रोमियो 14 - लाहौली बाइबिल

केनोह न्वाओ टोईच़ी दोष था लगाएतु

¹ अगर अरिया विशवासी न्वा विशवासा रिंङ कमज़ोर तोह, दंङ दोबि केनोह संगति रिंङ लेहपच़ी च़रतु, दोरंङ साते बहस थालंही कि दोबि छि लेह जूंशी तोह या छि लेह जूंशी माह।

² छना कुचे रें मीहतु विशवास तोह, कि भत्तेधिर ज़ै ठीक शुह, पर अंऊ विशवासरिंङ कमज़ोर तोह, दोई साग सब्जी ए ज़ोवा।

³ अच़ि षाह ज़ोवा, दोई षाह माह ज़जाड़ बि कवचि था चेहतु, दंङ षाह माह ज़जाड़ ला षाह ज़ेज़ाडो टोहकठे दोष था लागातु; छना कुचे परमेश्वरे दू झुल्लाकुतिंङ ग्रहण लहज़ा।

⁴ झांह लेह केतिंङ अतुआ ऊईतु परगरो न्याय लेह माह जूंस, दोई रूठे लोहतो या माह लोहतो दि दोऊ मालिको ज़िम्मेवारी शुह। दोई पक्‍का रूठे लोहतो; छना कुचे दोऊ प्रभु दोबि रूठे लहज़िमी सामर्थी तोह।

⁵ दू ए तरीका रंङ साते रेहच़ी ता इच्च़ा ध्याड़ा ऊई ध्याड़ा बे बढ़कर ञेंच़ातोर, दंङ रेहच़ी भत्ते ध्याड़ा इच्च़ा बराबर मनेक्च़ातेर; हर इच्च़ा बि विशवास शुहबी जूंस कि अंऊ दोई सोचेक्च़ा छि दू सही शुह आ?

⁶ रेहच़ी अंऊ ध्याड़ा मनेक्च़ातेर, दू प्रभु बि आदर रंड्रीमी थल्जी मनेक्च़ातेर। अंऊ धिर ज़ोवा, दू ला प्रभु थल्जी ज़ोवा, छना कुचे दू परमेश्वरो धन्यवाद लहज़ा, दंङ अंऊ षाह माह ज़ोवा, दू प्रभु थल्जी माह ज़ोवा दंङ परमेश्वरो धन्यवाद लहज़ा।

⁷ हेनर भत्तेर प्रभुऊ शुई। झांह लेह, हेंदु जीवना रिंङ ए हेंदु सिमी थल, हेंदिंङ दोबि खुश लेह जूंशी तोह हेंदिंङ माह।

⁸ छना कुचे अगर हेनर श्रींङे तोहई ता प्रभु थल्जी श्रींङे तोतोंई, दंङ अगर सिवातंई ता प्रभु थल्जी सिवातंई; दंङ हेनर श्रींङमोंई या सियोंई, हेनर प्रभुऊ ए शुई।

⁹ छना कुचे मसीह दिऊ थल्जी सिए इलि दंङ यह्च़ा श्रींङे लाह इलि कि दू सि ए श्रींङे झुल्लो प्रभु शोतो।

¹⁰ दंङ केरे छारिंङ केनातु साथी विशवासी ऊ टोहकठे दोष लगाएच़ातेंई? या छिल्ले कांह यह्च़ा केनोह साथी विशवासी बि कवचि चेहच़ातंई? हेंदु भत्ते तु फेंसला परमेश्वरो दोरच़ी शोतो।

¹¹ छना कुचे पवित्रशास्त्र रिंङ च़ेहसी तोह, “प्रभु ज़ि कुट्रा, गेह घेंङौ जीवनो कसम ज़ोवातग कि हर इच्च़ा मीह गिऊ तुईज़ी पुष्टू भारे बंङज़ोर दंङ हर इच्च़ा मीह परमेश्वरा बि स्वीकार लोहर।”

¹² दंङ यह्च़ा, हेंदु बिचंङ हर इच्च़ा एनोह-एनोह लेखा परमेश्वराबि रंड्री लेह्पोतो।

केनोह न्वाओ बरवादीऊ कारण थाबड़ेकतु

¹³ झांह लेह तुंखा हेनर इदि-अईदि ओ टोईच़ी दोष माह लगाएपोंई, पर केहच़ी दि ञेंई च़रतुंई कि अंऊ ला साथी विशवासी हेंदु वहज़ा ज़ि पापो जाला रिंङ फसके इबि माह जूंस।

¹⁴ गेह ञेंच़ातग कि, दंङ प्रभु यीशु दोरच़ी गिह्बी पूरा विशवास तोह, कि ज़ेइमी भत्ते चीज़ शुद्ध तोह, पर अंऊ अशुद्ध चेहच़ा।

¹⁵ अगर कांह साथी विशवासी कांह बगतो दोरच़ी दुखी शवाह दंङ काह दाहऊ रीतिरंङ साते माह कांह साथी विशवासी परमेश्वरो हुकुमो भाषे लहज़ी छोड़ेके च़रपोतो, दंङ दू बगत था ज़ोऊ छना कुचे मसीह दू साथी विशवासी ओ थल्जी ला सि शुह।

¹⁶ झांह लेह भले ए केहच़ी छिल्ला ला लोहवातंई दू रूठे तोह, पर अगर अच़िया दू मदम चेहपोतो, दंङ दोबि था लोह।

¹⁷ परमेश्वरो राजारिंङ ज़े तुंङमी ज़रूरी माह, पर ज़रूरी गप्पा दि तोह कि परमेश्वरा रंङ साते सही जीवन श्रींङमातंई, पवित्र आत्मारिंङ शांति ए दू खुशी शुहबी तोह।

¹⁸ अंऊ दि रीति रंङ साते मसीहू सेवा लहज़ा, दंङ परमेश्वराबि दोरंङ साते खुश शवाह, दंङ मीहरे ला दोऊ पाहठी रूठे कुट्रातोर।

¹⁹ झांह लेह हेनर दू गप्पातिंङ लहज़िमी कोशिश लोंहि अंऊ मीहतिंङ शांति रंङ साते ठ्रोहका शुहचे बंङज़िमी वहज़ा शवाह दंङ विशवास पक्‍का लहज़िमी थल्जी, इदि-अई दिऊ मदत लोहवा लंहि।

²⁰ अंऊ केहच़ी ज़ोवातंई दोऊ वहज़ा ज़ि परमेश्वरो कम था बिगाडेक्‍एतेंई; हिद तंही ज़ेइमी भत्ते चीज़ शुद्ध तोह, अगर अरिया मीह केहतु ज़ेईमी रंङ साते पाप रिंङ यवाह ता, दंङ दि गलत तोह।

²¹ रूठे ता दि तोह कि, केई माह ता षाह ज़ोऊ, दंङ माह ए दाखो रस तुंङु, दंङ माह ए छा झांह लोह, अंऊ दिरंङ कांह साथी विशवासी विशवासो दोरच़ी भटकेगी पाप रिंङ पड़ेकी योतो।

²² केरे दि गप्पो पाहठी छिल्ला मनेक्च़ातंई, दुह कांह ए परमेश्वरो बिचंङ कि गप्पा शुह। धन्य शुह दू। अंऊ दू गप्पारिंङ, अंऊ दोबि दू ठीक समझेक्च़ा, एनाबि दोषी माह ठहरासा।

²³ पर अगर केतिंङ दि गप्पो टोहकठे शक तोह कि हेंदिंङ छा ज़ै जूंशी तोह या माह, दंङ अगर केहच़ी तुंखा शुचि दि ज़ोवातंई ता केहच़ी पाप लोहवा तंई। छना कुचे केहच़ी केनातु विशवासो पालन माह लहज़ातंई। हेंज़ी छिल्ला ला लोहवा तंई, अगर दि प्रभु रिंङ विशवास रंङ साते माह ता दू हेंदु थल्जी पाप तोह।