प्रकाशित वाक्य 8 - लाहौली बाइबिल

निह्ज़ी मुहर तुरही ए ज़ङों धूपदान

¹ अपेहल कुरच़े निह्ज़ी मुहर युप्ति, दंङ दोरे भत्तेर अंऊर स्वर्गारिंङ तोईरे आधा घंटा ओ थल्जी शांत शुहचे इलिर।

² दंङ गेह दुह निह्ज़ी स्वर्गदूता तिंङ दोहथर निह्जो स्वर्गदूतार परमेश्वरो तुईज़ी खड़े बंङज़ातोर, खंईरे, दंङ दोतिंङ षुमु तुरही रें च़रतिर।

³ दोरच़ी, अई इच्च़ा स्वर्गदूत अति दंङ वेदी ऊ कछंङ खड़े शुहचे इलि। दुह स्वर्गदूते धूप जलाच़िमी थल्जी ज़ङों कोली कुरच़ा दंङ दोबि परमेश्वरो भत्ते पवित्र मीहतु प्रार्थना रंङ साते जलाएच़िमी थल्जी महसे धूप रें च़रति। दोई धूप ए प्रार्थना बि दुह ज़ङों वेदी ओ टोईच़ी फरच़े च़रति, अंऊ परमेश्वरो सिंहासनो तुईज़ी तोहई।

⁴ दुह धूपो टूह पवित्र मीहतु प्रार्थना रंङ साते ठ्रोका शुहचे दुह वेदीऊ टोईच़ी अंऊर स्वर्गदूता ज़ि दोबि केहषी तरेर, परमेश्वरो कछंङ खेका हुंच़िरी।

⁵ दोहथर स्वर्गदूते धूप कुरच़ा ते दोहरिंङ वेदीऊ टोईच़ी मेह पिंङी च़रतिर, दंङ धरतीऊ टोईच़ी केहच़ी केई, दंङ गर्जन ओ सग ए बिजली ए भुयंल शुहबी लेहती।

निह्ज रंणशिंङ

⁶ दोहपल दुह निह्ज स्वर्गदूत अंऊ दोतु कछंङ तुरही तोहई, फुह लहज़िमी थल्जी तेयार शुहचे इलिर।

⁷ मुण्डो स्वर्गदूते तुरही फुह लहरी, दंङ ध्वांए शुहई रंङ साते च्वसी मुघ ए मेह धरतीऊ टोईच़ी केहच़ी च़रति। झांह लेह धरतीऊ इच्च़ा तिहाई हिस्सा रोह्षा इलि, दंङ इच्च़ा तिहाई बुटर रोह्षा इलिर, दंङ भत्ते तिंङीं श्रांङ ला रोह्षा इलि।

⁸ दूसरा स्वर्गदूते तुरहीबि फुह लहरी, दंङ इच्च़ा मेहू ठ्रोह मोह्ड़े गोह समुंद्रारिंङ केहच़ी केहरी; झांह लेह समुंद्रो इच्च़ा तिहाई हिस्सा शुई शुहचे इलि,

⁹ दंङ समुन्द्रङ बंङज़ा इच्च़ा हिस्सा प्राणी सि इलिर, दंङ दि समुंद्रो इच्च़ा तिहाई हिस्सा जहाज़ ला नष्ट लेह च़रति।

¹⁰ तीसरा स्वर्गदूते तीसरी तुरहीबि फुह लहरी, दंङ मशालो बराबर मेह हुंच़ाते इच्च़ा मोह्ड़े कर, स्वर्गंङ ज़ि दहचे इलि, झांह लेह बेंडी तु इच्च़ा तिहाई हिस्सा ओ टोईच़ी ए दंङ तिऊ सोतो टोईच़ी दहचे इलि।

¹¹ अतु वहज़ा ज़ि तिऊ दुह हिस्सा कड़के ए विष जड़े शुहचे इलि। दंङ दि ती तुंङज़ाड़ महसे सिए इलिरे। दंङ दुह कर दू मिन “कड़के” केहच़ी च़रतिर।

¹² चौथा स्वर्गदूते तुरहीबि फुह लहरी, दंङ ऐकेऊ इच्च़ा तिहाई हिस्सा, दंङ लच़ंङो इच्च़ा तिहाई, दंङ करज़े तु इच्च़ा तिहाई हिस्सा ओ टोईच़ी मुसीबत अति, दंङ नाश शुहचे इलि, अतु वहज़ा ज़ि निरो इच्च़ा तिहाई हिस्सा हंयार शुहचे इलि दंङ लचंङ ए कर रातो इच्च़ा तिहाई टेम ला चमकेपी माह।

¹³ अपेहल गेह यह्च़ा खंईगा, दंङ गेह इच्च़ा उकाब बि सर्गा रिंङ फंज़ि ए जोरे सग रंङ साते दि कुट्री रेड्रीगा, “दुह मदम मीहतु टोईच़ी मुसीबत अपतो अंऊ धरतीऊ टोईच़ी बंङज़ातोर, छना कुचे अपेहल थल मुक्को षुमु ला स्वर्गदूत एनोह तुरही रिंङ फुह लोहर, दोहपल षुम मुसीबत ऊई शोतो अंऊ दोतिंङ सच़ी च़रपोतो। धरतीऊ टोईच़ी बंङज़ा दोतु टोईच़ी, हाय, हाय, हाय!”