रोमियो 4 - लाहौली बाइबिल

अब्राहमो विशवासो दोरच़ी धर्मी ठहरासी

¹ हेंतेग हेनर यहुदी शुहबी रंङ साते हेनर हेंदु पूर्वज अब्राहमो पाहठी छि कुंई? छना ठ्रोह दू धर्मी शुहचे इलि।

² छना कुचे अगर अब्राहम रूठे कमो दोरच़ी धर्मी शुचंङ, दंङ दोऊ घमण्ड लहज़िमी वहज़ा शुंईयां, पर दुह एनोह रूठे कमो पाहठी परमेश्वरो तुईज़ी घमण्ड माह लंहीयां।

³ पवित्रशास्त्रारिंङ छि च़ेहसी तोह? “कि अब्राहमे परमेश्वरो दोरच़ी कुहषी गप्पो टोईच़ी विशवास लहरी दिऊ वहज़ा ज़ि दुह परमेश्वरो नज़रारिंङ धर्मी शुहचे इलि।”

⁴ कम लहज़ा दोऊ मज़दूरी रंड्री दान माह शुह, पर हक समझेक्तेंई।

⁵ पर अंऊ परमेश्वर रंङ साते जोगे ठहरासिमी थल्जी कम माह लहज़ा पर अंऊ पापी मीहतिंङ धर्मी बणाषा परमेश्वरो टोईच़ी विशवास लहज़ा, दोऊ विशवास दोऊ थल्जी धर्मिकता शोतो।

⁶ ध्यांए ठ्रोह, रज्ज़ा दाऊदे च़ेहसी ततो, कि अंऊ मीहबी परमेश्वरे कम मेह धर्मी ठहरासा, दोबि आशीष ला रंड्रा।

⁷ “धन्य शुरे दोरे अतु अधर्म माफ शुई, दंङ अतु पाप माफ शुहचे इलिर,

⁸ धन्य शुह दुह मीह अतु पापो लेखा परमेश्वर माह लेहप्तो।”

⁹ दंङ दि धन्य बचन, छि खतना लहसी यहुदी तु थल्जी ए शुह, या खतना मेह ऊईजाति तु थल्जी ला शुह? ञेंहच़ी दुह ए कुट्रातंई अंऊ पवित्र शास्त्र कुट्रा, “कि अब्राहमे परमेश्वरो दोरच़ी कुहषी गप्पो टोईच़ी विशवास लहरी दिऊ वहज़ा ज़ि दू परमेश्वरो नज़रारिंङ धर्मी शुहचे इलि।”

¹⁰ दंङ अब्राहम अपेहल धर्मी ठहरेसिरी? छि अपेहल दोऊ खतना शुह्ते? खतना ओ हालातरिंङ माह पर खतना मेह ए परमेश्वरे दोबि धर्मी ठहराएकाते।

¹¹ परमेश्वरे अब्राहमा बि तुहई ए स्वीकार लेह चरच़ाते दंङ दोबि धर्मी घोषित लेह च़रति, हालांकि हेंतेग तचेक दोऊ खतना शुहसी माह तोहई। खतना ओ चिन्ह स्वीकार लहज़िमी मोहर शुह। झांह लेह, दुह, दुह मीहतु आत्मिक बाह बणेंके तोह, अच़ि विशवास लहज़ा तोर, पर दोतु खतना शुहचे माह दोरे एनोह विशवासो दोरच़ी धर्मी शुहचे इलोर।

¹² दंङ अब्राहम दुह खतना लहसी दोतु ला बाह बणेंके इलि, अंऊ माह सिर्फ खतना लहसी तु टोहकठे निर्भर बंङज़ातोर, पर अतु कछंङ ध्वांए ठ्रोह विशवास तोह, छना हेंदु पूर्वज अब्राहमो विशवास तोहई, अंऊ दोई एनोह खतना बे तुहई कंङाते।

विशवासो दोरच़ी प्रतिज्ञा खोकसी

¹³ परमेश्वरे अब्राहम ए दोऊ खानदान रंङ साते वाईदा लहसी ततो कि दोई दोतिंङ दि संसारो वारिस बणाएकपोतो। दि वाईदा दिऊ थल्जी लहसी माह तोहई कि अब्राहमे कानूनो भाषे लाहते, पर परमेश्वरे दोबि दोऊ विशवासो दोरच़ी धर्मी बणाके च़रति।

¹⁴ छना कुचे अब्राहम ए दोऊ खानदान बि दि वाईदा दिऊ थल्जी रांहषी तते कि दोच़ी कानूनो भाषे लहज़ातेर दंङ विशवास शुहके ए वाईदा बेअसर साबित शुहचे इलि।

¹⁵ परमेश्वरे दोऊ टोहकठे रोहषेक्च़ी, अंऊ मुसाओ कानून बि पूरी तरह माह मनेक्च़ातेर। दंङ छा कानून तोह ए माह ता दोऊ छल्ले उल्लंघन ला माह।

¹⁶ झांह लेह मीहच़ी विशवासो दोरच़ी परमेश्वरो वाईदा खोक्तिर। दि दिऊ थल्जी शुहबी ताकि मोह्ड़े दाह दोरच़ी खोकसोतो। दंङ अब्राहमो भत्ते कटुतिंङ दुह वाईदा खोकसोतो। दि सिर्फ दोतु थल्जी मशत पर अंऊ मुसाओ कानूनो अधीन बंङज़ातोर, पर हर इच्च़ा दुह मीहू थल्जी तोह, अंऊ अब्राहमो ठ्रोह विशवासरिंङ श्रींङी बंङज़ा, अंऊ हेंदु भत्ते तु पूर्वज शुह।

¹⁷ छना पवित्र शास्त्रारिंङ च़ेहसी तोह, कि “गेह कनिंङ महसे जातितु पूर्वज ठहरापोग” परमेश्वरो नज़रारिंङ अब्राहम हेंदु पूर्वज शुह दोई दू परमेश्वरो टोहकठे विशवास लहरी, अंऊ सि दोतिंङ श्रींङमी लहज़ा दंङ अंऊ गप्पा तोह ए माह, दोऊ मिन झांह लेहपच़ा, कि दुह तोह।

^18-19 परमेश्वरे अब्राहमो हखा कुई कि दोऊ महस खानदान शोतो, पर अब्राहमे खंई कि कटुरे जेह्कपिमी थल्जी दू महस यांङदे तोहई, छना कुचे दू लगभग राह सालो शुहचे इलजी तोहई। सारा ला हेंतेग कटुरे जेह्कपिमी जोगे माह तोहई। पर अब्राहमे ञेंहच़ाते कि दोतु फुक सिऊ हालाता रिंङ तोहई, दुह महस मीहतु बाह बणेंकी माहरपोतो, तांला दू एनोह विशवास रिंङ कमज़ोर माह शुई। दू विशवास लहज़ी लेहती दंङ दोऊ उम्मीद योहसिरी ए माह।

²⁰ दंङ माह अविशवासी शुहचे ते परमेश्वरो वाईदा टोईच़ी शक लहरी, पर विशवासरिंङ पक्‍का शुहचे परमेश्वरो महिमा लहरी,

²¹ दोतिंङ पक्‍का पता तोहई कि परमेश्वरे अंऊ गप्पो वाईदा लाहते, दू दोबि पूरा लहज़िमी थल्जी सामर्थी तोह।

²² दोऊ विशवास लहज़िमी रंङ साते, “दू परमेश्वरो नज़रारिंङ धर्मी ठहरेसा इलि।”

²³ दंङ दि बचन, “कि विशवासो दोरच़ी दू परमेश्वरो नज़रारिंङ धर्मी ठहरेसा इलि।” माह सिर्फ दोऊ थल्जी ए च़ेहसी तोहई,

²⁴ पर हेंदु थल्जी ला तोह अगर हेनर परमेश्वरो टोहकठे विशवास लोंहि, अच़ि हेंदु प्रभु यीशु बि सिऊ दोतु बिचंङ ज़ि श्रींङमी लहरी, दंङ हेनर ला विशवासो दोरच़ी धर्मी शुहचे योंई।

²⁵ यीशु हेंदु अपराधो थल्जी सिए इलि, दंङ परमेश्वरे हेंदिंङ धर्मी बणाएट्रिमी थल्जी दोबि यह्च़ा श्रींङमी लहरी।