रोमियो 11 - लाहौली बाइबिल

इस्राएलो टोईच़ी परमेश्वरो दाह

¹ झांह लेह गेह रूहक्च़ातग, छि परमेश्वरे एनोह प्रजा बि छोड़ेके चरच़तो आ? माह अपेहल ला माह! गेह ल ता इस्राएली शुगाह; अब्राहमो खानदान ए बिन्यामीनो खानदानो दोरच़ी शुगाह।

² परमेश्वरे एनोह दू प्रजाबि माह छोड़क्ति, अपि दोई तुहई बेहच़ी अंङषी तते, केहच़ी ञेंच़ातोंई कि पवित्रशास्त्र एलियाह भविष्यवक्ता ओ पाहठी छि कुट्रा, दू इस्राएलो मीहतु खिलाप परमेश्वर रंङ साते शिकायत लहज़ा।

³ दोई कुई, “हे प्रभु, दोच़ी कांह भविष्यवक्तार सच़ी च़रतिर, दंङ कांह बेदिर नाश लेह च़रतिर; दंङ गेह सिर्फ इच्च़ा ए मीह शुगाह अंऊ हेंतेग ला कांह थले जोज़ातग, दंङ दोरे गिह्बी ला सच़ी च़रच़िमी तातोर।”

⁴ पर परमेश्वरे एलिय्याह भविष्यवक्ता बि कुई, “गेह घेंङौ थल्जी निह्ज़ी हज़ार गंङमीतिंङ तहसी तातग अंऊ दोच़ी बाल मिंदंङ हप्सी सद्तु अराधना माह लहज़ातोर।”

⁵ ध्यांए रिति रंङ साते दि टेमारिंङ ला परमेश्वरो‍‍‍ दया ओ वहज़ा ज़ि, दि यहुदी तु इच्च़ा कवचि अरे हिस्सा शुह अंऊ परमेश्वरे एनोह सच्चे मीहतु रूपारिंङ अंङषी ततो।

⁶ परमेश्वरे दोतिंङ मोह्ड़े दाह दोरच़ी अंङषी ततो, दि रूठे कमो दोरच़ी माह शुह। अगर कमो वहज़ा ज़ि शुह ता, दंङ मोह्ड़े दाह यह्च़ा मोह्ड़े दाह माह केहषीरि।

⁷ दिऊ नतीज़ा छि शुई? दि कि इस्राएलो मीहरे अंऊ गप्पो खोजारिंङ तोईरे, दोबि पेट्री मरतिर; पर अंङषी मीहच़ी दू खोक्क्षे च़रतिर दंङ रें मीहतु सेहम डगडगी शुहचे इलि।

⁸ छना पवित्रशास्त्रारिंङ च़ेहसी तोह, “परमेश्वरे तोग ध्याड़ा तचेक बुद्धि बन्द लहसी तो, दोतु टिरा ता तोतोर पर दोतिंङ सच्चाई तंङफी माहथोस दंङ रेड्री ता तरच़ातोर पर समझेक्च़ातोर माह।”

⁹ दंङ रज्ज़ा दाऊदे कुट्रा, “दोतु बगत दोतु थल्जी जाल ए फंदा, दंङ ठोकर ए सज़ा ओ वहज़ा शुहचे योतो।

¹⁰ दोतु टीरार काणे शुहचे योर, ताकि दोरे खंड्री मरपोर, खंड्रारे, दंङ केई हमेशा दोतु ऊम कोंङा लेह केहू।”

¹¹ दंङ गेह रूहक्च़ातग, “छि यहुदी ठोकर लेहपी रंङ साते दहचे इलिर? माह! बिल्कुल ला माह! पर दोतु अविशवासो दोरच़ी ऊईजाति बि उद्धार खोकसिरी, दंङ इस्राएली मीहतिंङ जलन शोतो।

¹² झांह लेह अगर इस्राएलो मीहतु अविश्वास ऊईजाति तु मीहतु भलाई वहज़ा बणेक्पा, दंङ इस्राएलो मीहतु परमेश्वरो कछंङ यहच़िमी थल्जी ऊई जाति ओ दोतिंङ महस रूठे शुचि शोतो।”

ऊई जातितु उद्धार कलम लगाच़िमी उदाहरण

¹³ गेह केतंङ ऊईजातिंङ साते दि गप्पा कुट्रातग। अपेहल कि गेह ऊईजाति तु थल्जी प्रेरित शुगाह, दंङ गेह घेंङौ सेवकाई ओ टोहकठे घमण्ड लहज़ातग।

¹⁴ ताकि अंऊ रीतिरंङ साते गेह घेंङौ जातितु बिचंङ जलन पैदा लोहवा दोतु बिचंङ महसे तु उद्धार लोहग।

¹⁵ छना कुचे अपेहल इस्राएली मीहतु त्याग लहज़िमी रंङ साते संसारो मीहतु परमेश्वरारंङ साते मेल-मिलाप शुई, दंङ दोतु मसीह बि ग्रहण लहच़ी, इच्च़ा सि मीहू श्रींङे इबिमी बराबर शुहचे योतो।

¹⁶ गेह यहुदी तु पाहठी केतिंङ इच्च़ा उदाहरण रंड्रातग। दि ञेंरे यहुदी तु इच्च़ा रिवाज़ तोह, कि अपेहल ञेंरे रोटी बणाषी थल्जी फुकान ट्रुक्च़ातंई, दंङ ञेंरे परमेश्वर बि तग रंड्रीमी थल्जी तुब पिंङे फुकान लेहपच़ी। अगर दू इच्च़ा तुब परमेश्वरो शुह ता, दंङ दिऊ मतलब दि तोह कि भत्ते फुकान दोऊ ए शुह। ध्वांए अगर जड़ परमेश्वरो तोह ता, दंङ ब्रन्ज़ेर ला परमेश्वरो शुह।

¹⁷ इस्राएलो मीहरे इच्च़ा रूठे जैतूनो बुटो ब्रन्ज़ो ठ्रोह तोह दंङ पूर्वज अब्राहम, इसहाक ए याकूब दू बुटो जड़ो ठ्रोह तोतोर। ऊई जाति बंणो जैतूनो बुटो ब्रन्ज़ेर शुरे, अंऊ कलम लहज़ी दू ट्रिक्शी ब्रन्ज़ेतु ठाहरिरिंङ दू बूटारिंङ लगाके च़रति, हेंतेग दू ब्रन दू जड़ो खुराको हकदार तोह।

¹⁸ दंङ केरे केनातिंङ दू ट्रिक्शी ब्रन्ज़ बे मोह्ड़े था समझेक्तेंई। अगर केरे केनातिंङ दोबि ला बड़कर समझेक्च़ातंई, दंङ हिद तांहई कि केरे जड़ा बि माह सोटेक्च़ातंई, पर ज़ंङ केतंङ सोटेक्च़ा।

¹⁹ केरे केनातु सेहमरिंङ दि था सोचेक्तुंई कि परमेश्वरे यहुदी तिंङ दू ब्रन्ज़ेतु ठ्रोह स्वीकार माह लहरी अंऊ इच्च़ा बुटो दोरच़ी थाक्शे चरच़ि, ताकि दोरे ऊईजाति दि स्वीकार लेह तरपोर, अंऊ दू ब्रन्ज़ेतु ठ्रोह तोतोर अंऊ दोतिंङ कलम लहसी तोह।

²⁰ दि हेले शुह, दू ता अविशवासो वहज़ा ज़ि थक्शी केई, पर कांह विशवास रंङ बड़ेकी बंङज़ातोन दिऊ थल्जी घमण्डी शुह, पर बेह्द चेहतु।

²¹ छना कुचे अपेहल परमेश्वरे मुल ब्रन्ज़े तु टोहकठे दया माह लहरी, दंङ दू केहतु टोईच़ी ला दया माह लोहतो।

²² झांह लेह परमेश्वरो कृपा ए सख्ती ऊ टोईच़ी ध्यान रोंऊ! अंऊ दहचे इलिर, दोतु टोहकठे सख्ती, ए केहतु टोईच़ी दया, केरे दोऊ दया रिंङ बणेंके बंङज़ेंई, माह ता, ट्रिके ते शत्‌ह लेह च़रपोर।

²³ अगर इस्राएली मीहरे ला विशवास लेह शुरू लोहर ता दोतिंङ यह्च़ा वापिस बूटारिंङ कलम लगाके च़रपोर, छना कुचे परमेश्वरे दोतिंङ यच़ाह जोड़ेके तरपोतो।

²⁴ अंऊ ला बंणो ब्रन्ज़ो अंऊ ला रूठे बुटो हिस्सा बणेक्पि स्वाभाविक माह। दंङ अंऊ केरे यहुदी माह शुई इच्च़ा बंणो जैतूनो बुटो दोरच़ी ट्रिक्शी ब्रन्ज़ो ठ्रोह शुई, दंङ इच्च़ा रूठे जैतूनो बूटारिंङ शामिल शुहचे इलजी तोतोंई। पर दू यहुदी इच्च़ा डाढी ओ ठ्रोह तोतोर अंऊ इच्च़ा रूठे बूटारिंङ मोह्ड़े शुह्ते, दोतिंङ पक्‍का रूपारिंङ यह्च़ा एनोह बूटारिंङ तुप्चे च़रपोर।

परमेश्वरो स्तुति

²⁵ हे गिऊ प्यारे साथी विशवासी रे, गेह माह जुंज़ातग कि केरे दि भेदो दोरच़ी अंजान बंङज़ेंई झांह शुहबी मेस कि केरे केनातु टोहकठे घमण्ड लोंहि, दि हेले तोह कि इस्राएलो रें मीहरे विशवास लेह तेयार माह तोतोर, पर अपेहल परमेश्वरो टोहकठे विशवास लहज़ा ऊईजाति मीहतु गिनती पूरे शुहचे योतो, दंङ इस्राएलो मीहरे विशवास लोहर दंङ परमेश्वरो कछंङ वापिस अच़ा अपोर।

²⁶ दि शुहबी रंङ साते भत्ते इस्राएली मीहरे उद्धार खोकपोर; छना पवित्रशास्त्र रिंङ च़ेहसी तोह, “छुड़ाएच़ा दू यरूशलेम शहरो दोरच़ी अपतो, दंङ अभाक्ति बि याकूबो खानदानो दोरच़ी शत्‌ह लोहतो।”

²⁷ दंङ दोतंङ साते गिऊ दिए वाईदा शोतो, दोहपल कि गेह दोतु पाप माफ लेह च़रपोग।

²⁸ यहुदी मीहरे परमेश्वरो बैरी शुरे छना कुचे दोरे रूठे खबरो टोईच़ी विशवास लेह माह जुन्ज़ातोरे, दंङ दि केहतु थल्जी फायदा बणेंके इलज़ा। पर परमेश्वर दोतंङ साते दाह लहज़ा छना कुचे दोई दोतिंङ एनोह थल्जी अंङे चरच़तो। दि गप्पो दोई दोतु बाह-मेमेतंङ साते वाईदा लहसी तते।

²⁹ छना कुचे परमेश्वर एनोह वरदानो दोरच़ी, ए बुलाहटो दोरच़ी एनोह सेहम माह किरच़ा।

³⁰ छना कुचे केहच़ी तुहई परमेश्वरो हुकुम माह मनेक्तंई, पर हेंतेग इस्राएली मीहतु हुकुम माह मनेक्च़िमी रंङ साते केहतु टोईच़ी दया शुई।

³¹ ध्वांए दोच़ी ला हेंतेग ला हुकुम माह मनेक्तिर, कि केहतु टोईच़ी अंऊ दाह शवाह दिरंङ दोतु टोईच़ी ला दाह शोतो।

³² छना कुचे परमेश्वरे भत्ते तिंङ हुकुम माह मनेक्च़िमी अनुमति रंड्रा, ताकि दू भत्ते मीहतु टोईच़ी एनोह दाह कंङे तरपोतो।

³³ आह, परमेश्वरो मोह्ड़े दाह ओ टंगा ढबाह, बुद्धि ए ज्ञान छि घटे गंभीर तोह! अरिला दोऊ फेंसला ओ व्याख्या लेह मरपोतो; दंङ माह ए अरिया दोऊ अम समझेकी तरपोतो।

³⁴ प्रभु विचार अच़िला ञेंई मरपोर, दंङ माह ए अरिया दोतु सलाहकार बणेंके तरपोतो,

³⁵ दंङ अच़िया परमेश्वरा बि अपेहल ला छिल्ल ला रें मारतिर, अंऊ दोई बदला रिंङ छा खोक्च़िमी दावा लेह तरपोतो।

³⁶ छना कुचे भत्ते धिर परमेश्वरो दोरच़ी ए अपत, दोई भत्ते धिर बणाषी शुह, दंङ भत्ते धिर दोऊ ए शुह। दोऊ महिमा युगानुयुग शुहवा लोहतो। अमीन।