रोमियो 15 - लाहौली बाइबिल

ऊईतु तरक्की लंहि

¹ हेनर अंऊ विशवासा रिंङ पक्‍का तोतोंई ञेंहच़ातंई कि दिह गप्पो दोरच़ी छल्ले फर्क माह पड़ेक्पा, पर हेनर दोतिंङ सिर्फ हेंदिंङ खुश लहज़िमी थल्जी माह शुह। हेंदिंङ दुह मीहतिंङ शक ओ टोईच़ी विचार लेह जूंशी तोह अंऊ दि गप्पा तिंङ गलत ञेंहच़ातोर।

² हेंदु बिचंङज़ि हर इच्च़ा बि हेंदु साथी विशवासी ओ थल्जी कम लेह जूंशी तोह, अंऊ दोऊ थल्जी रूठे तोह दंङ दोबि खुश लोहतो ए दोबि विशवासा रिंङ पक्‍का लोहतो।

³ छना कुचे मसीह एनाबि खुश माह लहरी, पर छना पवित्रशास्त्रारिंङ च़ेहसी तोह, “कनु निंदा लहज़ा ज़ि गिऊ निंदा लाहतोर।”

⁴ अंयों गप्पा तुहई बेहच़ी पवित्रशास्त्रारिंङ च़ेहसी तोह, दू हेंदु ए शिक्षा ओ थल्जी च़ेहसी तोह, ताकि हेनर धीरज़ ए पवित्रशास्त्रो दोरच़ी छि याहब ओ दोरच़ी उम्मीद लोंहई, कि पवित्रशास्त्रे छि वाईदा लाहते, दू पूरा लोहतो।

⁵ गेह प्रार्थना लहज़ातग कि परमेश्वरे केतिंङ धीरज़ ए याहब रमतो ताकि केरे यीशु मसीह थले ज़ोजा ते केनातु बिचंङ एकता रंङ साते बंङज़ेंई।

⁶ ताकि केरे भत्तेर इच्च़ा साते बंङज़ा ए इच्च़ा सग रिंङ परमेश्वर, हेंदु प्रभु यीशु मसीहू बाह परमेश्वरो स्तुति लंहि।

इच्च़ा साते शुहचे परमेश्वरो महिमा

⁷ झांह लेह इदि-अईदि बि दि रूपारिंङ ग्रहण लंहि कि मीहरे परमेश्वरो स्तुति लोहर; दि कम झांह ठ्रोह लंहि छना मसीह ज़ि केरे ग्रहण लहसी ततो।

⁸ गेह कुट्रातग, कि अंऊ वाईदा बाह-मेमेतिंङ रांहषी तोहई, दू वाईदा तिंङ हेले लहज़िमी थल्जी, दंङ दि कंड्रिमी थल्जी कि परमेश्वर वफादार तोह, मसीह यहुदी मीहतु सेवक बणेंके इलि।

⁹ दंङ ऊई जाति ला परमेश्वरो दया ओ वहज़ा ज़ि परमेश्वरो स्तुति लंहि, छना पवित्रशास्त्र रिंङ च़ेहसी तोह, “झांह लेह गेह ऊईजाति तु तुईज़ी, कांह स्तुति लोहग, दंङ कांह मिन्दु भजन कोहग।”

¹⁰ दंङ, इच्च़ा ठाहरिरिंङ पवित्रशास्त्र रिंङ दि ला च़ेहसी तोह कि, “हे ऊईजाति ऊ, भत्ते मीहरे परमेश्वरो प्रजारंङ साते खुशी मनेक्तुंई।”

¹¹ दंङ पवित्रशास्त्र रिंङ दि ला च़ेहसी तोह “हे ऊईजाति ऊ, भत्ते मीहरे, प्रभु स्तुति लंहि; दंङ हे राज्य-राज्य भत्ते मीहरे दोऊ स्तुति लंहि।”

¹² दंङ यह्च़ा यशायाह भविष्यवक्ता ज़ि पवित्रशास्त्र रिंङ च़ेहसी ततो, यिशै ओ इच्च़ा जड़ प्रगट शोतो। दंङ ऊईजातितु हाकिम शुहबिमी थल्जी इच्च़ा अच़तो दोऊ टोईच़ी ऊईजाति उम्मीद लोहर। कि दोई दोतिंङ बचाएपोतो।

¹³ गेह प्रार्थना लहज़ातग कि परमेश्वर अंऊ उम्मीदो दाता तोह, केतिंङ विशवास लहज़िमी भत्ते पाहठी खुशी ए शांति रंङ साते पिंङे च़रपोतो, कि पवित्र आत्माओ सामर्थो दोरच़ी केहतु उम्मीद बणेंके योतो।

हिम्मतरंङ साते चेहसिमी वहज़ा

¹⁴ हे गिऊ प्यारे साथी विशवासी रे, गिह्बी पूरा विशवास तोह कि, केरे भलाई रंङ साते पिंङे तोंई दंङ केहच़ी दि रूठे रंङ ञेंच़ातंई कि केतिंङ छि लेह जूंशी तोह। दंङ इदि-अईदि बि सिखाएच़ा लोह।

¹⁵ तांला गेह रें चीज़ो पाहठी केतिंङ हिम्मत लहज़ी ते च़ेहसी लेहकी तोतोग कि केतिंङ गेह यह्च़ा हिद दिलाएपोग, दि, दू मोह्ड़े दाह ओ दोरच़ी शुई, अंऊ परमेश्वरे गिह्बी रांहषी ततो।

¹⁶ कि गेह ऊईजातितु मीहतु थल्जी इच्च़ा यहुदी पुरोहितो ठ्रोह परमेश्वरो दोरच़ी खोकसी रूठे खबरो सेवा लहज़ातग; अतिंङ ऊईजाति मीहरे पवित्र आत्माओ दोरच़ी शत्‌ह लहसी परमेश्वरो थल्जी ग्रहणो जोगे तग बणेंके योतो।

¹⁷ झांह लेह गेह यीशु मसीहू वहज़ा ज़ि परमेश्वरो सेवा ओ थल्जी गर्व लेह तरच़ातग।

¹⁸ छना कुचे मसीह गिऊ वहज़ा ज़ि छि लहसी ततो गिह्बी दि गप्पा कुट्रीमी हिम्मत तोह, कि गेह ऊईजाति तु मीहतिंङ परमेश्वरो कछंङ हपिमी काबिल तोतोग। अपेहल दोच़ी गिऊ सग थाषातेर दंङ गिऊ कम तंङातेर दंङ दोच़ी परमेश्वरो टोहकठे विशवास लहरिर।

¹⁹ पवित्र आत्माओ गिह्बी रांहषी सामर्थो दोरच़ी गेह अद्धभुत कम ए चमत्कार लहज़ातग झांह लेह अंऊर ला गेह यरूशलेम शहरो दोरच़ी इलिरिकुम प्रदेश तचेक अच़ा इलिग, गेह दोर भत्ते मीहतिंङ, यीशु मसीहू पाहठी रूठे खबर सुनाएतिग।

²⁰ पर गिऊ सेहमो हिटी दि तोह कि, अंऊर-अंऊर मसीहू रूठे खबर हेंतेग तचेक सुनाएची माह, दोर्तिंङ ए गेह रूठे खबर सुनाएपोग; झांह शुहबी मेस कि गेह दू कम जारी तोओग अंऊ अच़िया ऊईज़ि शुरूआत लहसी शुह। दू मीहू ठ्रोह माह बणेक्पोग, अंऊ ऊईतु मुयांदो टोहकठे घरबार बणाएशा।

²¹ पर छना पवित्रशास्त्र रिंङ च़ेहसी तोह, ध्वांए ए शोतो; “अंऊ दोतिंङ मसीहू पाहठी अपेहल ला कांहषी माह, दोरे खमोरे, दंङ अंऊ दोच़ी अपेहल ला दोऊ पाहठी रेड्री माह तोहर दोरे ला समझेक्पोर।”

पोलुसो रोम इबिमी योजना

²² दिए दू वहज़ा तोहई कि केतंङ साते दोईमी थल्जी गिऊ अपिमी रूकावट अपाते।

²³ पर हेंतेग दि ठहरि रिंङ गेह रूठे खबर सुनाएच़िमी कम पूरा लेह चरच़ातग, दंङ महस साल बेहच़ी गिह्बी केहतु कछंङ अपिमी हिटी तोह।

²⁴ झांह लेह अपेहल इसपानिया ओ हखा योग दंङ केहतु कछंङ ज़ि दोआ योग छना कुचे गिह्बी उम्मीद तोह कि, कि दू यात्रा रि केतंङ साते दोओग, दंङ अपेहल गेह केतंङ साते संगति रि खुश शुहचे योग, दंङ गेह जुंज़ातग कि केरे गिऊ स्पेन देशो सफरो थल्जी मदत लंहि।

²⁵ हेंतेग गेह परमेश्वरो मीहतिंङ भेंट रंड्रीमी थल्जी यरूशलेम शहरो हखा यवातग।

²⁶ छना कुचे मकिदुनिया ए अखाया प्रदेशो कलीसिया ओ मीहतिंङ दि रूठे चेहतिर, कि दोरे यरूशलेम शहरो मीहतिंङ अंऊ गरीब तोतोर, छा दान रमोर।

²⁷ दोच़ी दि खुशी रंङ साते लहरिर कि, पर दोरे यरूशलेम शहरारिंङ बंङज़ा मीहतु कर्ज़दार तोतोर, छना कुचे ऊईजाति ज़ि यरूशलेम शहरारिंङ बंङज़ा विशवासी तु दोरच़ी रूठे खबरो आत्मिक आशीष खोकतिर, झांह लेह दोतिंङ च़ेहसा, कि दिऊ बदला रिंङ दोरे कम से कम दोतु दान रंड्रा ते मदत लेह तरपोर।

²⁸ झांह लेह गेह तुहई यरूशलेम शहरो हखा यवातग ताकि दोतिंङ दि ठ्रोहका लहसी दान रें तरपोग, दोऊ थल, गेह यह्च़ा रोम देश अंज़े केतंङ साते दोआ स्पेन देशो हखा अच़ा योग।

²⁹ दंङ गेह ञेंच़ातग, कि अपेहल गेह केहतु कछंङ अपोग, दंङ दोऊ वहज़ा ज़ि मसीह भत्ते रीतिरंङ साते केतिंङ आशीष रमतो।

³⁰ हे गिऊ प्यारे साथी विशवासी रे, प्रभु यीशु मसीह रिंङ गेह हेंदु विशवासो दोरच़ी ए दंङ पवित्र आत्माज़ि छा दाह हेंदिंङ रांहषी ततो, दोऊ वहज़ा ज़ि, गेह केतंङ साते बिनती लहज़ातग, कि केहच़ी गिऊ थल्जी परमेश्वरा रंङ साते महसे ईमानदारी रंङ प्रार्थना लोहवा लंहि।

³¹ कि गेह यहुदिया तु इलाको विशवासी तंङ साते बचेकी बंङज़ोग, ताकि परमेश्वरो मीहरे अंऊ यरूशलेम शहरंङ तोतोर गिऊ पिहषी दानो दोरच़ी खुश शुहचे योर।

³² दंङ गेह परमेश्वरो हिटीरंङ साते केहतु खुशी रंङ साते अंज़े केतंङ साते आराम खोकपोग।

³³ गेह प्रार्थना लहज़ातग कि परमेश्वर, अंऊ शांति रंड्रा, केतंङ भत्ते तंङ साते बंङज़ोतो। अमीन।