतो।

³⁰ दंङ अतु थल्जी परमेश्वरे तुहई इरादा लाहते दोतिंङ अंङे ला च़रति, दंङ अतिंङ अंङाते, दोतिंङ धर्मी घोषित लहरी, दंङ अतिंङ धर्मी घोषित लहरी, दोतंङ साते एनोह महिमा ला फाए च़रति।

परमेश्वरो दाह

³¹ दि भत्ते गप्पा तिंङ ध्यानारंङ तहच़ि हेनर दि नतीज़ा रिंङ पिचातोंई, कि अगर परमेश्वर हेंदु हखा तोह ता, हेंदिंङ अच़िला यहरच़े मरपोतो।

³² परमेश्वरे एनोह योह एनोह थल्जी माह, पर दोबि हेंदु थल्जी एनोह बैरीतु हवाले लेह च़रति, दोई हेंदिंङ दू भत्ते धिर रमोतो अतिंङ दोई हेंदिंङ रंड्रीमी वाईदा लहसी ततो।

³³ अच़िला हेंदु टोहकठे परमेश्वरो तुईज़ी दोष लगाएच़ी मरपोर, छना कुचे दुह ए शुह अंऊ हेंदिंङ धर्मी घोषित लहज़ा।

³⁴ अच़िला हेंदु निन्दा लेह मरपोतो छना कुचे दू यीशु मसीह तोह, अंऊ हेंदु थल्जी सिए इलि, दंङ सिए दोतु बिचंङ ज़ि श्रींङमी लहरी हेंतेग परमेश्वरो सुचंङ हासी तोह, दंङ हेंदु थल्जी बिनती लहज़ा।

³⁵ अच़िला हेंदिंङ परमेश्वरो दाह ओ दोरच़ी शत्‌ह लेह मरपोतो। माह दुख, माह मुसीबत, माह झगड़ा, माह अकाल, माह कंगाली, माह जोखिम, माह तलवार,

³⁶ छना पवित्र शास्त्रारिंङ च़ेहसी तोह, “कांह वहज़ा ज़ि ञेंतिंङ हर टेम मौतो खतरा बंङज़ा; ञेंरे सिब्ज़ा त्रैंईतु ठ्रोह समझेक्च़ातोर।”

³⁷ पर दि भत्ते गप्पारिंङ हेनर दोऊ दोरच़ी ए जयवंत ला शुहचे य्वातंई, अच़ि हेंदंङ साते दाह लहज़ा।

^38-39 गिह्बी पक्‍का विशवास तोह कि माह ता मौत माह ए जीवन, माह स्वर्गदूत माह सर्गो शाक्ति, माह वर्तमान माह भविष्य, माह सामर्थ, माह सर्ग माह पाताल रिंङ अरिया शाक्ति, दंङ माह ए भत्ते संसारारिंङ छा चीज़ हेंदिंङ परमेश्वरो दू दाह ओ दोरच़ी शत्‌ह लेह तरपोतो, अंऊ हेंदिंङ हेंदु प्रभु यीशु मसीहू दोरच़ी खोकसा तोह।