रोमियो 13 - लाहौली बाइबिल

राज्यओ थल्जी कर्तव्य

¹ हर इच्च़ा मीह प्रधान अधिकारितु अधीन बंङज़ोरे; भत्ते अधिकार परमेश्वरो दोरच़ी तोह, दंङ अंऊ अधिकार तोतोर, दोरे परमेश्वरो दोरच़ी ए ठहरासी तोतोर।

² झांह लेह अच़ि दि अधिकारी तु विरोध लहज़ातोर, दोई परमेश्वरो रिति ओ विरोध लहज़ा, दंङ विरोध लहज़ा दोई सज़ा खोकपोतो।

³ अगर अच़िया रूठे कम लहज़ा, दंङ दोबि अधिकारी रंङ साते बैईमी ज़रूरत माह पर अगर दू मदम कम लहज़ा ता दोबि बैईमी ज़रूरत तोह। अगर अधिकारी रंङ साते निडर बंङज़ी जुन्ज़ातंई ता, रूठे कम लोहवा लंहि, दिरंङ दोई केहतु तरीफ लोहतो।

⁴ अधिकारी केहतु मदत लहज़िमी थल्जी परमेश्वरो सेवक शुह। पर अगर केई बुराई लोहन ता, दंङ दोतंङ बेऊ, छना कुचे दोतु कछंङ केतिंङ सज़ा रंड्रीमी थल्जी भत्ते अधिकार तोह, मदम कम लहज़ातिंङ परमेश्वरो सज़ा रंड्रीमी थल्जी दोरे परमेश्वरो सेवक शुरे।

⁵ केतिंङ दोतु अधीन बंङज़ी झांह सिर्फ सज़ाओ दोरच़ी बचेक्पिमी थल्जी मशत, पर दिऊ थल्जी ला कि केहतु अन्तरात्मा शुद्ध शुहबी जूंस।

⁶ झांह लेह केनातु अधिकारी तिंङ कर ला रम्मा लंहि, छना कुचे अधिकारी परमेश्वरो सेवक शुरे, दंङ दोरे एनोह ज़िम्मेवारी पूरा लहज़िमी थल्जी लेहकी बंङज़ातोर।

⁷ झांह लेह भत्ते तु थल्जी केनोह ज़िम्मेवारी पूरा लोह। अतिंङ कर रंड्री जूंशी तोह, दोबि कर रोंऊ। अतिंङ चुंगी रंड्री जूंस, दोबि चुंगी रोंऊ। भत्ते अधिकारी तिंङ पूरा रांई।

इदि अई दिऊ थल्जी कर्तव्य

⁸ केतिंङ भत्ते तिंङ सिर्फ इच्च़ा ए गप्पो कर्ज़दार शुहबी जूंस दंङ दू दि तोह कि केरे भत्तेर इदि-अई दिरंङ साते दाह लंहि; छना कुचे अंऊ ऊईतिंङ साते दाह लहज़ा, दोई कानून पूरी लाह।

⁹ छना कुचे मुसा ओ कानूना रिंङ महसे हुकुम तोह छना कि, “कुकम थालोहू, चोरी थालोहू, लालच थालोहू,” दंङ दि भत्ते छोड़ेके ऊई ला हुकुम ओ भत्ते निचोड़ दि हुकुम रिंङ खोकसा यवाह, “कि केनोह पड़ोसी रंङ साते केनोह बराबर दाह लोह।”

¹⁰ दाह पड़ोसीऊ छल्ले बुराई माह लहज़ा, झांह लेह अच़ि दाह लहज़ा, दोई कानून पूरा लहज़ा।

¹¹ हेंदु बिचंङ हर इच्च़ा बि इदि-अई दिरंङ साते दाह लेह जूंशी तोह छना कुचे दू टेम कछंङ तोह अपेहल परमेश्वर हेंदिंङ दि बुराई दोरच़ी छुड़ाके च़रपोतो। अपेहल हेनर मुण्डारिंङ मसीहू टोहकठे विशवास लाहतेंई, दू टेमो हिसाबे एंतेग मसीह हेंदिंङ बचाएच़िमी थल्जी वापिस अपिमी ध्याड़ा कछंङ तोह। दि ञेंई, केतिंङ ईमो दोरच़ी चेहके इबि जूंस दंङ खबरदार बंङज़ी जूंशी तोह।

¹² दि मदम संसारारिंङ बंङज़ी हेंदु टेम इच्च़ा रातो योह्सिमी ठ्रोह लगभग योह्सा अंज़े तोह, दंङ दुह ध्याड़ा ला कछंङ पिचे तोह अपेहल मसीह वापिस अपतो। झांह लेह हेंदिंङ हंयारा रंङ जुड़ेके कम बंद लेह च़रसी जूंशी तोह दंङ छंङी रंङ जुड़ेके हथियार कुरच़े जुंशी तोह।

¹³ अतंई हेनर हेंदु स्वाभाव ठीक लहज़िमी कोशिश लोहनि, दू मीहतु ठ्रोह अंऊ छंङीरिंङ बंङज़ातोर दंङ हंञारारिंङ माह हेनर मांजी कम ए नशाबाज़ी, कुकम ए भोगविलास, झगड़ा ए जलनो दोरच़ी शत्‌ह बंङज़ोंई।

¹⁴ पर प्रभु मसीह यीशु बि धारण लेह च़रतेंई, दंङ फुको हिटी पूरा लहज़िमी कोशिश थालंही।