प्रकाशित वाक्य 9 - लाहौली बाइबिल

पांचवीं तुरही

¹ अपेहल पांचवां स्वर्गदूते तुरही रिंङ फुह लहरी, दंङ गेह स्वर्गो दोरच़ी धरती रिंङ इच्च़ा कर दह्पी तंङरिगा, दंङ दि कर बि दुह कुंजी रें च़रति अंऊ दुह अधोलोक (गड्डा) बि युप्शे तरपोतो अतु गहराई ओ छल्ले अंत माह।

² दोई दुह अधोलोक (गड्डा) युप्ति, दंङ दुह गड्डा ओ दोरच़ी मोह्ड़े भट्टी ठ्रोह टूह हुंच़िरी, दंङ दुह गड्डा ओ टूह रंङ साते ऐके ए लन्न हंयार शुहचे इलि।

³ दुह टूह बिचंङ ज़ि धरतीऊ टोईच़ी टीटरे हुंच़िरी, दंङ दोतिंङ बिच्छु तु ठ्रोह डंक रंड्रीमी शक्ति रें च़रति।

^4-5 छना अतिंङ आ बिच्छु डंक रंङ साते टेहषी शवाह, ध्वांए दि टिटातिंङ ङा लाह तचेक दुह मीहतिंङ नुकसान लहज़िमी हुकुम रें च़रति, अतु फ्याह ओ टोईच़ी परमेश्वरो मोहर निशान माह तोहई। पर दोतंङ साते कुहषी तोहई दोतिंङ माह ता धरतीऊ श्रांङ, माह ए अंऊ आ ब्रनज़ेर, दंङ माह ए अंऊ आ बुटा बि नुकसान लहज़ी तोहई।

⁶ दुह ङा लाह रिंङ मीहरे सिमी तरीका पेट्रोर, पर दोरे सिए मरपोर। दोरे सिमी हिटी लोहर, पर दोतिंङ सिमी छल्ले तरीका माह खोकसोतो।

⁷ दि टिटर रहंङों ठ्रोह तंङफातेर, अंऊ लड़ाई रिंङ इबिमी थल्जी तेयार तोह। दोच़ी एनोह पुंज़ा छाह लेहसी तरेर अंऊ ज़ङों मुकुटो ठ्रोह तंङफाते। दोतु आह मीहतु आहो ठ्रोह तोहई।

⁸ दोतु क्रा मेच़िमी तु क्राओ ठ्रोह लम्हें तोहई। दंङ दोतु छ्वाह ब्राघो छवाहो ठ्रोह पक्‍का तोईरे।

⁹ एनोह काह् रिंङ दोच़ी निह्लामो बणेषी इच्च़ा कवच़ लेहसी तरेर। अपेहल दोरे फंज़ातेर, दंङ दोरे झांह ठ्रोह सग लहज़ातेर छना महसे रहंङ लड़ाई रिंङ इलज़ा रथ बि शोकिह शिलज़ा मुक्का लहज़ातोर।

¹⁰ दोतु मेकुटू बिच्छु ठ्रोह तोहई, दंङ दोतु मेकुटू रिंङ डंक तोहई, दंङ दोतिंङ ङा लाह तचेक मीहतिंङ दुख पिपि लहच़िमी अंऊ शक्ति खोकसा तोहई, दुह शक्ति दोतु मेकुटू रिंङ तोहई।

¹¹ इच्च़ा रज्ज़ा तोहई अंऊ दोतिंङ वशारिंङ लहज़ा। दुह ए दूत शेतानो दूत तोह अच़ि अधोलोको युप्शाते इब्रानी भाषा रिंङ दोऊ मिन अबद्धोन तोह, दंङ युनानी भाषा रिंङ, अपुल्लयोन तोह, अतु मतलब तोह, अंऊ दोई नाश लहज़ा।

¹² ङा लाहो थल दि मुसीबत योह्सा योतो। पर दोऊ थल ला यह्च़ा झुह्ट मुसीबत अपतो।

छठवीं तुरही

¹³ दिऊ थल, छठवें स्वर्गदूते एनोह तुरहीरिङ फुह लहरी। अपेहल दोई दिबी फुह लहरी दंङ गेह परमेश्वरो तुईज़ी धूप जलाच़िमी ज़ङों वेदी ओ पिला कुंणी ऊ इच्च़ा सग रेड्रीगा,

¹⁴ दंङ सग ए छठवें स्वर्गदूतारंङ साते कुई, अच़ि तुरही च़ुमसी तहरे, “हेंतेग दुह पि मांजी शेतानी दूतारे युप्शे च़रतु अंऊ फरात मिंदंङ मोह्ड़े बेंडी रिंङ छ़ुह्च़ी तोतोर।”

¹⁵ झांह लेह दोहथर दोरे पिला शेतानो दूतार युप्शी च़रतिर। दोरे तुहई बेहच़ी तेयार तोईरे दंङ दोतिंङ कुहषी तोहई कि दि मुक्का, दि ध्याड़ा, दि लाहरिंङ दि सालो थल्जी रुमज़ा तोईनी दंङ हेंतेग दुह टेम पिच़ि इलज़ा। दोतिंङ संसारो इच्च़ा हिस्सा ओ मीहरे सच़ी केट्रिमी तोईरे।

¹⁶ दोतु फोज़ो सवारो गिनती निह्ज करोड़ तोहई; गेह दोतु गिनती रेड्रीगा।

¹⁷ दुह रहंङ ए दोतु सवार अंऊ दोतिंङ गेह दर्शन रिंङ खंईगा, दोरे झांह ठ्रोह तंङफातेर: दोतु काह्ओ रखवाली लहज़ा कवच शुहई ओ बराबर षेह्ई, महस तिंङीं ए गन्धको ठ्रोह लेहई तोहई। रंङों पुंज़ा ब्राघो पुंज़ो बराबर षेह्ई तोईरे, दोतु आहच़ि मेह, टूह ए गन्धक हुंच़ा ते।

¹⁸ दि षुमु ला मुसीबता ज़ि, अंऊ कि रहंङों आहच़ि हुंच़ा मेह, टूह ए गन्धक तोहई, भत्ते मीहतु बिचंङ इच्च़ा तिहाई बि सच़ी च़रति।

¹⁹ दुह रहंङ तु मेकुटू टोईच़ी, ट्रिकट्रा ओमड्रो पुंज़ो ठ्रोह चीज़ तोहई। दोच़ी एनोह पुंज़ा मीहतिंङ दुख रंड्रातेर। दंङ दुह रहंङ ज़ि एनोह पुंज़ा ए मेकुटू रें मीहतिंङ दुख रेंईर दंङ सच़ी च़रतिर।

^20-21 पर ऊई मीहरे अंऊ दुह मुसीबत बे तुहई सच़ी माहतिर, दोच़ी हेंतेग ला एनोह मदम कमो दोरच़ी पश्चाताप माह लहरिर। दोच़ी हत्या लहज़ी, जादू टोना, कुकम ए चोरी लहज़िमी दोरच़ी पश्चाताप माह लहरिर। दोच़ी मांजी आत्माओ ए एनोह गुह्ट्र बणाएषी दोऊ पूजा लहज़ी माह छोड़ेक्तिर, छना कि ज़ंङ या मुल या रह्घ या सिङों बणाषी मुर्ति। दोरे मुर्ति, माह दोरे खंड्रातोर, माह रेड्रातोर, दंङ माह ए जोज़ातोर।