प्रकाशित वाक्य 6 - लाहौली बाइबिल

मुण्डो मुहर छंङसी रंङों टोईच़ी सवार

¹ दोहथल गेह खंईगा कि कुरच़ा दुह निह्ज मुहरो बिचंङ इच्च़ा युप्ति; दंङ गेह पि श्रींङे प्राणी तु बिचंङ इच्च़ा बि हाऊष रंड्री रेड्रीगा। दोऊ सग गर्जनो ठ्रोह महसे तोहई। दोई कुई, “हेंतेग ईला तुखा बणेक्तु।”

² दोहपल गेह इच्च़ा छंङसी रहंङ तंङरिगा। दंङ अंऊ दोऊ टोईच़ी सवार तोहई दोई धनुष कुरच़ा ततो: दुह स्वर्गो धकते धरती ओ टोईच़ी अच़ा इलि, दोऊ ठ्रोह अंऊ तुहई ए द्रक्शे इलजी तोह, दंङ यह्च़ा द्रक्शे योतो।

³ अपेहल कुरच़े दूसरा मुहर युप्ति, दंङ गेह दूसरा प्राणी बि दि कुट्री रेड्रीगा, “एंतेग इला।”

⁴ दंङ इच्च़ा चमकदार षेह्ई रहंङ दुह ठहरि ज़ि धकतेखा हुंच़िरी अंऊर सिंहासन केहषी तोहई। परमेश्वरे दोऊ टोईच़ी बंङज़ा दोबि धरतीऊ टोईच़ी मीहतिंङ इदि-अई दिरंङ साते तेंङज़िमी शाक्ति रांई, ताकि दुह लड़ाई रिंङ इदि-अईदि बि सच़ी च़रपोतो। दि मकसदो थल्जी परमेश्वरे दि सवारा बि इच्च़ा मोह्ड़े तलवार ला रांही।

⁵ दोहपल कुरच़े तीसरा मुहर युप्ति, दंङ गेह तीसरा प्राणी बि दि कुट्री रेड्रीगा, “एंतेग इला।” दंङ गेह खंड़िगा कि इच्च़ा रोहकी रहंङ धकतेखा अति; दंङ दोऊ टोईच़ी बंङज़ी दोऊ गुह्ट्र इच्च़ा त्रकड़ी तोह।

⁶ दंङ गेह रेड्रीगा कि दुह पि प्राणी तु बिचंङ इच्च़ा अंऊ मीहू ठ्रोह तोहई, दोई कुट्राते, “इच्च़ा ध्याड़ो ध्याड़ी सिर्फ इच्च़ा किलो टुर, या सिर्फ षुमु किलो छ्वाह च़ुमज़िमी थल्जी झोबड़ी शोतो। पर तेल ए दाखो रसो नुकसान शुहबी थारोंऊ।”

⁷ दंङ अपेहल कुरच़े चौथा मुहर युप्ति, दंङ गेह चौथा श्रींङी प्राणी बि दि कुट्री रेड्रीगा, “एंतेग इला।”

⁸ दोहपल गेह इच्च़ा लेहई रंगो रहंङ तंङरिगा, दंङ अंऊ दोऊ टोईच़ी सवार तोहई दोऊ मिन मौत तोहई; दंङ अधोलोक दोऊ थलेच़ि, थलेच़ि तोह। दोबि धरतीऊ टोईच़ी बंङज़ा हर इच्च़ा पि मीहतु बिचंङ इच्च़ा बि सच़िमी अधिकार रें च़रति। कि दोतिंङ तलवारे, योंष रें, मदम-मदम बीमारी रें सच़ी च़रतु, दंङ दोच़ी दोतिंङ बंणो घ्वंणर दोरच़ी ला सच़ी च़रतिर।

⁹ अपेहल कुरच़े पांचवीं मुहर युप्ति, दंङ गेह वेदी ऊ योंहने च़ि खंईगा, दोर दुह मीहतु आत्मा तोहई अंऊ सच़ी च़रसी तोईरे छना कुचे दोच़ी परमेश्वरो वचन प्रचार लहसी तरेर दोच़ी यीशु बि प्रभु कुचे गवाही रेंईर।

¹⁰ दंङ दोच़ी मोह्ड़े सग रंङ हाऊष रें परमेश्वरो हखा कुईरे, “हे पवित्र ए सच्चा प्रभु; काह धरतीऊ टोईच़ी बंङज़ा दुह मदम मीहतिंङ सज़ा रंड्रीमी थल्जी धोंण लम्हें टेम छिल्ले लेहपच़ातन? ञेंहच़ी विनती लहज़ातंई कि केई दुह मीहतु व्यवहारो बदला लेहप्तु अच़ि ञेंरे सच़ी च़रति।”

¹¹ दोतु बिचंङ हर इच्च़ा बि छंङसी खमज़ेर रेंई। दंङ परमेश्वरे दोतु हखा कुई, “हेंतेग कि थल्जी आराम लंहि, छना कुचे हेंतेग ला केहतु रेह साथी ए केहतु साथी विशवासी तोतोर अतिंङ केहतु ठ्रोह सच़ी च़रपोर। अपेहल सच़ी केट्रिमी दोतु गिनती पूरे शुहचे योतो, दोहपल ए गेह बदला लेहपोग।”

¹² अपेहल कुरच़े छठवीं मुहर युप्ति, दंङ गेह खंईगा कि इच्च़ा मोह्ड़े भुयंल शुई; ऐके ओ रंग तुंगी रोहकी कम्बलो ठ्रोह रोहकी शुहचे इलि दंङ पूरा लचंङ शुहई ओ ठ्रोह षेह्ई शुहचे इलि।

¹³ सर्गो कर धरतीऊ टोईच़ी झांह ठ्रोह द्चिह इलिर छना अंजीरो बुटो दोरच़ी कजे फल द्चिह यवातोर।

¹⁴ सर्ग दुह कागज़ो ठ्रोह ब्याके इलि अतिंङ कपचे चरच़ि दंङ भत्ते गोह ए भत्ते टापू ज़ि एनोह ठहरि लेहकी च़रतिर।

¹⁵ अतु नतीज़ा दि शुई कि, धरतीऊ भत्ते मीहरे, अतिंङ रज्ज़ा, ए प्रधान, दंङ सेनापति, दंङ साहुकार ए सामर्थी मीहरे, दंङ हर इच्च़ा दास, दंङ हर इच्च़ा दुह मीह अंऊ गुलाम माह, गोह खोहरिंङ ए चटानो बिचंङ ब्याके इलिर;

¹⁶ दंङ गोह ए चटानो हखा कुट्री लेहतिर, “ञेंहतु टोईच़ी दह्चे ईलांई, दंङ ञेंहतु मदत लंहि, ताकि अंऊ दुह सिंहासनो टोईच़ी बंङज़ी तोह, हेंदिंङ खंड्री मरपोतो दंङ कुरच़ो सज़ा ओ दोरच़ी ञेंतिंङ प्याके च़रतुंई।”

¹⁷ छना कुचे दुह भयानक ध्याड़ा पिचे इलजी तोह, अपेहल परमेश्वर ए कुरच़ा भत्ते तिंङ सज़ा रमोर, दंङ अरिला दि सज़ा ओ दोरच़ी बचेकी मरपोतो।