प्रकाशित वाक्य 7 - लाहौली बाइबिल

इस्राइलो इच्चा लाख निंज़ो पि हजार मीहरे (1, 44,000)

^1-2 दोऊ थल, गेह पि स्वर्गदूता तिंङ संसारो पिला हासी कुंणी रिंङ खड़े तंङरिगा। दुह स्वर्गदूता तिंङ संसारा बि दुख रंड्रीमी थल्जी परमेश्वरो दोरच़ी अधिकार रांहषी तोहई, चाहे दुह समुंद्रंङ शुह या धरती ऊ टोईच़ी। दोच़ी संसारो पिला कुंणी ऊ दोरच़ी लहन रोक्केच़ा तोईरे, ताकि समुंद्रो अंदरेग शुह या धरतीऊ टोईच़ी दंङ बणारिंङ लन्न अपि माह जूंस। गेह अई इच्च़ा स्वर्गदूता बि पूर्व दिशा रिंङ प्रगट शुहबी तंङरिगा। दोऊ कछंङ श्रींङी परमेश्वरो इच्च़ा मुहर तोहई। दुह स्वर्गदूते मोह्ड़े सग रे दुह पि स्वर्गदूता तिंङ हाऊष रें दंङ कुई,

³ “अपेहल तचेक हेनर हेंदु परमेश्वरो दासातु फ्याह ओ टोईच़ी मुहर लगाके माह केओनि, धोंण तचेक धरती ए समुंद्र दंङ बुटातिंङ नुकसान था लंहि, ताकि दोरे दुह मुसीबतो दोरच़ी दुखी शुहबी माह जूंस,

⁴ अपेहल स्वर्गदूता ज़ि निशान लगाएच़ी पूरा लहज़ी च़रतिर, दंङ अच़िया गिह्बी कंड्रीर कि दोरे मीहरे अतु फ्याहरिंङ स्वर्गदूता ज़ि परमेश्वरो मुहरे निशान लगाएकातोर, दोतु गिनती इच्च़ा लाख निह्जो पी हज़ार तोहई। दिरे मीहरे इस्राएलो भत्ते सनी गोत्रो बिचंङ ज़ि तोईरे।”

⁵ स्वर्गदूता ज़ि यहूदा ओ गोत्रो बिचंङ सनी हज़ार मीहतु टोईच़ी मोहर लगाएतिर, रुबेनो गोत्रो दोरच़ी सनी हज़ार मीहतु टोईच़ी, गाद ओ गोत्रो बिचंङ ज़ि सनी हज़ार मीहतु टोईच़ी,

⁶ आशेर ओ गोत्रो बिचंङ ज़ि सनी हज़ार मीहतु टोईच़ी मुहर लगाएती, नपतालीऊ गोत्र दोरच़ी सनी हज़ारो टोईच़ी; मनश्‍शे गोत्रो दोतु बिचंङ ज़ि सनी हज़ारो टोईच़ी।

⁷ शमौनो गोत्रो दोरच़ी सनी हज़ारो टोईच़ी लेवीऊ गोत्रो दोरच़ी सनी हज़ारो टोईच़ी, इस्साकारो गोत्रो बिचंङ ला सनी हज़ारो टोईच़ी,

⁸ जबूलून ओ गोत्रो बिचंङ ज़ि सनी हज़ारो टोईच़ी, यूसुफो गोत्रो बिचंङ ज़ि सनी हज़ारो टोईच़ी, दंङ बिन्यामीनो गोत्रो बिचंङ ज़ि सनी हज़ारो टोईच़ी मुहरो निशान लगाके च़रति।

मुसीबतो इच्च़ा मोह्ड़े भीड़

⁹ दोऊ थल गेह खंईगा कि मीहतु इच्च़ा मोह्ड़े भीड़ तोहई कि अरिला दोबि मिक्च़ी मरच़ाते। दुह संसारो हर जाति, गोत्र, राष्ट्र दंङ भाषा ओ दोरच़ी तोईरे। दोरे सिंहासन ए कुरच़ो तुईज़ी खड़े तोईरे। दोच़ी छंङसी खमज़ेर लेहसी ताहरेर दंङ हर इच्च़ा मीह एनोह गुह्ट्र रिंङ खजूरो डाड़ी च़ुमसी तहरे अंऊ दोतु आदरो निशानी तोहई।

¹⁰ दंङ मोह्ड़े सग रंङ साते हाऊष रें कुट्रा, “अतंई हेंज़ी हेंदु परमेश्वरो स्तुति लोहनि, अंऊ सिंहासनो टोईच़ी विराजमान तोह दंङ अतंई हेंज़ी दोऊ ला स्तुति लोहनि, अतिंङ कुरच़ा कुट्री छना कुचे दुह ए तोह अच़ि हेंदि हेंदु पापो न्यायो दोरच़ी बचाएकतो।”

¹¹ भत्ते स्वर्गदूतारे सिंहासनो पिला हासी दंङ सेंहणा ए पि श्रींङी प्राणी तु पिला हासी खड़े तोईरे। दोरे भत्तेर सिंहासनो तुईज़ी मोह्तु भारे कोंङा शुहचे दंङ परमेश्वरो अराधना लहरिर। दोच़ी कुईर,

¹² अमीन! ञेंहच़ी घोषणा लहज़ातंई कि ञेंहतु परमेश्वर महान, सामर्थशाली, ए पराक्रमी, ए ज्ञानवान तोह। अतंई हेनर हमेशा-हमेशा ओ थल्जी दोऊ महिमा लोहनि दंङ दोबि धन्यवाद रमोंई। अमीन।

¹³ दिऊ थल सेंहणा तु बिचंङ ज़ि इच्च़े गेरंङ साते कुई, “दि छंङसी खमज़ेर लेह्चा दि अरि शुह?” दंङ अंऊर च़ि अंज़े शुरे?

¹⁴ दंङ दोतंङ साते कुड़िगा, “हे मालिका, गेह माह ञेंच़ातग पर केई ए ञेंच़ातन,” दोई गिऊ हखा कुई, “दिरे दुह मीहरे शुरे अंऊ दोच़ी महस दुखो अनुभव लहसी शुह। दोच़ी एनोह खमज़ेर कुरच़ो शुहई रें शुहल्ज़े चरच़ातोर दंङ हेंतेग दोरे छंङसी शुहचे इलोर, दिऊ मतलब दि तोह कि दोतु पाप मिटाके केहषी तोह।”

¹⁵ दिऊ थल्जी ए दोरे परमेश्वरो सिंहासनो तुईज़ी खड़े तोतोर, दोरे हर टेम निरा या रात परमेश्वरो चुंङ दोऊ सेवा लहज़ातोर; दंङ दोतु देखभाल दोऊ दोरच़ी ए शवाह अंऊ सिंहासन टोईच़ी बंङज़ा तोह छना कुचे दुह दोर्तिंङ दोतंङ साते तोह।

¹⁶ “दोरे यह्च़ा योंई ए तिस्करे माह शोर; ऐके दोतिंङ यह्च़ा रोह्षतो माह, दंङ माह ए अंऊ ला च़चे दोतिंङ तंग लोहतो।

¹⁷ छना कुचे कुरच़ा अंऊ सिंहासनो बिचंङ तोह, दोतु रखवाली लोहतो, ध्वांए छना इच्च़ा पोहाल ए एनोह त्रैंईतु रखवाली लहज़ा; दुह दोतिंङ ताज़ा ती तुंङमिमी थल्जी रैंज़ा शुहवा लोहतो अंऊ मीहतिंङ जीवन रंड्रा, दंङ परमेश्वर दोतु टिरा ज़ि भत्ते मिक्ति भ्रूच़िह च़रपोतो।”