रोमियो 2 - लाहौली बाइबिल

परमेश्वरो न्याय

¹ झांह लेह, हे ऊईतु टोहकठे दोष लगाएच़ा! केरे चाहे अरिला छारिंङ माह शोंई, बहाना लेह मरपोंई। अंऊ गप्पा रिंङ केरे ऊईतिंङ दोष लगाएच़ातंई, दुह ए गप्पारिंङ केनातिंङ ला दोषी ठहराएच़ातंई। छना कुचे केरे, अंऊ ऊईतु टोहकठे दोष लगाएच़ातंई, केनाह ए दुह कम लहज़ातन।

² दंङ ञेंहच़ी ञेंहच़ातंई कि परमेश्वर सही न्याय लहज़ा शुह। झांह लेह दोई झांह ठ्रोह मदम कम लहज़ा मीहतिंङ ज़रूर सज़ा रमतो।

³ दंङ कांह अंऊ झांह ठ्रोह कम लहज़ा मीहतु टोहकठे दोष लगाएच़ातन, दंङ केनाह दुह कम लहज़ातन; छि दि समझेक्सतना कि कांह परमेश्वरो सज़ा ओ दोरच़ी बचेकी योन?

⁴ छि कांह परमेश्वरो भलाई ए सहनशीलता, दंङ सब्ररूपी धन बि बेकार ञेंच़ातन? दंङ केई दि माह समझेक्च़ातन कि परमेश्वरो भलाई कनिंङ पश्चाताप काराच़ि सिखाएच़ा?

⁵ पर केरे ज़िद्दी तोतोंई दंङ झांह लेह केरे पश्चाताप लहज़िमी रंङ साते इंकार लहज़ातंई, झांह लेह परमेश्वर केतिंङ महस खरे सज़ा रमतो। छना कुचे दुह ध्याड़ा अपि लेहकी तोह, अपेहल परमेश्वरे एनोह रोहष कमबोतो दंङ एनोह सच्चा न्याय प्रगट लोहतो।

⁶ परमेश्वर हर इच्च़ा बि दोऊ कमो हिसाबे बदला रमतो।

⁷ अंऊ मीहरे ड्काह बंङज़ा ते भलाई लहज़ा ते महिमा ए आदरो, अपेहल ला माह योह्सा जीवनो खोजारिंङ लेहकी बंङज़ातोर, परमेश्वर दोतिंङ अनंत जीवन रमतो;

⁸ पर अंऊ मतलबी तोतोर ए सच्चाई माह मनेक्च़ातोर, पर मदम लहज़ी जुन्ज़ातोर, परमेश्वर दोतु टोईच़ी एनोह रोहष प्रगट लोहतो।

⁹ मदम कम लहज़ा हर इच्च़ा मीहबी दुख ए मुसीबत सहन लहज़ी लेह्पोतो, चाहे दुह अरिला छारिंङ माह शोतो, तुहई यहुदी मीहरे दंङ दोऊ थले दोरे अंऊ ऊई जाति तोतोर।

¹⁰ पर भलाई लहज़ा हर इच्च़ा मीहबी महिमा, आदर ए शक्ति खोकसोतो, भत्ते बे तुहई यहुदी मीहतिंङ खोकसोतो दंङ दोऊ थल दोतु अंऊ यहुदी माह तोर।

¹¹ छना कुचे परमेश्वरे भत्ते तंङ साते इच्च़ा ठ्रोह व्यवहार लहज़ा।

¹² झांह लेह अच़ि मुसाओ कानून ञेंए मेह पाप लहरिर, दोरे मुसाओ कानून ञेंई मेह ए परमेश्वरो दोरच़ी सज़ा खोकपोरे, पर यहुदी ज़ि, अतु कछंङ मुसाओ कानून तोह ञेंए पाप लोहर ता, दोतु फेंसला मुसाओ कानूनो हिसाबे ए शोतो।

¹³ छना कुचे परमेश्वरो नज़रारिंङ धर्मी दोरे माह शोर, अंऊ मुसाओ कानून रेड्रातोर पर धर्मी दोरे तोतोर, अंऊ मुसाओ कानूनो भाषे लहज़ातोर।

¹⁴ दंङ ऊईजाति मीहरे अतु कछंङ मुसाओ कानून माह, एनेह ए दोऊ हुकुमो भाषे लहज़ातोर, दंङ मुसाओ कानून दोतु कछंङ माह शुहबीरंङ साते दोरे दि साबित लहज़ातोर कि दोतु सेहमरिंङ कानून तोह।

¹⁵ दोच़ी दि कंड्रातोर कि परमेश्वरो दोरच़ी रांहषी मुसाओ कानून दोतु सेहमरिंङ च़ेहसी तोह, छना कुचे दोतु फर्क आत्माज़ि कंड्रा कि दि हेले शुह। दंङ दोतु विचार या ता दोतु टोहकठे दोष लगाएच़ातोर या दोतिंङ कंड्रातोर कि दोच़ी सही लहज़ी लेहकी तोतोर।

¹⁶ दि दुह ध्याड़ारिंङ शोतो अपेहल परमेश्वरो गिऊ दोरच़ी प्रचार लहसी रूठे खबरो हिसाबे यीशु मसीहू दोरच़ी मीहतु ब्याके गप्पो फेंसला लोहतो।

यहुदी ए कानून

¹⁷ दंङ केनातु पाहठी सोचेक्तेंई केरे केनातिंङ यहुदी कुट्रातंई; दंङ मुसाओ कानूनो टोहकठे निर्भर बंङज़ा घमंड लहज़ातंई कि केरे परमेश्वरो खास मीह शुई।

¹⁸ केतिंङ परमेश्वरो हिटी पता तोह, दंङ मुसाओ कानून ञेंई ते रूठे मदम सेहच़ी तरच़ातंई।

¹⁹ केतिंङ दि पक्‍का पता तोह, कि केरे झांह ठ्रोह मीह शुई, अंऊ काणे मीहतिंङ सही अम कंड्रातंई, दंङ हंञारारंङ बंङज़ा तु थल्जी छंङी शुई,

²⁰ बुद्धि मेह दोतिंङ सिखाएच़ा ए दंङ कटुतु उपदेशक शुनाह; छना कुचे केहतु कछंङ मूसा ओ कानून तोह। केहच़ी ञेंहच़ातंई कि केरे भत्ते धिर ञेंहच़ातंई दंङ छिल्ला केहच़ी कुट्रातंई दुह हेले शुह।

²¹ झांह लेह केरे, अंऊ ऊईतिंङ शिक्षा रंड्रातंई, केनातिंङ शिक्षा छिल्ले माह रंड्रातंई? केहच़ी प्रचार लहज़ातंई, “चोरी थालंही,” दंङ केनाच़ि चोरी लहज़ातंई?

²² केहच़ी कुट्रातंई, “कि कुकम थलांई,” दंङ केनाच़ि कुकम लहज़ातंई? केहच़ी मुर्ति रंङ साते नफरत लहज़ातंई दंङ केनाच़ि ए मंदिरा तिंङ लुटेकच़ातंई?

²³ केहतु कछंङ परमेश्वरो कानून शुहबिमी घमंड तोह, दंङ कानूनो भाषे माह लहज़ा ते परमेश्वरो अनादर लहज़ातंई?

²⁴ दंङ छना पवित्रशास्त्रारिंङ च़ेहसी तोह, “केरे यहुदी मीहतु वहज़ाज़ि, ऊईजाति ऊ मीहरे परमेश्वरो बुराई लहज़ातोर।”

²⁵ खतना लहज़िमी फायदा सिर्फ दुह ए मुक्का तोह अपेहल केहच़ी कानूनो मनेक्च़ातंई। पर अगर केरे कानूनो माह मनेक्च़ातंई, दंङ केरे खतना लहसी यहुदी मीहरे दुह मीहतु ठ्रोह ए तोतोंई अंऊ यहुदी माह तोतोर दंङ अतु खतना शुहचे माह।

²⁶ झांह लेह अगर अरिया खतना मेह मीह मुसाओ कानूनो हुकुमो भाषे लहज़ा, दंङ परमेश्वर झांह ठ्रोह मीहबी दुह मीहू ठ्रोह खंड्रा अतु खतना शुहचे तोह।

²⁷ अंऊ खतना लहज़ी मेह कानूनो भत्ते भाषे लहज़ा, दोई केहतु फेंसला लोहतो; छना कुचे केहतु कछंङ मुसाओ कानून तोह दंङ केरे खतना लहज़ी ला कानूनो भाषे माह लहज़ातंई।

²⁸ सच्चा यहुदी दुह माह शुह, अतु सिर्फ धकतेखी रूप यहूदीतु ठ्रोह तोह, दंङ माह ए सच्चा खतना दुह शुह, अंऊ धकतेखी रूपारिंङ सिर्फ फुकारिंङ ए लहज़ी।

²⁹ इच्च़ा सच्चा यहुदी दुह ए शुह अतु सेहम परमेश्वरा रंङ साते सही तोह। दंङ हेले खतना सिर्फ मुसाओ कानूनो भाषे लहज़ी मशत; पर, दि सेहम किरच़ी ला शुह, अंऊ पवित्र आत्माओ कमो दोरच़ी पैदा शुहवा। झांह ठ्रोह मीह, मीहतु दोरच़ी मशत, पर परमेश्वरो दोरच़ी षटणा खोकच़ा।