रोमियो 6 - लाहौली बाइबिल

पापो थल्जी सिए मसीह रि श्रींङमी

¹ परमेश्वर एनोह मोह्ड़े दाह ओ दोरच़ी हेंदु पाप माफ लहज़ा। पर छि हेंज़ी दि सोचेक्तेंई कि हेनर पाप लोहवा ए लोंहि।

² माह बिल्कुल माह! हेनर पापो थल्जी सिए इलजी तोतोंई, दंङ झांह लेह हेंदिंङ लगातार पाप लहज़ी माह जूंस।

³ ञेंहच़ी ञेंहच़ातंई कि अपेहल हेंज़ी यीशु मसीहू बपतिस्मा लेहपति, दंङ हेनर दोरंङ साते सिए इलांई।

⁴ अपेहल हेंज़ी बपतिस्मा लेहपच़ी च़रतुंई दि झांह ठ्रोह तोहई छना हेनर यीशु रंङ साते सिए इलजी तोतोंई दंङ दोरंङ साते पथेक्सा इलांई, ताकि छना मसीह बाह परमेश्वरो महिमा ओ दोरच़ी सिमी दोरच़ी श्रींङमी लहरी, ध्वांए हेनर ला खरकोई जीवनो ठ्रोह चाल चलेपोंई।

⁵ छना कुचे अगर हेनर दोऊ बपतिस्मा दोरच़ी दोऊ सिमी बराबर दोरंङ साते ठ्रोहका शुहचे योंई, दंङ पक्‍का ए दोऊ श्रींङमी मुक्का ला इच्च़ा ए शुहचे योंई।

⁶ ञेंहच़ी ञेंहच़ातोंई कि ञेंहतु युई पापो स्वाभाव यीशु मसीह रंङ साते क्रूसो टोईच़ी चढ़ाके च़रतिर ताकि हेंदु फुका रिंङ पापो स्वाभाव नाश शुहचे योतो, दंङ हेनर तुंखा पापो गुलामीरिंङ माह बंङज़ोंई।

⁷ छना कुचे अपेहल हेनर मसीह रंङ साते सिए इलेंई, दंङ हेनर पापो वशो दोरच़ी आज़ाद शुहचे योंई।

⁸ झांह लेह अगर हेनर मसीह रंङ साते सिए इलांई, दंङ हेंदु विशवास दि ला तोह कि हेनर दोरंङ साते श्रींङी ला योंई।

⁹ ञेंहच़ी ञेंहच़ातंई कि मसीह सिमी दोरच़ी श्रींङी इलि दंङ यह्च़ा अपेहल ला माह सिओतो। मौतो दोऊ टोहकठे छल्ले वश माह शोतो।

¹⁰ छना कुचे मसीह अंऊ सिए इलि दंङ पापो थल्जी इच्च़ा फेरा सिए इलि; पर अंऊ कि हेंतेग श्रींङी तोह, दंङ परमेश्वरा बि आदर रंड्रीमी थल्जी श्रींङी तोह।

¹¹ केहच़ी ला ध्यांए ञेंए च़रतेंई कि पापो वशारिंङ सिए दोतु ठ्रोह, पर परमेश्वरा बि आदर रंड्रीमी थल्जी श्रींङी तोतोंई।

¹² झांह लेह पापमय हिटी केनातु जीवनारिंङ राज लेह थारोंऊ, केहच़ी केनातु पापमय हिटी ऊ हिसाबे कम थालंही।

¹³ दंङ माह ए फुको अंङा रे मदम हिटी थल्जी इस्तेमाल लंहि, पर केनातिंङ सिऊ दोरच़ी श्रींङे ञेंए केनातु जीवन परमेश्वराबि रें च़रतुंई, दंङ केनातु फुको अंङर सही कम लहज़िमी थल्जी परमेश्वरो हवाले लेह च़रतुंई।

¹⁴ दंङ केहतु टोईच़ी पापो वश माह शोतो, छना कुचे केरे मुसाओ कानूनो अधीन माह तोंहि पर परमेश्वरो मोह्ड़े दाह ओ अधीन ए श्रींङमातंई।

धर्मिकताओ दास

¹⁵ दंङ, छि हेनर ध्यांए लगातार पाप लोहवा लांईया, कि हेनर कानूनो अधीन माह पर मोह्ड़े दाह ओ अधीन तोतोंई? माह! बिल्कुल ला माह!

¹⁶ केहच़ी ञेंच़ातंई कि अपेहल केरे केनातिंङ अतुआ परगर शुहबिमी थल्जी रें चरच़ातेंई दंङ दू मीह केहतु मालिक शुहचे यवात दंङ केतिंङ दू लेह लेह्पोतो अंऊ दोई क्वात, केरे पापो परगर शुहबी तरपोंई अंऊ सिमी हखा रैंज़ा शिलज़ा, या केरे परमेश्वरो हुकमो चुनाव लेह तरपोंई, अंऊ धर्मिक जीवनो हखा रैंज़ा शिलज़ा।

¹⁷ केरे पापो गुलाम तोईनी, पर हेंतेग केहच़ी दुह शिक्षा ओ भाषे लहज़ातंई, अंऊ केतिंङ खोकसिरी। झांह लेह गेह परमेश्वरो धन्यवाद लहज़ातग।

¹⁸ परमेश्वरे केरे पापो वशो दोरच़ी छुड़ाके च़रति झांह लेह केरे परमेश्वरो दास शुहचे इलि ताकि केहच़ी दुह ए लंहि अंऊ सही तोह।

¹⁹ गेह इच्च़ा साधारण उदाहरण रंड्रा केतिंङ कंड्रातग। कि केहच़ी मीहच़ी छना ठ्रोह तुहई केनातु फुक अधर्मो अधीन लेह चरच़ातेंई, दंङ दू झखंजी शुहचे इलज़ा, ध्वांए हेंतेग केरे केनातु फुक धर्मिकता ओ अधीन लेह च़रतेंई, दंङ दू पवित्र शुहचे योतो।

²⁰ अपेहल केरे पापो गुलाम तोईनी, दंङ केहतु अंदरेग धर्मो कम लहज़िमी छल्ले हिटी माह तोहई।

²¹ दंङ केनातु भत्ते जीवनो दोरच़ी केतिंङ छि फायदा शुई? केरे दोऊ वहज़ा ज़ि सिर्फ शर्मिन्दा शवातंई। छना कुचे दू कमो नतीज़ा मौत तोह।

²² दंङ एंतेग पापो दोरच़ी आज़ाद शुहचे परमेश्वरो दास शुहचे केरे दू कम लहज़ातंई अंऊ पवित्रता ओ हखा रैंज़ा शिलज़ा, दंङ दोऊ अंत अनंत जीवन तोह।

²³ छना कुचे पापो नतीज़ा ता मौत तोह, पर अंऊ वरदान परमेश्वर हेंदिंङ रंड्रा, दू ता अनंत जीवन तोह अंऊ हेंदु प्रभु मसीह यीशुरिंङ खोकसा।